{"id":294939,"date":"2026-03-31T07:44:52","date_gmt":"2026-03-31T05:44:52","guid":{"rendered":"https:\/\/novanews.co.za\/weskusnuus\/?p=294939"},"modified":"2026-03-31T07:54:23","modified_gmt":"2026-03-31T05:54:23","slug":"jong-vrou-veg-vir-herstel-na-wrede-suur-aanval","status":"publish","type":"post","link":"https:\/\/novanews.co.za\/weskusnuus\/jong-vrou-veg-vir-herstel-na-wrede-suur-aanval\/","title":{"rendered":"Jong vrou veg vir herstel n\u00e1 wrede suur aanval"},"content":{"rendered":"\n

ATLANTIS – \u201cDit gaan \u2019n lang pad na herstel wees, maar ek bly positief,\u201d het die 25-jarige Shaneka Johnson vanuit haar hospitaalbed in die Tygerberg-hospitaal se brandeenheid vertel. <\/p>\n\n\n\n

Haar lewe is meer as twee weke gelede in \u2019n hel van pyn verander toe \u2019n bottel suur op Sondag 15 Maart oor haar kop uitgegooi is. \u201cDie verdagte het my beskuldig dat ek sy selfoon gesteel het,\u201d verduidelik sy in erge pyn. <\/p>\n\n\n\n

\u201cEk het verduidelik dat ek nie sy selfoon geneem het nie, maar hy wou niks hoor nie.\u201d Sy het haar selfoon vir di\u00e9 vriend van haar oorlede k\u00earel gewys, maar hy het volgehou dat sy sy selfoon geneem het.<\/p>\n\n\n\n

\"\"
Shaneka Johnson het uit haar hospitaalbed vertel wat die \u201csuurmonster\u201d aan haar gedoen het.<\/figcaption><\/figure>\n\n\n\n

\u201cDie volgende oomblik het my kop begin brand en het ek die mees ondraaglike pyn ervaar,\u201d vertel sy. <\/p>\n\n\n\n

Die verdagte, Alvin “Lippe” Smith (38), het Maandag 30 Maart in die hof verskyn en sal weer Woensdag 1 April om borgtog aansoek doen.<\/p>\n\n\n\n

Volgens Shaneka moet dokters nog besluit of slegs die helfte van haar oor verwyder gaan word, of die hele oor. Sy het ook beserings aan haar kop, rug, nek, been en arm. Verder moes haar hare boonop afgeskeer word, sodat dokters die skade van die brandwonde – tot op die skedel – kon bepaal.<\/p>\n\n\n\n

\"\"
Shaneka Johnson wys wat die suur aan haar liggaam gedoen het.<\/figcaption><\/figure>\n\n\n\n

Volgens Melvina, Shaneka se ma, is sy baie bekommerd dat geregtigheid haar kind ontneem gaan word. \u201cOns het in die hof gehoor dat dit slegs my kind se verklaring in die dossier is en dat daar nie \u2019n J88 is om die erns van die beserings aan te dui nie. Daar is ook nie verklarings van dokters en getuies nie, wat beteken die ‘suurmonster’ kan moontlik op borg vrygelaat word.<\/p>\n\n\n\n

\u201cOns moes die dokters by Tygerberg vra of sy net vir die naweek ontslaan kan word sodat sy \u2019n verklaring kan afl\u00ea, omdat sy geen besoek van die polisie in die hospitaal ontvang het nie,\u201d vertel die familie, erg ontstoke.<\/p>\n\n\n\n