DIE naweek van 4 en 5 Mei was sonnig en net reg vir die Seniors en Novice Midlands-rolbaltoernooi wat op Somerset-Oos gehou was.
Daar was 20 spelers van Jansenville, Graaff-Reinet, Middelburg, Cradock en Somerset-Oos en die kompetisie was sterk. Al die spelers was egter gemotiveerd om die enkelspeltitels te verower.
Hiervan kan Tienie Prinsloo van Cradock getuig, want voordat hy as senior wenner kon wegstap, was hy in ’n titaniese stryd gewikkel.
Hy het sy twee uitspeelrondtes net-net 21/20 gewen en die derde ook naelskraap met 21/17 teen Walton Koetaan van Jansenville.
As hy hier sou verloor het, kon hy maar tot siens gewuif het vir die eindstryd. Die geluk en vaardig-heid was egter aan sy kant en hy het weggestap as senior manswenner.
Helen Louw van Middelburg was die senior dameswenner. Naaswenner was Miranda Lückhoff van Graaff-Reinet met die telling 21/12.
Priscilla Kasperski van Graaff-Reinet het die skild as die dames amateur-wenner (novice) verower met Cheryl Botha van Cradock in die tweede plek.
Cedric Taylor van Somerset-Oos was die mans amateur (novice) wenner nadat hy en Pieter Kleyn-hans, ook ’n Somersetter, ’n “Round Robin” gespeel het.
Soos gewoonlik is daar heerlik saam geeët en gekuier en almal het Sondagmiddag met groot glimlagte vertrek ná ’n heerlike naweek van rolbal.
“En amal het weer begin praat oor die volgende wedstryde,” het Johan Mattheyse van die Somerset-Oos-rolbalklub gesê.
