{"id":97883,"date":"2023-11-03T14:49:19","date_gmt":"2023-11-03T12:49:19","guid":{"rendered":"https:\/\/novanews.co.za\/rooirose\/?p=97883"},"modified":"2023-11-03T14:52:48","modified_gmt":"2023-11-03T12:52:48","slug":"boekuittreksel-vyf-ankers-wat-jou-kind-veilig-laat-voel","status":"publish","type":"post","link":"https:\/\/novanews.co.za\/rooirose\/boekuittreksel-vyf-ankers-wat-jou-kind-veilig-laat-voel\/","title":{"rendered":"Boekuittreksel: Vyf ankers wat jou kind veilig laat voel"},"content":{"rendered":"

Versorg deur Mariette Snyman. Foto Pexels\u00a0\u00a0<\/em><\/p>\n

Di\u00e9 uittreksel kom uit Hettie Brittz<\/strong> se boek, \u201cKweek kinders met heel harte\u201d (Lux Verbi, 2018), \u2019n praktiese gids om jou kind in vandag se tye reg groot te kry. Hettie verduidelik hoe ons, terwyl ons ons kinders beskerm teen die dinge waarvoor hulle nog nie gereed is nie, hulle ook weerbaar kan maak teen seerkry en gevare.<\/p>\n

 <\/p>\n

Ankers en sinkers vir jou kind se eiewaarde<\/h4>\n

“Kinders se vermo\u00eb om, ongeag hulle omstandighede, die lewe te hanteer en te blom is daarin gewortel dat hulle ten minste \u2019n veilige plekkie sal h\u00ea (\u2019n woonstel; \u2019n kamer; \u2019n skoot …) waar hulle in die liefdevolle geselskap van \u2019n ander persoon kan ontdek dat iemand hulle liefhet en dat hulle self kan liefh\u00ea. Wanneer kinders in hulle vroe\u00eb jare hierdie skat ontdek, kan hulle in gesonde volwassenes ontwikkel.” \u2013 Fred Rogers<\/p>\n

Ankers of sinkers be\u00efnvloed \u2019n kind se eiewaarde geweldig. Kinders met gedragsprobleme het dikwels geen ankers waaraan hulle kan vashou nie. Daar is verskeie sinkers in die lewe wat jou kind en sy of haar eiewaarde negatief kan raak. Ons moet daarom probeer om vir ons kinders ankers in plaas van sinkers te gee. Ankers gee vir ons kinders \u2019n staanplek in die son, maar nie \u2019n ereposisie in die heelal nie. Dit bring balans in hulle lewe.<\/p>\n

 <\/p>\n

Vyf ankers om jou kind se eiewaarde te bou<\/h4>\n
    \n
  1. Ons wil jou baie graag h\u00ea\u00a0<\/strong><\/li>\n<\/ol>\n

    Die eerste anker wat ons vir ons kinders kan gee, is die versekering dat ons as ouers ons kinders graag wil h\u00ea. Ek dink ons s\u00ea te maklik vir ons kinders: \u201cAg, as jy maar \u2019n seuntjie was,\u201d of: \u201cEk wens ek het jou gehad toe ek jonger was,\u201d of: \u201cOns het jou nie eintlik beplan nie.\u201d Ons besef nie dat dit ons kinders se heel belangrikste anker in die lewe kan wegneem nie.<\/p>\n

    S\u00ea daarom gereeld vir jou kinders: \u201cEk is bly jy is \u2019n seuntjie.\u201d \u201cEk is bly ons het jou gekry.\u201d \u201cEk kan my nie indink hoe die lewe sonder jou sou gewees het nie.\u201d Sulke boodskappe versterk ons kinders se eiewaarde en laat hulle met die gevoel dat hulle behoort.<\/p>\n

     <\/p>\n

      \n
    1. Ons is hier vir jou\u00a0<\/strong><\/li>\n<\/ol>\n

      Die tweede anker is om ons kinders te verseker ons is hier vir hulle. Ankerlose kinders ervaar dat hulle ouers afwesig is en dat hulle nie op hulle ouers kan staatmaak nie. Ons as ouers skep dalk hierdie ervaring by ons kinders deur nie in die nag vir hulle op te staan as hulle \u2019n nagmerrie gehad het nie, of deur ons kinders te los om \u2019n krisis waarvoor hulle nie toegerus is nie self te hanteer.<\/p>\n

