Ná ’n aansienlike verlaging van petrol- en dieselpryse verlede week, het ekonome voorspel dat ’n “beskeie besnoeiing” vir Februarie verwag word.
Die jongste data van die Sentrale Energiefonds (CEF) dui op ’n klein verlaging van tot 12 sent per liter vir petrol, terwyl diesel in ’n meer seker gebied is, met ’n 50 tot 60 sent per liter verlaging moontlik.
As marktoestande voortgaan om die besnoeiings vir die res van die maand te bevoordeel, sal dit lei tot die vierde agtereenvolgende verlaging in brandstofpryse, wat broodnodige verligting vir huishoudings en nywerhede bring.
Toestande kan egter in die loop van die maand aansienlik verander, en ’n beter prentjie kan teen die middel van vandeesmaand verkry word.
Ekonome verduidelik dat brandstofpryse die sleutel tot Suid-Afrika se inflasie-uitkomste is, en die beduidende verlagings in pryse wat sedert November gesien is, kan op die lange duur inflasie verlig en die land op ’n beter voet plaas vir rentekoersverlagings.
November was daar ’n R1,78 per liter verlaging in die petrolprys wat gehelp het om inflasie af te trek tot 5,5% in November, en met die Desember se verlaging van 64c per liter behoort dit ook te help om inflasie te verlaag.
Die petrolprys het verlede week met 76c per liter gedaal en diesel met R1,18 per liter.
Die CEF se data toon dat, met die uitsondering van 93 oktaan-petrol, stabiele oliepryse en randwaarde bydra tot klein oorverhalings in die prys.
Brandstofpryse behoort gemiddeld laer te wees in die eerste drie maande van 2024, vergeleke met dieselfde tydperk in 2023.
Maar dis nie als goeie nuus nie. Gebaseer op huidige aannames word verwag dat beide petrol- en dieselpryse in die eerste kwartaal van 2024 die onderpunt sal bereik en dan geleidelik gedurende die oorblywende kwartale van 2024 en in 2025 sal styg.
Petrol kan in 2024 gemiddeld 0,6% meer kos, terwyl diesel na verwagting 0,6% minder sal kos vergeleke met 2023.
