Die wag is amper verby. Met slegs een dag oor, staan Jeffreysbaai op die vooraand van ‘n opwindende nuwe kultuurfees wat oud en jonk sal vermaak.
Aangebied deur Jeffreysbaai Toerisme, in samewerking met Kouga Plaaslike Munisipaliteit, vanaf 21 tot 23 Maart by die NG Kerk-kompleks in Jeffreybaai, beloof Teater by die See ‘n naweek vol toneelkuns, musiek, kunsuitstallings en kreatiewe werksessies. Hoogtepunte van die fees sluit in ster-artiestvertonings deur van Suid-Afrika se beste kunstenaars, ‘n marimba band en brass band vir ‘n musikale bederf, ‘n blommeklub-werkswinkel vir kreatiewe geeste, ‘n kunsuitstalling deur die Kouga Art Society, ‘n klassieke motorskou vir motorliefhebbers en ‘n teetuin vir ‘n rustige kuierervaring.
Moet nie uitmis nie – kry jou kaartjies vandag nog.
Vrydag – 21 Maart 2025
Die naweek se feestelikhede begin op Vrydag, 21 Maart 2025, om 10:00 met ‘n kunsuitstalling deur die Kouga Art Society, asook ‘n teetuin. ‘n Gratis oggendkonsert deur Menno en vriende word om 11:00 aangebied. Vanaf 12:00 saai Luister FM regstreeks uit, terwyl motorliefhebbers ‘n klassieke motorskou kan geniet. Om 15:00 word ‘n interaktiewe blommewerkswinkel aangebied, wat reeds vol bespreek is. Die aand se program skop om 18:00 af met ‘n opwindende vertoning deur ‘n marimba band. Een van die hoogtepunte van die naweek volg om 19:00, wanneer die ikoniese André Schwartz gehore betower met sy meesterlike produksie, My Pad met Webber. Kaartjies vir hierdie vertoning kos R220.
Saterdag, 22 Maart 2025
Op Saterdag, 22 Maart 2025, begin die dag om 10:00 met ‘n pragtige kunsuitstalling deur die Kouga Art Society, asook ‘n blommeklub-werkswinkel en ‘n teetuin vir besoekers wat ‘n bietjie wil ontspan. Om 11:00 wag daar ‘n spesiale bederf vir jong gehore met die kinderproduksie Liewe Heksie Vang Vis, aangebied deur Margit Meyer-Rodenbeck. Hierdie produksie het in 2022 die prys vir beste kindertoneelstuk by die KKNK gewen. Kaartjies vir die vertoning kos R150 vir volwassenes en R90 vir kinders.
Die middagprogram bied ‘n viering van plaaslike talent met die “Talent by die See”-kompetisie om 12:30, waar talentvolle inwoners van Kouga die kans kry om hul vaardighede in verskeie kategorieë ten toon te stel. Die aandprogram begin om 18:00 met ‘n optrede deur die Harmony Community Brass Band. Om 19:00 word die verhoog oorgeneem deur die uitmuntende Marion Holm, wat gehore betower met haar vertolking van die ikoniese Marilyn Monroe. Hierdie glansryke vertoning bring ‘n bietjie Hollywood-sjarme na Jeffreysbaai en kaartjies kos R190.
Sondag, 23 Maart 2025
Op Sondag, 23 Maart 2025, word die naweek op ‘n gepaste noot afgesluit met ‘n roerende vertoning deur Jak de Priester. Sy produksie, Hartkamer, beloof om ‘n intieme en spesiale ervaring vir gehore te wees. Hierdie vertoning begin om 17:00 en kaartjies kos R180.
Bespreek jou sitplek
Naweekkaartjies en blokbesprekings is eksklusief beskikbaar by die Jeffreysbaai Toerisme-kantoor (064 966 9933), terwyl individuele kaartjies deur Quicket en die Toerisme-kantoor gekoop kan word.