      Ons as ouers kan op baie maniere onbetrokke by ons kinders wees. Ons kan hierdie anker terugbring in ons kinders se lewe en dit stewig aan hulle lewensboot vasmaak deur \u2019n paar gebeure te identifiseer wat ons kinders bang, senuagtig of opgewonde kan maak. Dink dan hoe jy jou ondersteuning en belangstelling op \u2019n tasbare manier aan jou kind kan oordra. Jy kan saam met jou kind by die tandarts se spreekkamer ingaan in plaas daarvan om in die wagkamer te wag. Jy kan gesonde peuselhappies aandra terwyl jou kind leer en later sy of haar uitslae op \u2019n spesiale manier vier.<\/p>\n

      \"boekuittreksel-vyf-ankers-om-jou-kind-veilig-te-hou\"<\/p>\n

      3. Jy is hier om \u2019n rede<\/strong><\/p>\n

      Die derde anker is om aan ons kinders die versekering te gee dat ons in hulle toekoms en potensiaal glo. Ons kan hulle gereeld herinner: Jy is hier om \u2019n rede. Wanneer slegte nuus ons as ouers onderkry, is dit belangrik dat ons nie ons negatiwiteit oor die toekoms met ons kinders sal bespreek nie. Kinders wil h\u00ea dat ons in hulle sal glo \u00e9n in hulle potensiaal om eendag \u2019n gelukkige en sinvolle lewe te geniet, selfs al glo ons nie in die toekoms van \u2019n regering of \u2019n instansie nie.<\/p>\n

      Wanneer jy \u2019n talent in jou kind raaksien, s\u00ea dit vir hom. Wanneer\u00a0jy \u2019n gawe in jou kind raaksien, maak haar bewus daarvan. Gee \u2019n naam aan hierdie talent of gawe sodat jou kind sal weet: Hierin l\u00ea my toekoms opgesluit. Jy kan byvoorbeeld s\u00ea: \u201cEk sien jy is \u2019n fantastiese probleemoplosser. Jy maak die beste van \u2019n slegte saak.\u201d Selfs sulke eenvoudige opmerkings gee vir kinders die anker dat ons in hulle glo.<\/p>\n

      Kinders se name is ook belangrik. As jy oor jou kinders se name gebid het en glo dat hulle name iets oor hulle toekoms s\u00ea, bevestig dit elke nou en dan vir hulle. Dalk het iemand \u2019n profesie, \u2019n Skrifgedeelte of \u2019n gebed oor jou kind geskryf. Julle albei kan dan hieroor nadink wanneer julle aan die toekoms twyfel. As jou kind \u2019n familienaam het, belig die positiewe eienskappe van die ander mense in die familie wat daardie naam dra. Bid saam met jou kind dat daardie mooi eienskappe \u00a0ook in sy of haar lewe sal ontwikkel. Kinders wat deel voel van \u2019n mooi geskiedenis \u00e9n toekoms ervaar nie so maklik dat hulle waardeloos is nie.<\/p>\n

       <\/p>\n

      \u2019n Geankerde kind is \u2019n kind wat dit goed kan hanteer om nie altyd heel bo-aan \u2019n lys te wees nie <\/em><\/h4>\n

      <\/h3>\n

       <\/p>\n

      4. Ons aanvaar jou foute<\/strong><\/p>\n

      \u2019n Vierde anker het ons ontdek deur met kinders te gesels. Hulle het vir ons ges\u00ea hulle voel die groot rede hoekom hulle ouers hulle verwerp, is dat hulle te veel foute gemaak het. Niks wat hulle gedoen het, was ooit goed genoeg nie. Deur ons kinders se foute te aanvaar en dit gereeld vir hulle te s\u00ea, skep ons vir hulle \u2019n veilige omgewing. Verseker jou kinders \u201cJy kan maar weer probeer. Dit maak nie saak dat jy dit nie nou reggekry het nie.\u201d Of: \u201cEk dink jy het jou bes probeer. Kom ek help jou en dan probeer ons weer.\u201d Dit bied aan jou kinders groot sekerheid en laat hulle veilig voel by jou.<\/p>\n

       <\/p>\n

      5. Die w\u00eareld draai nie om jou nie <\/strong><\/p>\n

      Die laaste anker is om nie by ons kinders die vals idee te skep dat die w\u00eareld om hulle draai nie. Baie van ons dink kinders is stewig geanker wanneer hulle in hulleself glo en vir hulle regte opstaan. Die waarheid is egter dat hulle dikwels nie die middelpunt van \u2019n situasie gaan wees nie. \u2019n Geankerde kind is \u2019n kind wat dit goed kan hanteer om nie altyd heel bo-aan \u2019n lys te wees nie.<\/p>\n

