{"id":49334,"date":"2023-11-28T14:59:35","date_gmt":"2023-11-28T12:59:35","guid":{"rendered":"https:\/\/novanews.co.za\/weslander\/grooming-wat-ouers-moet-weet-20231122-2\/"},"modified":"2025-03-21T16:14:10","modified_gmt":"2025-03-21T14:14:10","slug":"grooming-wat-ouers-moet-weet-20231122-2","status":"publish","type":"post","link":"https:\/\/novanews.co.za\/weslander\/grooming-wat-ouers-moet-weet-20231122-2\/","title":{"rendered":"\u2018Grooming\u2019: wat ouers moet weet"},"content":{"rendered":"\n

\u2019n \u201cOnskuldige\u201d kielie hier of \u2019n \u201cek gaan jou vang\u201d-speletjie daar kan dalk regtig onskuldig wees, maar vir pedofiele en kinderverkragters is dit deel van die grooming<\/em>-proses in aanloop tot die seksuele mishandeling van \u2019n kind.<\/p>\n\n\n\n

Ouers, onderwysers en toesighouers moet uitkyk vir hierdie gedrag omdat alle kinders jonger as agtien jaar slagoffers kan word.<\/p>\n\n\n\n

Volgens speursers. Helendine May (48) en speurkonst. Refilwe (Fifi) Sekhabe (32) van die Vredenburgse eenheid vir gesinsgeweld, kinderbeskerming en seksuele misdrywe, is kinders wat kwesbaar, ge\u00efsoleer of gestremd is, meer geneig om \u2019n slagoffer te word.<\/p>\n\n\n\n

Waarskuwingstekens dat \u2019n kind dalk \u201cvoorberei\u201d word vir ongewenste seksuele omgang met \u2019n volwassene, is gewoonlik eers n\u00e1 die tyd duidelik vir betrokkenes by die kind, wanneer teruggekyk word na die tydperk v\u00f3\u00f3r die verkragting. <\/p>\n\n\n\n

May en Sekhabe werk al onderskeidelik vier en drie jaar by die eenheid en is dit eens dat pedofiele bedrieglik en manipulerend is in die manier waarop hulle te werk gaan. \u201cNiemand kan vir grooming <\/em>in hegtenis geneem word nie, want dit is die volwassene se woord teenoor di\u00e9 van die kind. Niemand kom gee ook ooit iemand aan vir grooming <\/em>nie, want die meeste mense weet nie eens wat dit is nie,\u201d s\u00ea May.<\/p>\n\n\n\n

Wat is grooming<\/em>?<\/strong> <\/p>\n\n\n\n

Grooming <\/em>is die doelgerigte proses waarmee pedofiele begin sodra hulle op \u2019n potensi\u00eble slagoffer besluit het, en kan van \u2019n paar dae tot langer as \u2019n jaar duur. \u201cDit gebeur nie lukraak nie,\u201d het Sekhabe ges\u00ea.<\/p>\n\n\n\n

Oortreders begin met grooming<\/em> \u2013 nie net om te verseker dat die slagoffer stilbly nie, maar ook om hul ouers, enkelouer of versorgers \u2019n rat voor die o\u00eb te draai. Hulle maak seker hulle kry geleenthede waar hulle alleen saam met die kind kan wees en die kind nie weerstand kan bied nie. \u201cOortreders speel die long game<\/em>.\u201d <\/p>\n\n\n\n

Hulle is volgens die speurders geduldig en werk hard daaraan om almal betrokke se vertroue te wen, wat die kans om uitgevang te word, verminder.<\/p>\n\n\n\n

Fisieke grooming<\/em><\/strong> <\/p>\n\n\n\n

Die kind word gewoond gemaak daaraan om aangeraak te word met \u2019n klappie op die rug of arm, wat dan vorder na omhelsing, kielie en stoeispeletjies. Met verloop van tyd word die kind gekondisioneer om nog meer vlakke van fisieke kontak te aanvaar.<\/p>\n\n\n\n

Stiefpa\u2019s is lief om hierdie pad te loop en die kind voel niks is verkeerd nie, want hy of sy interpreteer die aanraking soos een van \u2019n \u201cliefdevolle ouer\u201d.<\/p>\n\n\n\n

As oortreders aanvoel die kind raak ongemaklik, sal hulle vir eers terugtrek en later weer probeer. <\/p>\n\n\n\n

Hulle hou egter aan probeer totdat seksuele misbruik moontlik raak.<\/p>\n\n\n\n

Sielkundige grooming<\/em><\/strong> <\/p>\n\n\n\n

Die sielkundige aspek raak die kind en die gesin. Oortreders knoop eerstens \u2019n verhouding met \u2019n ouer aan om toegang tot die kind te kry.<\/p>\n\n\n\n

Oortreders bestee tyd saam met hul slagoffer, gee die kind aandag en probeer die kind spesiaal laat voel, gee oor dat die kind \u201cverstaan\u201d word. Oortreders word die kind se \u201cvriend\u201d \u2013 \u2019n vriend met mag en beheer oor die kind en wat intimideer, manipuleer en voors\u00ea.<\/p>\n\n\n\n

Die oortreder bou \u2019n diep band met die kind deur die gee van geskenke en geld vir lekkernye en kos wat hulle nie by die huis mag eet nie, sonder die ouers se toestemming. Vakansies of sporttoere ver van die ouerhuis af skep geleenthede om die kind alleen te kry. Geheimhouding word dikwels hierna van die kind ge\u00ebis.<\/p>\n\n\n\n

Sodra die kind lyk asof hy of sy wil onttrek, sal die oortreder op \u2019n dramatiese wyse te kenne gee dat hy verwerp en ongelukkig voel, wat die kind skuldig en verward laat.<\/p>\n\n\n\n

Oortreders sal selfs dreig om gesinslede, troeteldiere of vriende seer te maak indien die kind dit sou waag om hierdie \u201cspesiale verhouding\u201d te staak.<\/p>\n\n\n\n

Terselfdertyd is oortreders dikwels die ouers of ma se finansi\u00eble versorger wat \u201cgelukkig moet wees dat die oortreder aandag aan die kind gee\u201d. Ouers en enkelma\u2019s laat dan onder druk toenemend alleentoegang toe. Di\u00e9 taktiek verwar en isoleer die kind uiteindelik. Hulle voel dan verantwoordelik of medepligtig aan die verkragting.<\/p>\n\n\n\n

\u2019n Skuldgevoel is die hoofrede waarom kinders nie seksuele mishandeling aanmeld nie.<\/p>\n\n\n\n

Omgewings-grooming<\/em><\/strong> <\/p>\n\n\n\n

Oortreders skep \u2019n beheerde omgewing deur \u2019n beeld aan die gemeenskap voor te hou as \u2019n verantwoordelike en sorgsame burger. Gevolglik beland hulle dikwels in vertrouensposisies waar hulle ongemoniteerde toegang tot kinders kry, soos in die geval van \u2019n sportafrigter of kerk-jeugleier. As \u2019n vermoede of bewering na vore kom, wys volwassenes dit maklik af omdat hulle nie kan glo dat die oortreder ooit \u2019n kind sal skade aandoen nie. Sodoende stel die gemeenskap die oortreder in staat om ongestoord met sy dade voort te gaan.<\/p>\n\n\n\n

Tekens om voor uit te kyk<\/span><\/p>\n\n\n\n