{"id":45715,"date":"2023-05-04T10:37:15","date_gmt":"2023-05-04T08:37:15","guid":{"rendered":"https:\/\/novanews.co.za\/udexpress\/eerlike-blik-oor-grootwordjare-in-suideinde-20230426-2\/"},"modified":"2025-03-21T13:15:10","modified_gmt":"2025-03-21T11:15:10","slug":"eerlike-blik-oor-grootwordjare-in-suideinde-20230426-2","status":"publish","type":"post","link":"https:\/\/novanews.co.za\/udexpress\/eerlike-blik-oor-grootwordjare-in-suideinde-20230426-2\/","title":{"rendered":"Eerlike blik oor grootwordjare in Suideinde"},"content":{"rendered":"\n

Praat nou van \u2019n boek wat sorgvrye seuns-grootwordjare kleurryk beskryf, dan praat jy van Bennie en Die Uilbende (Kaskenades in die ou Suideinde)<\/em>. \u2019n Mens kan maar s\u00ea dit is Trompie en die Boksombende in oortreffende trap.<\/p>\n\n\n\n

\u201cDie verskil is dat hierdie die waarheid is oor my grootwordjare in Southdene, Leaplek, en Suideinde. Daar is enkele stukkies fiksie, maar selfs die fiksie is gebaseer op ware gebeure.\u201d s\u00ea Ben Gerber van Despatch, afgetrede onderwyser van HTS Daniel Pienaar, en skrywer van Bennie en Die Uilbende (Kaskenades in die Ou Suideinde)<\/em>.<\/p>\n\n\n\n

\u201cBennie en Die Uilbende<\/em><\/span> is uniek en histories waar. Die boek bevat 32 kortverhale oor my grootwordjare. Eers in Southdene, waar die armste van armblankes in houthuise van die eens terugkerende soldate uit die Tweede W\u00eareldoorlog gebly het. Later is ons verskuif na Leaplek in Suideinde, \u2019n kosmopolitiese woonbuurt met Chinese, Bruinmense en Indi\u00ebrs,\u201d s\u00ea Ben.<\/p>\n\n\n\n

\u201cBasies kom dit daarop neer dat die verhaal deur die o\u00eb van \u2019n kinderbende geskryf word. Ons belewenisse, die lief, leed, romanses, en kattekwaad in die ou Suideinde, wat eintlik PE se eie Distrik 6 was.\u201d<\/p>\n\n\n\n

Southdene was \u2019n woonbuurt oorkant die Port Elizabeth lughawe wat deesdae bekendstaan as die Chief Dawid Stuurman-lughawe. Southdene het \u2019n voorbereiding- sowel as \u2019n laerskool gehad. Vandag is al die huise afgebreek en bestaan die woonbuurt nie meer nie.<\/p>\n\n\n\n

Die legendariese Springbokrugbyspeler Danie Gerber het ook in Southdene en later jare Leaplek grootgeword. In die boek is daar enkele verwysings na Danie Gerber se kinderjare, wat volgens die skrywer \u201cnog nie elders op skrif gestel is nie.\u201d<\/p>\n\n\n\n

\u201cDanie kom uit die nederigste woonbuurt, waar my ma hom talle kere kaalbas terug huis toe gestuur het. En di\u00e9 einste stoutgat het met sy talent dit tot in die Hall of Fame in Engeland gemaak!\u201d s\u00ea Gerber, wat nie verwant is aan die \u201cDoring van Despatch\u201d nie. <\/p>\n\n\n\n

In een van die hoofstukke skryf Gerber hoe Danie Gerber, wat toe reeds baie vinnig was, \u2019n skoolbus agternagesit het, nadat een van die skrywer se broers, Deon, sy tas in die bus vergeet het.<\/p>\n\n\n\n

\u201cDanie het net ges\u00ea hou my tas! Toe trek hy teen \u2019n spoed weg en hol die bus, wat al \u2019n halwe kilometer weg was in, spring in die bus, kry die tas en hardloop terug.\u201d <\/p>\n\n\n\n

In een van Gerber se ander hoofstukke vertel hy hoe hulle vanaf die Laerskool Southdene \u2019n paar kilometer om die lughawe se aanloopbaan moes loop om by hul huise in Leaplek te kom.<\/p>\n\n\n\n

\u201cSoms het ons besluit om kortpad te vat. Dan klim ons oor die lughawe se ho\u00eb heining en hardloop oor die aanloopbaan. Dit was groot sports, want soms het daar \u2019n vliegtuig ingekom om te land, of die lughawe se patrolliebakkie het ons gejaag.\u201d <\/p>\n\n\n\n

Gerber s\u00ea hy het die verhale \u201cso bietjie gedramatiseer. Dit is 98% die waarheid, met so bietjie omstandigheidswaarhede vir die effek ingeskryf om die leser se verbeelding in die storie in te trek.\u201d<\/p>\n\n\n\n

Bennie en Die Uilbende<\/em> <\/span>beslaan 135 bladsye met hoofstukke oor Gerber se kleintyd-herinneringe. In die middel is daar 12 historiese foto\u2019s wat sy pa met \u2019n bokskamera geneem het. <\/p>\n\n\n\n

\u201cDit gee lesers \u2019n visuele idee van hoe dit destyds in Southdene en Leaplek gelyk het.\u201d<\/p>\n\n\n\n

Die boek is taalkundig versorg deur sy oud-kollegas Riaan van der Merwe en Rina Kahts. Dit is geskryf vir lesers tussen grade 4-9, maar volwasse lesers kan die gebeure binne \u2019n historiese konteks ook interessant vind.<\/p>\n\n\n\n

\u201cHeelwat mense wat saam met my in Southdene en Leaplek grootgeword het, het reeds vir hulle di\u00e9 boek aangeskaf. Daar is selfs \u2019n Southdene-groep van mense wat soos ek d\u00e1\u00e1r grootgeword het.\u201d <\/p>\n\n\n\n

Hy het ook \u2019n kopie aan die Suideinde Museum geskenk. <\/p>\n\n\n\n

Gerber het ook twee digbundels uitgegee en is amper klaar met sy vierde boek wat handel oor wedvlugduiwe as \u2019n stokperdjie in die Oos-Kaap. <\/p>\n\n\n\n