      Skep vir jou kinders \u2019n omgewing waarin hierdie behoeftes vervul word, en jy sal gebalanseerde en gelukkige kinders grootmaak.<\/p>\n

       <\/p>\n

      Sinkers wat jou kinders se eiewaarde vernietig<\/h4>\n

      Daar is ongelukkig ook verskeie manier waarop ons as ouers, sonder dat ons dit bedoel of beplan, ons kinders in hierdie lewe kan laat sink.<\/p>\n

       <\/p>\n

      1. Ons vergelyk ons kinders met ander<\/strong><\/p>\n

      Die eerste sinker is om ons kinders met ander te vergelyk. Dit is \u2019n fout wat ons maklik maak, want soms is daar broers, susters, niggies of neefs wat beter in iets vaar as \u2019n spesifieke kind in die gesin. En as ons ons kinders nie met iemand in die familie vergelyk nie, is daar waarskynlik presteerders by die skool soos wie jy heimlik wil h\u00ea jou kind moet wees. Elke kind verdien dit om as \u2019n individu gesien te word. Geen kind verdien dit om met iemand anders as net hulleself vergelyk te word nie. Ons kan s\u00ea: \u201cJy hardloop nou al baie vinniger as verlede jaar,\u201d eerder as om te s\u00ea: \u201cJy hardloop nou al vinniger as jou boetie.\u201d Met hierdie laaste opmerking s\u00ea jy daar is \u2019n kompetisie tussen die twee kinders en hierdie kind moet altyd \u2019n tree voor die ander een wees voordat julle op hom of haar trots sal wees of tevrede sal wees met sy of haar prestasie. Dit breek enige kind.<\/p>\n

      Lees ook: Bou jy of breek jy jou kind se selfbeeld?<\/a><\/p>\n

       <\/p>\n

      2. Ons oorbeskerm ons kinders<\/strong><\/p>\n

      \u2019n Tweede sinker is dat ons ons kinders oorbeskerm. Oorbeskermende ouers is ouers wat kinders nie gun om te wys waartoe hulle in staat is nie. Dit ontneem kinders van \u2019n stukkie identiteit wat uiters belangrik is sodat hulle stewig geanker sal wees en vooruit kan gaan in die lewe. Dit is vir ons as ouers baie moeilik om toe te kyk hoe ons kinders in \u2019n situasie beland wat vir hulle moeilik is en wat hulle laat swaarkry. Ek dink byvoorbeeld aan die keer toe ek gekyk het hoe my kind sokker speel en duidelik kon sien dat die ander kinders hom nie kans wil gee om die bal te skop nie omdat hy \u2019n vorige bal wat na hom toe aangestuur is, verkeerd geskop het. Alles in \u2019n ouer wil jou op daardie veld laat storm en s\u00ea: \u201cGee my kind \u2019n kans!\u201d Dit is in ons aard, maar om nie aan ons kinders die geleentheid te gee om vir hulleself op te staan en te s\u00ea: \u201cGee my nog \u2019n kans\u201d nie, is om hulle te laat sink in die lewe.<\/p>\n

       <\/p>\n

      Ons is ook oorbeskermend wanneer ons ons kinders nie die gevolge van hulle dade laat dra of re\u00ebls wat oortree is met dissipline opvolg nie. Die uitkoms van oorbeskermende ouers kan insluit:<\/p>\n

        \n
      1. Hierdie kinders ken en aanvaar nie gesag nie en het dikwels min respek vir volwassenes.<\/li>\n
      2. Hulle wil gerespekteer word, maar respekteer self niemand nie, want hulle is gewoond daaraan dat die lewe om hulle draai.<\/li>\n
      3. Hierdie kinders kan die vryheid wat hulle later in hulle lewe kry nie hanteer nie, want hulle ouers het altyd hulle lewe v\u00edr hulle bestuur.<\/li>\n
      4. Hulle glo hulle is altyd reg.<\/li>\n
      5. Hierdie kinders blameer ander vir hulle foute, want hulle het nie geleer om self verantwoordelikheid daarvoor te aanvaar nie.<\/li>\n
      6. Hulle raak so gewoond aan die uitgebreide ondersteuningstelsel wat hulle ouers se aandag, tyd en geld jaar n\u00e1 jaar vir hulle bied dat hulle nie daarvan kan loskom nie. Wanneer hulle al lankal onafhanklik moes gewees het, kan hierdie kinders nog nie op hulle eie voete staan nie.<\/li>\n<\/ol>\n

