Die belangrikheid van kleinboere word al meer en meer beklemtoon, en dit is waarom boeredae so ’n belangrike rol in die vooruitgang van kleinboere speel.
Die departement van landbou het ’n suksesvolle boeredag vir groenteboere in Bredasdorp aangebied. Die boeredag op 9 Maart is deur sowat 60 kleinboere en voornemende boere bygewoon.
Boere en ander kenners het hul kennis en ondervinding met ander op die boeredag gedeel.
Dr. Ian Godie van Nooitgedacht-varsprodukte het gesels oor die ontstaan, groei en huidige stand van sake van die hidroponiese plaas by Bredasdorppark.
Dié projek is in September 2019 as ’n demonstrasie-projek vir Nampo-Kaap begin. Die eerste direkte lewering van produkte in plaaslike markte het in November 2021 ’n aanvang geneem.
Die plaas beslaan vandag sowat ’n halwe hektaar, waarvan net minder as die helfte ’n beskutte plant-gedeelte is. Tussen 500 en 1 000 kg produk word maandeliks geproduseer, en bestaan hoofsaaklik uit kersietamaties, slaaie, kruie en spinasie.
Goldie het die werklikheid met die geleenthede vergelyk om voornemende boere van hulp te wees wanneer hulle soortgelyke projekte aanpak.
Byron Booysen van Booysen Tunnel Farming in Kraaifontein het sy ondervinding met tonnelboerdery gedeel, asook die impak wat dit op sy gemeenskap gehad het.
Hardie Brink van RealIPM het die boere toegelig oor geïntegreerde plaag- en pesbeheer, en het die verskillende metodes met mekaar vergelyk.
Prof. Gideon Wolfaard van die Universiteit Stellenbosch het ’n oorsig gegee van nuwe, eie ontwikkelde moniteringstoerusting wat in grondlose boerdery van nut kan wees.
Debbie Theunissen van Bovenvlei het haar ervaring as ’n suksesvolle vroulike boer uiteengesit en redes aangevoer hoekom dit haalbaar was. Haar onderneming, wat in 2010 begin het, het gegroei tot een van die grootste granaat-produserende plase in Suid-Afrika.
