KROONSTAD. ‘n 80-jarige man van Kroonstad is vanmiddag in hegtenis geneem in verband met ‘n liggaam wat bykans twee weke gelede op ‘n plaas in die Kroonstad-distrik gevind is.
Die polisie het in ‘n verklaring bevestig dat die inhegtenisneming op Dinsdag 2 September plaasgevind het. Dit volg op die ontdekking van die liggaam van ‘n jong man wat op Woensdag 20 Augustus op ‘n plaas net buite Kroonstad opgegrawe is. Die polisie het na bewering opgetree op grond van ‘n wenk wat van die publiek ontvang is, wat tot die skokkende ontdekking gelei het.
As gevolg van die gevorderde stadium van ontbinding, is DNS-monsters geneem om die identiteit van die oorledene wetenskaplik te bevestig.
Intussen is ‘n moorddossier geopen, asook aanklagte van regsverydeling. Die polisie beskryf die saak as uiters ernstig en sensitief, en doen ‘n beroep op die publiek om die owerhede tyd te gun om die ondersoek deeglik af te handel.
Daar word ook ‘n dringende versoek aan die gemeenskap gerig om nie ongeverifieerde inligting te versprei nie, aangesien dit die ondersoek kan belemmer.
Die 80-jarige verdagte sal na verwagting binnekort in die hof verskyn.
Daar is ‘n kans dat die polisie moontlik binnekort nog ‘n verdagte in hegtenis kan neem.
You must be logged in to post a comment.