        “Red mense wat onwillig is om hulleself te help, en hulle sal soos \u2019n aansteeklike siekte aan jou klou.” – Mason Cooley<\/p>\n

         <\/p>\n

        Betrokkenheid se definisie is om te besef dat ouerskap \u2019n rol is wat ons nooit sal ontgroei nie<\/em><\/h4>\n

         <\/p>\n

          \n
        1. Ons is onbetrokke by ons kinders<\/strong><\/li>\n<\/ol>\n

          \u2019n Derde sinker is die omgekeerde van oorbeskerming, en dit is wanneer ons onbetrokke is by ons kinders. Betrokkenheid se definisie is om te besef dat ouerskap \u2019n rol is wat ons nooit sal ontgroei nie.<\/p>\n

          Onbetrokkenheid is om met ons lewe aan te gaan asof ons kinders dit nie vir altyd verander het nie. Daar sal nooit \u2019n tyd aanbreek dat ek en jy na iets in ons kinders se lewe kan kyk, terugtree en s\u00ea nie: \u201cDit het niks met my te doen nie.\u201d<\/p>\n

          Wanneer ons vir ons kinders s\u00ea: \u201cDit het by die skool gebeur en het niks met my te doen nie,\u201d of: \u201cJy is nou al ouer as 18 en moet dit self hanteer. Dit het niks met my te doen nie,\u201d laat ons ons kinders so weerloos dat hulle dalk nie die volgende uitdaging in die lewe sal wil aanpak nie. Hulle sal immers weet ons is nie daar om vir hulle hulp en raad te gee nie.<\/p>\n

          Onbetrokke ouers stel minimale eise en reageer ook weinig op hulle kinders. Die uitkoms van afwesige ouers kan insluit:<\/p>\n

            \n
          1. Hierdie kinders beleef in die uiterste gevalle verwerping omdat hulle ouers hulle nie genoeg vertroetel en versorg het nie.<\/li>\n
          2. Hulle soek aanvaarding in enige oop arms.<\/li>\n
          3. Volwassenheid gebeur met rukke en stote, want hierdie kinders moet onafhanklik optree, maar voel nog nie gereed nie.<\/li>\n
          4. Hierdie kinders voel hulle kan gesagsfigure nie vertrou nie omdat hulle nie \u2019n vertrouensverhouding met hulle ouers ontwikkel het nie.<\/li>\n
          5. Hulle besef nie dat hulle as mense waarde dra nie omdat hulle ouers se afwesigheid die boodskap oorgedra het dat hulle nie hulle ouers se tyd, moeite of liefde werd is nie.<\/li>\n
          6. Hierdie kinders beleef die w\u00eareld as \u2019n afsydige en eensame plek waarin elkeen na sy eie belange moet omsien \u2013 \u2019n \u201cdog eat dog<\/em>\u201d-w\u00eareld.<\/li>\n<\/ol>\n

            <\/h4>\n

             <\/p>\n

            Kinders wat grootword met minder is kinders wat moeiliker ondergekry sal word<\/em><\/h4>\n

            <\/h3>\n

             <\/p>\n

            4. Ons ly aan die droomkind-sindroom<\/strong><\/p>\n

            \u2019n Vierde sinker noem ek die droomkind-sindroom. Dit is wanneer ons as ouers \u2019n beeld van die ideale kind of droomkind het. Ons glo elke kind m\u00f3\u00e9t vyf of ses spesifieke eienskappe besit om sukses in die lewe te kan behaal. As een of twee van ons kinders nie meer as vier uit ses van die eienskappe het nie, is hulle nie \u2019n droomkind nie. Dit is baie onregverdig om ons kinders in \u2019n boksie te probeer indwing, en dit laat \u2019n kind vinnig sink in die lewe.<\/p>\n

             <\/p>\n

            5. Ons bederf ons kinders<\/strong><\/p>\n

            Die laaste sinker waarteen ek ouers wil waarsku \u2013 en jy mag my maar outyds noem \u2013 is om kinders te bederf. Hoe meer ons aan ons kinders gee, hoe meer verwag hulle van ons en die lewe en hoe moeiliker sal dit vir hulle wees om kop bo water te hou. Kinders wat grootword met minder is kinders wat moeiliker ondergekry sal word. Hulle bagasie is minder. Die skadelikste maniere waarop ons ons kinders kan bederf, sluit in:<\/p>\n