Kersfees het vroeg vir Atlantics-rugbyklub gekom toe hy onlangs ’n groot skenking van splinternuwe toerusting ontvang het.
Dit het gekom nadat Michael Charton van Lord’s Taverners se Suid-Afrikaanse been voorgestel het dat hulle die opbrengs van ’n groot geleentheid moet gebruik om toerusting vir ’n plaaslike rugbyklub te skenk.
Lord’s Taverners is een van Brittanje se grootste sport-liefdadigheidsorganisasie wat kinders met gestremdhede sowel as minderbevoorregte jeugdiges ondersteun.
David Ralph het met Marquine Lukas en Isak Henecke van Atlantics-rugbyklub ontmoet om te bepaal wat hulle behoeftes is. Hy het toe vir Performance Brands, wat die plaaslike agent vir die Gilbert-handelsmerk is, genader en hulle het die toerusting teen ’n goeie prys beskikbaar gestel.
“Hulle het selfs ’n paar oefenballe geskenk,” aldus Ralph. “SACS (South African College School) in Kaapstad het die paalbeskermers geskenk en dit is deur ’n maatskappy genaamd Sew Extreme buite Botrivier opgeknap. Morne du Plessis het ook ’n bal geskenk wat aan Heneke oorhandig is.”
Lukas het Lord’s Taverners vir die ruim skenking bedank en bygevoeg: “Atlantics-rugbyklub waardeer die goedhartige gebaar. Dit sal beslis van groot waarde vir ons klub asook die gemeenskap wees.”
