Die argivaris Pétria de Vaal bied vanaf 25 tot 27 Mei ’n inleidende, tweetalige argief-werksessie by die Taalmonument in die Paarl aan.
Dié gewilde driedag-werksessie, wat vanjaar vir die sewende keer aangebied word, is geskik vir bibliotekarisse, museum- en erfenisbeamptes asook dokumentering- en argiefassistente.
De Vaal is ’n gekwalifiseerde argivaris met baie jare se ervaring in die veld van rekordbestuur en argivering. Sy het deur haar werk as raadgewer, navorser, erfenisbeampte, projekleier en afrigter ontdek dat dit noodsaaklik en belangrik vir biblioteke, dokumentasiesentrums, museums en ander verwante dissiplines is om saam te werk en meer te leer oor argivering.
Hierdie inleidende driedaagse werksessie sal aan alle inligtingsbeamptes die nodige opleiding verskaf; geen voorafkennis word benodig nie. Die werksessie sluit praktiese sessies in en fokus op onderwerpe soos die verskille tussen biblioteke, argiewe en dokumentasiesentrums; insameling en aanwins; waardebepaling (onder meer die waarde van rekords asook beskikkings-instruksies); sortering en ordening; beskrywing/indeksering; bewaring; rampbestuurplan; en wenke oor die toeganklikheid van argiewe. Die kursus kos R2 000 en vind daagliks van 09:00 tot 16:00 in die konferensielokaal in die besoekersentrum by die Taalmonument plaas. Vir nog inligting kontak Jeffrey Pietersen by 021 872 3441 of stuur ’n e-pos na bemarking2@taalmuseum.co.za.
