Boland Landbou het Saterdag onder druk koelkop gebly om ’n onvergeetlike oorwinning van 17-11 teen sy teenstander, Oakdale Landbou, in ’n Sportsmans Warehouse Premier Interskole-kragmeting in Riversdal te verseker.
Boland Landbou se haker, Cilliers Viljoen, was die held vir sy span toe hy die wendrie met die laaste beweging van die wedstryd gedruk het – drie minute nadat die toeter reeds geklink het.
Daar was tonele van delirium terwyl die Boland Landbou-ondersteuners die veld oorstroom het om die wen-oomblik te vier.
Oor die algemeen was dit ’n fisieke botsing tussen die twee teenstanders wat enige kant toe kon gegaan het. Vir die hele 70 minute het albei spanne alles in hul laaste wedstryd van die seisoen op die spel geplaas.
Oakdale het die wedstryd perfek begin toe hy die telling ná drie minute met ’n strafdoel oopgemaak het.
Die volgende 15 minute het albei spanne gelyke besit en grondgebied geniet. Veral Boland Landbou se voorspelerpak was indrukwekkend, maar kon nie druk in punte omsit nie.
Oakdale se linkervleuel, Therlow Prins, het ’n briljante lopie geniet om die eerste drie van die wedstryd te druk en ’n voorsprong van 8-0 vir Oakdale te verseker.
Boland Landbou was toe op die agtervoet met ’n verbeurde strafskopkans en het kans gehad om ’n syfervoordeel te benut toe Oakdale se slot sondebak toe gestuur is omdat hy sy teenstander in die lug gespeel het.
Retagan van Rooi het uiteindelik Boland met ’n strafdoel op die telbord gekry om dit rustyd 8-3 te maak. Met die tweede helfte was Boland Landbou vuur en vlam en pal op die aanval.
Die dissipline in die verdediging was net die tonikum wat Boland Landbou nodig gehad het, want hy het hom gou in die Oakdale-22 bevind. Dié keer het hy die besit ten beste benut as ’n skerp lopie en afslag van Van Rooi se binnesenter en kaptein, Albie Bester, vir die besoekers se eerste drie. Van Rooi het suksesvol verdoel om Boland Landbou vir die eerste keer met 10-8 te laat voorloop.
Oakdale is in die laaste minuut van die wedstryd met ’n strafdoel beloon om 11-10 voor te loop, en almal het toe gedink die koeël is deur die kerk.
Maar Boland Landbou was meedoënloos en het in die 73ste minuut die druk vol- gehou en uitstekende dissipline en ’n konstante stortvloed van fases het Viljoen laat oordryf vir die wendrie.
