Liewe kinders,<\/p>\n
Ek sien die gesiggie die eerste keer op Facebook (ja, ja, Mamma weet: sy\u2019s al w\u00e9\u00e9r op Facebook, kyk Pappa!). Die blonde, energieke meisiekind is weg. Almal soek. Vroegoggend skryf haar ma op die muur: My daughter, Klara (14), died tonight<\/em>.<\/p>\n Ek ken nie vir Klara nie. Haar ma Liesl G\u00f6ttert ook nie. Maar my vriende ken haar, en h\u00falle. Ek is weer nie by die huis nie. Sit op die hotelbed en huil oor haar en hare, oor my en myne. Begin dadelik planne maak om minder te reis, om meer by julle te wees, om te weet presies wat jul dink en doen, elke minuut van die dag. Die soveelste keer.<\/p>\n Facebook, weer. Ek skryf, tranerig: Iewers langs die pad het \u2019n vriendin (en ma van vyf) eendag vir my ges\u00ea sy het net een missie in die lewe: om kinders groot te kry wat weet wat om met hul emosies <\/strong>te maak. Nou word ons weer herinner hoe moeilik dit is. Klein, komplekse kinderkoppies. Hoe ouer hul word, dink ek, hoe meer het hul jou nodig.<\/p>\n Sy was siek, s\u00ea die een. \u2018n Tiener, sy\u2019s \u2019n tipiese tiener, s\u00ea \u2019n ander. Waar\u2019s haar ma? waag nog een. Wat maak dit saak? vra ek.<\/p>\n Die vraag hang in die lug terwyl ek leer, nee, w\u00e9\u00e9r leer: mense is moeilik, mense is gevaarlik, mense is lelik, mense is selfbehep, mense is . . .<\/p>\n Wat maak d\u00edt saak?<\/p>\n Liewe kinders, d\u00edt maak saak. Of die storm nou binne of buite jou woed, dit maak saak. Wat ander s\u00ea (voor \u00f3f agter jou), doen of dink, dit erken of nie, dit maak saak. Wat jy voel, nie voel nie, s\u00ea en nie s\u00ea nie, dit maak saak.<\/p>\n Dit is nie maklik nie. Dit maak saak.<\/p>\n Mamma?<\/p>\n Moenie vir my vra wat om te doen nie. Wat ek weet is dit: op 3 was Ouma en Oupa daar; op 13 Ouma, Oupa, jul ooms en \u2018n hand vol vriendinne; op 23 Ouma, Oupa, jul ooms, twee hande vol vriendinne, vriende en, amper vergeet ek, \u2018n onwillige boyfriend, dalk twee; op 33 Ouma, Oupa, jul ooms, jul tantes, te veel vriende en vriendinne om te tel en \u2018n baie gewillige Pappa. En nou, op 43, Ouma, Oupa, jul ooms, jul tantes, effe minder vriendinne en vriende, \u2018n paar kollegas, \u2018n steeds-gewillige Pappa \u00e9n die twee van julle.<\/p>\n D\u00edt, d\u00edt my kinders, maak saak. Vir almal en alles sien ek kans. Al bly mense moeilik, gevaarlik, lelik en selfbehep. Al woed die storm binne en buite, terwyl ander doen, dink, s\u00ea en jy en ek soms voel, en soms nie voel nie.<\/p>\n