Dit is vier maande n\u00e1 die gebeure van VLUG NA EGIPTE en die inwoners van Breipaal wat ons nou al goed ken, leef hulle lewens voluit. Die Haasbroeke is al ingeburger in die dorp, maar die vrede wat heers in die huis van Meester is nie wat dit wil voorgee om te wees nie.<\/p>\n
Lea (Leandie du Randt) het \u2019n wil van haar eie, en Charles (Marcel Schoeman) is nie heeltemal seker waarmee hy besig is nie \u2013 totdat Dot (Marion Holm) met \u2019n voorstel vorendag kom. Rooikappie (Diane Wilson) besluit dit is tyd om aan te beweeg van haar groot liefde, want sy het \u2019n man in die oog. Lena (Clara Joubert) is hard aan die werk en oefen, maar sonder die nodige ondersteuning, en met gedagtes wat haar siel kan verwoes, gaan dit maar moeilik.<\/p>\n
Daar is twee nuwe \u201cInkommers\u201d op die dorp: Woestyn (gespeel deur Adrian Alper) en Pieter Wolf (Andr\u00e9 Weideman). Beide van hulle gaan van die eerste dag af moet besef dat daar nie iets soos \u2019n \u2018geheim\u2019 op Breipaal bestaan nie, en dat die Karoliete onwrikbaar saamstaan wanneer hulle voel dis nodig.<\/p>\n
Daar is ook verrassende verwikkelinge in almal se lewens wat soms gepaardgaan met skokkende nagevolge \u2013 veral as ouderling Giel Swiegers (Eric Nobbs) betrokke is. Dot gaan nie stilletjies sit en toekyk hoe die hoofouderling homself \u2019n uitverkorene maak wat die wette van die kerk gebruik tot sy eie voordeel nie, maar danksy \u2019n paar interessante gesprekke lyk dit darem nie of sy alleen die stryd gaan moet voer nie. Dit wil voorkom of Troffel (Richard van der Westhuizen) se o\u00eb ook stadig maar seker oopgaan vir dit wat rondom hom aan die gebeur is. Die probleem is net dat Troffel se vrou \u2019n groot rol in sy lewe speel \u2013 en dalk \u2019n groter rol as die daaglikse bestuur van sy plaas.<\/p>\n
Dominee Karel Burger (Wilson Dunster) kan maar net nie die tuig neerl\u00ea nie, al hardloop die duiwel dan nou ook met \u2019n pak en das die hele dorp vol om seker te maak hy bring die prediker van stryk. Gelukkig is Dominee nie onder \u2019n kalkoen uitgebroei nie \u2013 hy lyk maar net soms so \u2013 en besef di\u00e9 gedugte digter dat wanneer daar \u2019n wil is, is daar \u2019n weg.<\/p>\n
Breggie (Kay Smith) is besig om haar boek nou met alle erns te skryf, siende dat sy nou baie stof tot nadenke het. Kortjas (Chris van Niekerk) moet gewoond raak aan die nuwe rigting wat sy lewe ingeslaan het \u2013 al is dit maar \u2019n alleen pad om te stap.<\/p>\n
Tony (Frank Opperman) is duidelik \u2019n man wat weet hoe om vyande van vriende te maak \u2013 of is dit dalk andersom? Sanna (Karen Wessels) begin ook baie meer standpunt inneem \u2013 maar is dit die regte standpunt wat sy ondersteun?<\/p>\n
Gertjie (Rolanda Marais) laat nie gras onder haar voete groei nie, maar die we\u00eb van die liefde is blykbaar bestem om besaai te wees met dubbeltjies. Di\u00e9 boerin sit dan nou ook met meer as een probleem op Daggafontein, en dit is nie net haar hardekwas pa wat die lewe vir haar al hoe moeiliker begin maak nie.<\/p>\n
Om dit alles te kroon, gaan die salige, stil lewe op die Paal ook nie meer vir te lank so stil wees nie – \u2019n moordenaar het \u2019n mes in vir \u2019n paar lede van die gemeenskap\u2026<\/p>\n