{"id":266596,"date":"2025-08-30T11:18:08","date_gmt":"2025-08-30T09:18:08","guid":{"rendered":"https:\/\/novanews.co.za\/worcesterstandard\/?p=266596"},"modified":"2025-08-30T12:08:06","modified_gmt":"2025-08-30T10:08:06","slug":"sewejarige-seun-sterf-nadat-hy-in-hexrivier-beland","status":"publish","type":"post","link":"https:\/\/novanews.co.za\/worcesterstandard\/sewejarige-seun-sterf-nadat-hy-in-hexrivier-beland\/","title":{"rendered":"Sewejarige seun sterf nadat hy in Hexrivier beland"},"content":{"rendered":"\n

Enrico Claassen<\/strong><\/p>\n\n\n\n

Die Roodewal-gemeenskap in Worcester is in rou gedompel nadat \u2019n sewejarige seun Woensdag (20 Augustus) in die Hexrivier beland het, en later oorlede is.<\/p>\n\n\n\n

Jermaine Rhodes van die Bloedrivier- informele nedersetting langs die Robertson-pad, was \u2019n graad 1-leerder by Roodewal Prim\u00eare Skool in Worcester.<\/p>\n\n\n\n

Sy hartseer-tante Elzaan Geldenhuys (35) s\u00ea haar broerskind se waterdood het gekom toe hy Woensdagmiddag omstreeks halfvier saam met maatjies langs die Hexrivier gaan speel het.<\/p>\n\n\n\n

Volgens haar het Jermaine aan die rivier se diepkant ingeval.<\/p>\n\n\n\n

\u201cJermaine kon nie swem nie, want hy was maar net sewe jaar oud. Toe hulle [die maatjies] sien hy spartel in die water het hulle hulp gaan soek.<\/p>\n\n\n\n

\u201cHy het \u2019n paar meter verder af op die water begin dryf nadat hy moeg geword en uiteindelik flou geraak het.\u201d<\/p>\n\n\n\n

Volgens Geldenhuys het \u2019n buurseun van hulle Jermaine uit die water gehaal en hom op die rivier-oewer neergel\u00ea.<\/p>\n\n\n\n

\u201cToe die seun vir ons kom s\u00ea Jermaine het verdrink en hy l\u00ea daar, het ek net die heeltyd ges\u00ea: \u201cHere wees hom net genadig dat hy darem nog lewe.\u201d<\/p>\n\n\n\n

Volgens Geldenhuys het sy, haar nefie Sheldon Conradie (30) en nog ander mense hulle na die toneel gehaas. Sy s\u00ea toe hulle daar aankom, het \u2019n klomp mense om Jermaine saamgedrom.<\/p>\n\n\n\n

\u201cEk het onmiddellik begin mond-tot-mond-asemhaling op hom toepas en heeltyd op sy borsie gedruk. Skuim en water het by sy mond uitgekom.<\/p>\n\n\n\n

\u201c\u2019n Vroutjie wat bo-op die brug gestaan het, het die ambulans gebel.\u201d<\/p>\n\n\n\n

Volgens Geldenhuys het ambulanspersoneel Jermaine in die voertuig gelaai en vir sowat 20 minute noodbehandeling op hom toegepas.<\/p>\n\n\n\n

Sy s\u00ea hulle het kort hierna met hom na die ongevalle-afdeling van die Worcester-hospitaal gehaas waar verdere noodbehandeling op hom toegepas is.<\/p>\n\n\n\n

Volgens Geldenhuys was sy die heeltyd aan Jermaine se sy totdat haar ma, Miena Dicgoe (70), en sy (Jermaine se) ouer broer, Wayden (12), en suster, Nienayline (16) later by haar aangesluit het.<\/p>\n\n\n\n

Geldenhuys s\u00ea Jermaine is omstreeks 17:40 oorlede. Sy s\u00ea terwyl sy en nog ander by sy lewelose liggaam gehuil het, het haar ma aanhoudend gebid.<\/p>\n\n\n\n

\"\"
Die sewejarige Jermaine Rhodes was ‘n graad 1-leerder aan die Roodewal Prim\u00eare Skool. Foto: verskaf<\/figcaption><\/figure>\n\n\n\n

\u201cJermaine was \u2019n liefdevolle kind en almal hier was baie lief vir hom.\u201d<\/p>\n\n\n\n

Volgens Geldenhuys woon en werk Jermaine se ma, Lydia, in die Paarl. Sy s\u00ea sy (Lydia) trek baie swaar aan haar derde oudste kind se dood.<\/p>\n\n\n\n

Granville Timm, waarnemende hoof by Roodewal Prim\u00eare Skool, s\u00ea die skoolgemeenskap is baie hartseer oor wat met Jermaine gebeur het. Volgens hom is berading vir Jermaine se klasmaats en klasonderwyseres gere\u00ebl.<\/p>\n\n\n\n

\u2019n Roudiens vir Jermaine word eerskomende Maandag (1 September) om 10:30 by Roodewal Prim\u00eare Skool gehou. Sy begrafnisdiens is Sondag (7 September) om 08:30 in die Kibbutz-saal in Roodewal.<\/p>\n\n\n\n

AO Vathiswa Jacobs, \u2019n polisiewoordvoerder, het die voorval bevestig. Sy s\u00ea die polisie is tans besig met \u2019n geregtelike doodsondersoek.<\/p>\n\n\n\n