Hoërskool Nico Malan bult spiere in atletiek

HUMANSDORP – Atlete van die Hoërskool Nico Malan op Humansdorp was die groot uitblinkers by die Kouga- en Koukammastreek se byeenkoms.

Ses rekords is verbeter wat wys dat ’n sterk poging van hulle verwag kan word by die Sarah Baartman-byeenkoms op 17 Februarie in Gqeberha.

Doné Mostert en Lienke Vosloo het elk twee rekords verbeter. Doné se rekord in die 0.14-gewigstoot was 11.67 meter, terwyl haar diskuspoging van 31.27m ook in die rekordboeke opgeteken staan.

Lienke is ’n hekkiesatleet wat fyn dopgehou moet word. Sy het die 90m-wedloop vir meisies o.15 in 14.00 sekondes gewen en dit opgevolg met nóg ’n rekord in die 300m-hekkies toe sy in 46.41 gewen het.

Annique de Beer was weer op dreef in die 3000m-wedloop vir meisies o.15 toe sy in 13:03.25 gewen het. Dan het Liam Vosloo ’n rekord in die 110m-hekkies vir seuns o.19 opgestel. Sy wentyd was 15.97 sek.

Altesaam 56 atlete sal Nico Malan by die Sarah Baartman-byeenkoms verteenwoordig. Die verwagting is dat hulle ’n groot faktor in die Baai sal wees en dat nóg rekords in die slag kan bly.