DIE Hoër Landbouskool Marlow se eerste tennisspan het onlangs aan die gewilde Marilie Moolman-tennistoernooi deelgeneem en goed gevaar.
In die eerste wedstryd het Marlow teen die Hoërskool Sasolburg te staan gekom en die kragmeting maklik met 24–4 gewen. Daarna het Marlow teen die Hoërskool Pearson gespeel en hulle met ’n telling van 20-8 geklop.
Daarna het Marlow teen Diamantveld te staan gekom en met slegs een wedstryd verloor. Diamantveld het daarna in die finaal teen die Hoërskool Menlo te staan gekom.
Op die volgende dag het Marlow teen Paarl Boys’ High gespeel en die wedstryd 9–18 verloor. In die uitspeelwedstryde vir vyfde en sesde plek het Marlow teen die Hoërskool Grey van Port Elizabeth gespeel en hulle maklik met sewe wedstryde teenoor twee geklop. Marlow het sodoende vyfde in die toernooi geëindig.
Marlow se nommer twee speler, Yanga Dinga het al sy wedstryde, dubbels ingesluit, gewen. Gideon Smith, nommer vyf, het ook al sy enkels gewen.
