{"id":82632,"date":"2025-07-01T16:32:48","date_gmt":"2025-07-01T14:32:48","guid":{"rendered":"https:\/\/novanews.co.za\/rooirose\/?p=82632"},"modified":"2025-07-01T16:38:42","modified_gmt":"2025-07-01T14:38:42","slug":"swanger-bo-40","status":"publish","type":"post","link":"https:\/\/novanews.co.za\/rooirose\/swanger-bo-40\/","title":{"rendered":"Swanger bo 40: Hou die volgende in gedagte"},"content":{"rendered":"

Talle bekendes het op die rype ouderdom van 38+ babas gekry en dit het dalk meegehelp om die idee van swangerskap bo veertig meer aanvaarbaar te maak. Hier het bekendes soos Therese Bam<\/strong>, Margit Meyer-R\u00f6denbeck<\/strong>, Debra Patta<\/strong> en Gillian van Houten<\/strong> digby of oor die ouderdom van veertig babas gehad. Die lys internasionale sterre wat ouer ma\u2019s is, is lank en sluit vroue soos Jane Seymour<\/strong> (45), Susan Sarandon<\/strong> (46), Cherie Blair<\/strong> (45), Nicole Kidman<\/strong> (41) en Madonna<\/strong> (41) in. Die 45 van vandag is immers die 35 van \u2019n dekade of twee gelede.<\/p>\n

 <\/p>\n

Dr. Johan van Rensburg<\/strong>, \u2019n ginekoloog in Johannesburg s\u00ea in hul praktyk is daar al meer veertigplussers wat om hulp kom aanklop om swanger te word.<\/p>\n

\u201cDaar is veral drie redes vir die verskynsel: Baie vroue wag dat hul werk- of finansi\u00eble omstandighede verbeter. Baie vroue trou laat, of vir \u2019n tweede keer en dan wil hulle en die nuwe eggenoot saam \u2019n baba h\u00ea. Daar is ook heelwat vroue bo veertig wat besluit hul kinders is groot en uit die hand, en nou is dit tyd vir \u2019n laatlammetjie. By ons praktyk is die afsnypunt vyftig. Daarna help ons nie graag \u2019n vrou om swanger te word nie.\u201d<\/p>\n

Die tendens om later kinders te h\u00ea neem w\u00eareldwyd stadig maar seker toe.<\/p>\n

Die toename in swangerskappe bo veertig is onder meer toe te skryf aan die nuwe, verbeterde infertiliteitsbehandelings. Wanneer \u2019n vrou die menopouse nader, stel die liggaam al minder eiertjies vry en word die kans al skraler om natuurlik swanger te word. Daarby is daar ook \u2019n afname in die gehalte van die eiers.<\/p>\n

\u201cWanneer \u2019n vrou gebore word, is al haar eiertjies reeds daar en word niks meer gemaak nie, die eierstokke stel dit bloot vry. Namate \u2019n vrou ouer word, verlaag die gehalte van die eiertjies en die kanse vir chromosoomafwykings raak groter. Wanneer \u2019n eiertjie met \u2019n chromosoomafwyking bevrug raak, sal die liggaam dit verwerp. Die enigste van hierdie chromosoomafwykings wat op \u2019n vaste basis nie verwerp word nie, is Downsindroom. Op veertig is die kanse vir \u2019n abnormale chromosoomtelling op \u2019n eiertjie reeds tagtig persent en is slegs een uit elke vyf eiertjies normaal. Daarom vat dit langer om op veertig natuurlik swanger te word,\u201d verduidelik dr. Van Rensburg.<\/p>\n

Hy s\u00ea die gehalte van die eiertjies neem af omdat hulle dan reeds veertig jaar in die eierstok sit en hulle is ook vir daardie tydperk aan dinge soos besoedeling, X-strale, medisyne en siektes blootgestel. By die meeste vroue is daar n\u00e1 veertig nog genoeg eiertjies oor wat bevrug kan word, maar dit neem beslis langer en vereis \u2019n aggressiewer behandeling waarin die vrugbaarheid beheer moet word. As dit nie aktief gedoen word nie, is die kans skraal om swanger te word.<\/p>\n

 <\/p>\n

Word \u2019n swangerskap anders benader wanneer \u2019n vrou bo veertig is?<\/strong><\/h4>\n

 <\/p>\n

Eers sal toetse gedoen word om seker te maak die vrou is gesond genoeg. Die toetse kan die moontlikheid van siektes soos diabetes en ho\u00eb bloeddruk uitwys. Nes \u2019n vrou van watter ouderdom ook al, is dit belangrik om so gesond moontlik te wees as jy swanger wil word.<\/p>\n

\u201c\u2019n Mens sal uit die aard van die saak versigtiger wees wanneer die toekomstige ma ouer as veertig is en daarom sal jy meer noukeurige toetse doen. Ons doen nie \u2019n roetine-amniosentese nie, want op twaalf weke kan jy met ander toetse soos sonarskanderings en bloedtoetse die onderskeid tussen ho\u00eb- en laerisiko-swangerskappe tref. Ons sal net \u2019n amniosentese op \u2019n ho\u00ebrisikoswangerskap doen. Die kans om n\u00e1 \u2019n amniosentese te aborteer is \u2019n half persent, en daarom doen jy dit nie sommer net vir die grap nie,\u201d s\u00ea dr. Van Rensburg.<\/p>\n

\u201cAs \u2019n vrou bo veertig swanger wil word, is dit miskien goed dat sy na \u2019n erkende infertiliteitskliniek gaan, want daar is die dokters toegerus en opgelei om haar te monitor en na al die gevaartekens te kyk. Gewone ginekolo\u00eb is knap mense, maar nie almal is altyd goed genoeg ingelig oor hierdie soort swangerskap nie. Ek beveel vroue aan om na \u2019n kundige te gaan wat presies weet hoe om jou vrugbaarheidsvlakke te meet, jou eierreserwes te meet en jou ovulasie te monitor. Wanneer jy dan swanger is en die gevaartyd (die eerste drie maande) is verby en die Downsindroom-toetse is gedoen, kan jy na jou gewone ginekoloog, teruggaan.”<\/p>\n

 <\/p>\n

 <\/p>\n

\"\"<\/p>\n

<\/h4>\n

Die moontlikhede<\/strong><\/h4>\n

 <\/p>\n

Nie alle veertigplussers sal hulp nodig h\u00ea om swanger te word nie, maar as jy nie vanself swanger word nie, en jy wil graag nog \u2019n baba h\u00ea, kan jy die volgende opsies oorweeg:<\/p>\n