{"id":305596,"date":"2026-02-09T15:29:52","date_gmt":"2026-02-09T13:29:52","guid":{"rendered":"https:\/\/novanews.co.za\/tygerburger\/?p=305596"},"modified":"2026-02-09T17:13:03","modified_gmt":"2026-02-09T15:13:03","slug":"ma-van-durbanville-publiseer-eerste-kinderboek-om-kinders-van-gevolge-te-leer","status":"publish","type":"post","link":"https:\/\/novanews.co.za\/tygerburger\/ma-van-durbanville-publiseer-eerste-kinderboek-om-kinders-van-gevolge-te-leer\/","title":{"rendered":"Ma van Durbanville publiseer eerste kinderboek om kinders van ‘gevolge’ te leer"},"content":{"rendered":"\n

Die ervaring van ‘n ma van Durbanville met haar eie dogter as tweejarige het die idee om ‘n kinderboek te skryf laat ontstaan \u2014 dit onder meer oor ‘n verlore eend van Vygeboomdam in Durbanville. <\/p>\n\n\n\n

Gertruida Gans leer ‘n les <\/em>is Halrika Breytenbach, ‘n kommunikasiekonsultant, se eerste gepubliseerde boek. “Woorde het soveel impak en het die vermo\u00eb om te bou of te breek. Stories is \u2018n kragtige medium om vir kinders belangrike lesse en waarhede op \u2018n verstaanbare manier oor te dra \u2014 wat \u2018n lewensveranderende effek kan h\u00ea op kinders se waardes en geloofstelsel,” s\u00ea sy.<\/p>\n\n\n\n

Lief vir lees<\/h2>\n\n\n\n

“Ons dogter Am\u00e9, nou 16 jaar oud, is baie lief vir lees en kleintyd kon ek nie voorbly om leesboeke in die hande te kry sonder temas soos toordery of bangmaakgoed om vir haar voor te lees nie. Daar het iets in my hart begin groei om by te dra tot opbouende, stigtende leesstof vir die kleinspan. S\u00f3 het my stories vir kinders begin vloei,” vertel sy.<\/p>\n\n\n\n

Twee spesifieke gebeurtenisse het tot Gertruida Gans se storie gelei. <\/p>\n\n\n\n

\"Halrika
Halrika Breytenbach lees voor uit haar boek vir die tjokkers van die Pre-prim\u00eare Skool Klein Phisantekraal buite Durbanville.<\/figcaption><\/figure>\n\n\n\n

“Toe ons dogter twee was, het ek vir haar probeer verduidelik dat dit wat ons doen, gevolge het. Sy het toe met baie oortuiging vir my vertel dat sy nie plek het om haar \u2018volge\u2019 te dra nie, want sy dra alreeds haar handsakkie en haar pop. Dis een van daardie kosbare oomblikke wat ‘n mens vir altyd onthou, maar dit het my net weer laat besef dat \u2018gehoorsaamheid\u2019 en \u2018gevolge\u2019 groot en moeilike woorde is om vir jong kinders te leer, terwyl dit so noodsaaklik is om hulle daaroor te leer.<\/p>\n\n\n\n

” ‘n Ander keer het ons in die parkie van ons kompleks gaan stap. \u2018n Verlore eend het daar op die grasperk rondgekwaak en geheel en al verdwaald gelyk in die woonbuurt tussen die huise. Die verdwaalde eend en ‘n storie om gehoorsaamheid te probeer verduidelik, het Gertruida Gans se storie laat vlam vat,” s\u00ea Breytenbach.<\/p>\n\n\n\n

Hoewel dit haar eerste boek is, het sy ook verlede jaar ‘n kinderstorie, Gary Giraffe\u2019s Journey to Joy,<\/em> vir \u2018n private projek deur die beleggingsmaatskappy Tabono Investments, opgedra aan die 2025 Gary and Vivienne Player Invitational, geskryf.<\/p>\n\n\n\n

“Ek en Monja Spies, wat die lieflike illustrasies vir Gertruida Gans leer ‘n les <\/em>gedoen het, ook h\u00e1\u00e1r debuutboek, het ook saam aan hierdie projek gewerk,” s\u00ea sy.<\/p>\n\n\n\n

Onder vlerk geneem<\/h2>\n\n\n\n

Breytenbach het in Oudtshoorn grootgeword en gematrikuleer. Sy het n\u00e1 skool BA (Bedryfskommunikasie) aan die Noordwes-Universiteit (Pukke) studeer. Sy het in haar finale jaar in joernalistiek gespesialiseer en in die afgelope 20 jaar baie skryfwerk vir verskeie publikasies gedoen.<\/p>\n\n\n\n

“Ek het egter geen formele skryfopleiding vir kinderboeke nie en is baie dank verskuldig aan my wonderlike redigeerder, Louise Viljoen, wat my onder haar vlerk geneem het tydens die publikasieproses. Ek het ongelooflik baie by haar geleer en dink sy is een van die bestes in die bedryf.”<\/p>\n\n\n\n

In ‘n resensie deur Elizb\u00e9 van der Colff beskryf sy die boekie as een van die beste prenteboeke wat sy in ‘n lang tyd beleef het.<\/p>\n\n\n\n

“Dis ideaal vir twee- tot vyfjarige kleuters. Die Bybelse waarheid van gehoorsaamheid aan jou ouers, gebaseer op Spreuke 15:5, word in hierdie verhaal gedemonstreer en geleer. Kleuters sal hulle maklik met Gertruida Gans kan vereenselwig,” lui die resensie.<\/p>\n\n\n\n

Ook in bediening<\/h2>\n\n\n\n

“Ek en my man, Fanie, met wie ek al 21 jaar getroud is, is ook in die bediening met ‘n passie daarvoor om God se koninkryk te bou en mense na Hom toe te lei deur middel van aanbiddingsmusiek en Sy Woord te deel,” s\u00ea sy.<\/p>\n\n\n\n

Daar is nog stories op pad oor Gertruida se mede-karakters. “Dan het ek ook ‘n voltooide storie wat gemik is op ouer kinders, waaroor ek baie opgewonde is.”<\/p>\n\n\n\n

Breytenbach het ook al ‘n musiekblyspel geskryf en vervaardig \u2014 saam met Juan\u00e9 de Villiers \u2014 en twee albums vrygestel.<\/p>\n\n\n\n

Haar raad aan ander met skryfdrome is om “te weet dat God ‘n plan en ‘n doel met jou lewe het”.<\/p>\n\n\n\n

“Dit is Hy wat al hierdie drome in jou hart plaas. Hy het vir ons gawes en talente gegee waarmee ons moet woeker om Sy liggaam te bou en Sy koninkryk op aarde te laat kom. As d\u00edt jou motivering is terwyl jy alles wat jy droom en doen aan Hom onderwerp en Hom daarmee eer, s\u00e1l Hy vir jou dinge in lieflike plekke laat val en die regte deure laat oopgaan. Moet net nie moed opgee as dit nie dadelik gebeur nie \u2014 soms is dit eers ‘n lang proses,” s\u00ea sy.<\/p>\n\n\n\n

Die boekie is beskikbaar by www.kroonkinners.co.za of www.naledi.co.za of vooraanstaande boekwinkels.<\/p>\n\n\n\n