{"id":84961,"date":"2025-08-18T16:45:34","date_gmt":"2025-08-18T14:45:34","guid":{"rendered":"https:\/\/novanews.co.za\/rooirose\/?p=84961"},"modified":"2025-08-18T16:46:43","modified_gmt":"2025-08-18T14:46:43","slug":"besige-ouer-eensame-kind","status":"publish","type":"post","link":"https:\/\/novanews.co.za\/rooirose\/besige-ouer-eensame-kind\/","title":{"rendered":"Besige ouer, eensame kind"},"content":{"rendered":"

Gevoelens van isolasie en eensaamheid is die rede waarom vier duisend Britse kinders Childline verlede jaar gebel het. Selfs sesjariges, en kinders binne \u2019n liefdevolle gesin het die organisasie hieroor gekontak. \u2019n Tiener wat ingebel het, het ges\u00ea sy het daaraan gedink om haar lewe te be\u00ebindig omdat niemand werklik vir haar omgee nie en sy altyd eensaam is.<\/p>\n

Hedendaagse ouers moet maar soms die rieme dun sny om werk en gesin in 24 uur in te pas, en om vele take gelyktydig te doen het, helaas, die kenmerk van ons tyd geword.<\/p>\n

\u201cOuerskap op \u2019n drafstap kan kinders ge\u00efsoleerd laat voel,\u201d s\u00ea Nikki Bush, kreatiewe ouerskapkenner en skrywer. \u201cOns moderne leefstyl het tot gevolg dat ouers ongelukkig minder tyd met kinders op die mat speel en meer tyd in die motor deurbring.<\/p>\n

\u201cOuers is selde gefokus op die oomblik wanneer hulle by hul kinders is. Jy is dalk in liggaam teenwoordig, maar as jy nie op \u2019n emosionele vlak<\/strong> ook met jou kind interaksie het nie, is jy so goed soos afwesig.\u201d<\/p>\n

 <\/p>\n

Laat kinders jou help<\/strong><\/h4>\n

 <\/p>\n

As gehawende ouers hul kinders n\u00e1 werk oplaai, begin die tweede werk vir die dag. Dan is dit \u2019n groot versoeking om kinders voor die televisie, rekenaar of tablette te parkeer sodat jy ongehinderd kan kos maak en weer jou varkies op hok kry.<\/p>\n

\u201cHokaai,\u201d s\u00ea Nikki, \u201couerskap moenie net \u2019n aspek van ons lewe wees nie, dit moet deel wees van wie en wat ons is. Besige ouers loop gevaar om nie meer emosioneel in kinders te bel\u00ea nie, wat kinders ge\u00efsoleerd laat voel. Die geheim is om die doodgewone in iets besonders te verander.\u201d<\/p>\n

Nikki s\u00ea huistakies bied die ideale geleentheid om pret met jou kind te h\u00ea en hulle boonop te leer om selfstandig te wees en vaardighede te bemeester. Maak dit prettig sodat ongeduld en re\u00ebls nie die ervaring bederf nie.<\/p>\n

 <\/p>\n

\"\"<\/p>\n

 <\/p>\n

Ouerskap moet \u2019n avontuur wees<\/strong><\/h4>\n

 <\/p>\n

\u201cOuerskap is ook deel van jou eie ontwikkelingsreis en moet \u2019n avontuur wees. As jy \u2019n gewoonte daarvan maak om jou kinders in jou daaglikse ritme in te sluit, leer hulle selfdissipline en word dit makliker om dinge saam met hulle te doen. Onthou, die dinge wat jy kleintyd met hulle doen, is die boublokke vir \u2019n gesonde verhouding wanneer hulle tieners is,\u201d s\u00ea Nikki. Dis moeilik om \u2019n verhouding met \u2019n nukkerige 13-jarige te bou.<\/p>\n

\u201cKinders moet voel hulle het waarde en dat hulle deel van iets groter soos \u2019n gesin is. Moderne gesinne kom in vele vorms en gedaantes, maar dis belangrik dat jy \u2019n tree wegstaan van jou dolle program en beplan hoe jy koptyd vir jou kinders gaan inruim. Kinders weet wanneer jy emosioneel inkoop in tyd saam met hulle.\u201d<\/p>\n

\u2019n Ma vertel hoe haar vyfjarige haar oor die vingers getik het deur te s\u00ea: \u201cEk weet Mamma luister nie wanneer sy net so \u2018hmm\u2019 s\u00ea nie.\u201d Kleuters draai ook dikwels \u2019n ma se gesig met die handjies na haar toe om seker te maak sy luister.<\/p>\n

 <\/p>\n

Onthou om te luister<\/strong><\/h4>\n

 <\/p>\n

Kinders kan soos draaiorreltjies babbel wanneer jy hulle by die skool of elders oplaai. As jy moeg is, kan jy maklik afskakel en net so nou en dan \u201coe\u201d en ah\u201d sonder om \u2019n woord te hoor wat hulle s\u00ea.<\/p>\n

