Vanjaar is dit makliker as ooit om in te skryf. Mense tussen nege en 35 kan deelneem deur ’n video per WhatsApp te stuur aan 079 906 7359. In die kort video’s moet deelnemers hul besonderhede verskaf en hul spesiale talent met ’n optrede demonstreer. Kategorieë waarin deelnemers hul staal kan wys, is sang, dans, instrumentele musiek en skerpskets-komedie. Die sluitingsdatum is Vrydag 15 November om 12:00.
Kompetisiereëls, asook die bepalings en voorwaardes vir deelname, word op suidoosterfees.com uiteengesit. Dit is belangrik vir voornemende deelnemers om dié riglyne op die webwerf te lees en te volg. Onder-18’s se inskrywings moet deur die toestemming van ’n ouer of voog vergesel word.
Oudisievideo’s moet organiseerders teen Maandag bereik, waarna die beoordelaars semifinaliste sal nooi om werkswinkels in Kaapstad by te woon om hul vaardighede te slyp vir die volgende kompetisierondes.
Caitlin White, ’n jong sangeres van Delft, is vroeër vanjaar as wenner van die vorige Talentsoektog aangewys. “Caitlin is ’n uitstekende jong sangeres, en ons is baie opgewonde om te sien hoe haar uitsonderlike stem in die toekoms geleenthede vir haar gaan open,” sê Jana Hattingh, Suidoosterfees se uitvoerende hoof.
“Ons nooi alle talentvolle amateurs om aan die kompetisie deel te neem, en ons mentors staan gereed om finaliste se vaardighede te ontwikkel en af te rond,” vertel Jana. Die Talentsoektog word ondersteun deur die ATKV, kykNET se Suidooster, Dance for All en die Kaapse gemeenskapspublikasies City Vision, People’s Post en TygerBurger.
Die Suidoosterfees se hoofborge is die Departement van Sport, Kuns en Kultuur; die Wes-Kaapse Departement van Kultuursake en Sport; Stad Kaapstad; Netwerk24; Die Burger; NATi; kykNET; die ATKV en Kunstekaap.
