OP Saterdag, 25 Mei het Grootfontein Landboukollege (buite Middelburg) met Cradock-rugbyklub op Grootfontein kragte gemeet.
Cradock se kaptein, Danny de Gouveia, het in die eerste helfte ’n drie gedruk, Odendaal Pienaar het sewe punte vir Cradock met sy skopvoet aangeteken, terwyl die ander drieë vir Cradock deur Delaré Schoeman en Lucian Stuurman aangeteken is.
Teen rustyd het Cradock met 15 punte teenoor Grootfontein se 10 voorgeloop.
Tydens die wedstryd het Rico van der Mescht (Rover) twee drieë vir Grootfontein gedruk, met Christo Goosen (Stretch) en Dirk van Rooyen (Stoorlam) wat ook elkeen ’n drie vir die Landboukollege gedruk het. Verdere punte is ingepalm deur die skopwerk van Dirk van Rooyen en Rico van der Mescht.
In die tweede helfte se laaste minute het die Namibiër, Lothar Cloete (Cowboy), die laaste drie vir Grootfontein gedruk, terwyl Bertram Weyer-Henderson (Chappie) die wedstryd met die laaste skop pale toe afge-rond het.
Grootfontein klop hiermee vir Cradock met 31 teenoor 22.