\u201cDis juis nodig om tussen die lyne te luister wanneer kinders met jou praat,\u201d s\u00ea Nikki. Soms is die belangrikste dinge die goed wat hulle ni\u00e9 s\u00ea nie. Dis \u2019n bewuste besluit om in die oomblik te wees en werklik te luister en waar te neem en jou tyd en ruimte met hulle te deel.<\/p>\n

Kinders het nodig om dinge te verbaliseer voor hulle sin kan maak van die w\u00eareld, en as julle saam in die motor is, het jy die ideale geleentheid. Maar as jy heeltyd selfoonoproepe beantwoord terwyl jy saam met die kinders in die motor is, of jou gedagtes worstel met dinge by die werk, is hierdie geleentheid verlore.<\/p>\n

 <\/p>\n

\"\"<\/p>\n

 <\/p>\n

<\/h4>\n

Ons jaag hul ontwikkeling aan<\/strong><\/h4>\n

 <\/p>\n

Kinders het tyd nodig om geborge te voel. Ouers is so gefokus om alles in die kortste moontlike tyd gedoen te kry dat hulle dieselfde van kinders verwag.<\/p>\n

\u201cKinders se ontwikkelingsproses is stadiger en hulle moet tyd kry om hul sukses te geniet en die vaardigheid vas te l\u00ea voor hulle \u2019n nuwe uitdaging aanpak. Ouers gun hulle nie die vreugde van oorwinning oor iets wat hulle vir die eerste keer reggekry het nie, maar por hulle dadelik na die volgende ding aan. Ouers doen dit met die beste bedoelings. Ons s\u00ea hulle is ryk aan liefde, maar arm in tyd. En elkeen se situasie en persoonlikheid verskil. Dus is dit belangrik dat jy dit vir j\u00f3\u00fa laat werk.\u201d<\/p>\n

 <\/p>\n

Die spelterapeut<\/strong><\/h4>\n

 <\/p>\n

Daar is wel net 24 uur in \u2019n dag, maar die tyd wat jy nou in jou kind bel\u00ea om sy emosionele beker te vul, kan \u2019n belangrike belegging wees in \u2019n tiener wat goed aangepas en geanker gaan voel.<\/p>\n

Elize Cronj\u00e9, \u2019n spelterapeut van Durbanville, verduidelik dat kinders tot op omtrent 13 speel as \u2019n taal gebruik om hul emosies te verbaliseer. \u201cDis hoekom dit belangrik is om op hul vlak te speel om hul emosionele stem te hoor. Daar is soveel druk op hedendaagse ouers om toe te sien dat hul kinders presteer, selfs op laerskool al, dat ouers se kontak met kinders grotendeels op skoolwerk en buitemuurse aktiwiteite gefokus is.<\/p>\n

\u201cHuiswerk slurp ouers se tyd saam met hul kinders op. In teorie moet ouers 15 minute per dag in \u2019n kind se w\u00eareld deurbring. Dit klink dalk min, maar vir \u2019n besige ouer met meer as een kind word dit byna onmoontlik. Ouers probeer vergoed deur geskenkies en eetgoed te koop, of kinders meer tyd voor skerms toe te laat.<\/p>\n

\u201cHou op om skuldig te voel,\u201d s\u00ea Elize. \u201cAl staan jy net 15 minute per week af, gaan dit genoeg wees. Maar dan moet dit tyd wees wat werklik saak maak. \u2019n Kind se \u2018w\u00eareld\u2019 is \u2019n plek waar die kind in beheer is en daar geen re\u00ebls vir die spel is nie. Dit beteken nie die afwesigheid van gewone dissipline nie, maar eerder dat die kind die vryheid moet h\u00ea om kreatief te wees. As sy die boom pers wil inkleur, moet jy nie reghelp nie. Vra haar wat se speletjie julle gaan speel. Moenie voorstelle maak nie. Sorg dat jy op die kind se fisieke vlak kom deur saam met haar op die vloer te sit of albei by \u2019n tafel.\u201d<\/p>\n

Elize waarsku ouers om nie in die strik te trap om jong kinders vir \u2019n fliek of melkskommel te neem vir hierdie spesiale tyd nie.<\/p>\n

\u201cDis net deur spel wat hul emosies uiting kry en hoewel julle albei pret gaan h\u00ea deur dinge saam te doen, gaan jy steeds geen insig in hul emosionele w\u00eareld kry nie. En die bonus is dat hierdie spelery, in teenstelling met fliek en melkskommels, nie \u2019n sent kos nie.\u201d<\/p>\n

 <\/p>\n

\"Pa_seun\"

Pixabay<\/p><\/div>\n

<\/h4>\n

Speel met hulle<\/strong><\/h4>\n

 <\/p>\n