Danksy Jos se hulp is die opruimwerk by die salon binne twee dae afgehandel. Dit was met \u2019n heimlike plesier wat Arien gekyk het hoe die ou Jos weer in aksie is. Hy is in volle beheer van die situasie en sorteer dit met perfeksie uit. Hy gesels nie veel met haar nie, maar gee baie aandag aan die seuns. Soms, in siniese oomblikke, hou sy haar hart vas terwyl sy wonder hoe lank dit gaan duur voor hy weer uithaak en die kinders teleurstel?<\/p>\n
Die kli\u00ebnte wat geskenkbewyse ontvang het tydens die restourasiewerk aan die salon, staan behoorlik tou vir hul behandelings, maar wat Arien verras is die bosse blomme, kaartjies van bemoediging en bederfgoed wat hulle aandra. Deur die jare het haar kli\u00ebnte soos familie geword. \u2019n Soort sisterhood<\/em>. Sy ken baie van die vroue se wel en wee, maar sy het nog altyd haar eie lewe privaat gehou. Dit was nog altyd vir haar belangrik dat haar kli\u00ebnte haar salon as \u2019n\u00a0hawe kan beskou waar hul lywe en gees vertroetel word.<\/p>\n Teen teetyd kom sit Jana \u2019n\u00a0lywige koevert op Arien se lessenaar neer. Dit kom van Hendri. Daarin is \u2019n\u00a0lang brief van hoe spyt hy sedert hul jeugjare was dat hy haar deur sy vingers laat glip het. Hoe hy altyd na haar verlang het. Hy vertel ook van die lang pad wat hy saam met Lorna deur sielkundiges, psigiaters en klinieke gestap het. Hy sluit afskrifte van verslae van psigiaters in. Hy noem ook dat Lorna nou weer in \u2019n\u00a0senu-kliniek opgeneem is en dat Arien nie bang hoef te wees dat sy haar weer sal terroriseer nie.<\/p>\n Arien sit en wonder wat Hendri dink sy met hierdie inligting moet doen? Probeer hy haar oortuig dat dit wat Lorna oor sy gereelde ontrouheid ges\u00ea het nie waar is nie? Sy skryf dit aan vroulike instink toe, maar iets in haar s\u00ea die vrou wat op haar masseertafel gel\u00ea het, het die waarheid gepraat. Dalk is dit omdat sy weet hoe dit voel as jou man jou gereeld verkul dat haar simpatie meer by Lorna as Hendri l\u00ea. Wat haar verras, is die dik pak note wat Hendri in die koevert insluit om vir die skade aan die salon te betaal.<\/p>\n Sedert die \u201caanval\u201d voel Arien dat alle energie uit haar gedreineer is. Sy voel pap en lam. Koue sweet tap langs haar gesig af en sy is bewerig.<\/p>\n Jana is die een wat eerste opmerk dat daar fout is.<\/p>\n \u201cEk neem jou nou dokter toe. Jy lyk soos \u2019n\u00a0spook. Ek het vir Cari en Jos gebel en hulle sal die seuns versorg. Vandag luister jy vir my. Dokter Jansen het ges\u00ea ek kan jou dadelik bring.\u201d<\/p>\n Arien is te moeg om teen te stribbel. Sy stap gewillig saam met Jana.<\/p>\n Dok Jansen ondersoek haar deeglik en bel die Sandton-kliniek om vir haar \u2019n\u00a0bed te bespreek. Totale uitbranding, is sy diagnose.<\/p>\n \u201cJy het jou energie te lank getap en nou is jou petroltenk leeg. Dit gaan \u2019n\u00a0rukkie neem om jou op te bou. \u201c<\/p>\n Arien ken die ouer man al jare. Hy is soos \u2019n\u00a0Pa-figuur vir haar en hy ken haar geskiedenis met Jos.<\/p>\n Voor sy nog verder kan dink, l\u00ea sy in \u2019n\u00a0hospitaalbed met \u2019n\u00a0drup aan die arm. Sy moet ten minste vir tien dae vol medikasie gepomp word en bedrus kry voor Dok Jansen haar \u201cvry gaan laat\u201d, spot die ou man goedig. Hy re\u00ebl ook dat Gerhard gereeld \u2019n\u00a0draai maak \u201com jou koppie net weer reg te ruk.\u201d<\/p>\n Cari daag op met \u2019n\u00a0sak splinternuwe nagklere en \u2019n\u00a0toiletsak met lekkerruikgoed, spuite en sepe wat haar kamer met \u2019n\u00a0hemelse waas vul. Daar is \u2019n\u00a0briefie van die seuns en \u2019n\u00a0bossie blomme wat sy kan sien Jos sommer uit haar eie tuin gepluk het. Tipies Jos het hy sommer \u2019n\u00a0bladsy uit \u2019n\u00a0notaboek geskeur en \u2019n\u00a0kort boodskappie geskryf (waarskynlik onder Cari se dwang). \u201cWord gou beter. Als aan die tuisfront is ok. Jos.\u201d Arien glimlag. Sy dink aan die pragtige ruiker waarmee Jos een keer by die huis opgedaag het. Sy was baie agterdogtig en het eers gedink hy het iets verkeerd gedoen. Maar hy het nie. Hy het sommer openlik erken die blomme is eintlik vir sy sekretaresse gestuur en dat sy die Vrydag afgeneem het en hy was bang die blomme vrek die naweek op kantoor. \u201cToe dog ek jy kan darem die blomme vir die naweek waardeer.\u201d<\/p>\n Jana hou haar die volgende dae op hoogte van sake wat vlot verloop by die salon.<\/p>\n \u201cDaai man bel aanhoudend, maar ek weier om vir hom te s\u00ea waar jy is.\u201d<\/p>\n Die wyse Jana het die nuwe verwikkeling in die situasie met Hendri dus deeglik opgesom. Jana gee nie meer om of Hendri na Daniel Craig lyk nie. Sy wil die man nie weer naby haar baas h\u00ea nie. Arien het Jana se oordeel nog altyd vertrou en dit laat haar beter voel dat sy nie so simpatiek teenoor Hendri en sy dik koevert met verslae oor Lorna se geestessiekte voel nie.<\/p>\n Die week gaan verby in \u2019n\u00a0waas van kalmeermiddels wat haar baie laat slaap en drups wat haar moe\u00eb lyf vol energie pomp. Sy weet Gerhard het \u2019n\u00a0hele paar keer langs haar bed kom sit, maar sy kan nie onthou waaroor hulle gepraat het nie. Die kinders en Cari was \u2019n\u00a0paar keer daar, maar Jos het net so nou en dan \u2019n\u00a0briefie uit sy notaboek saamgestuur (Arien weet Cari sit agter die briefies. Jos is baie versigtig vir Cari). Die briefies is almal byna saaklik. \u201cHoop jy rus lekker, Jos\u201d. \u201cDie swembad is weer blou, Jos.\u201d. \u201cEk het jou simpel hond laat skeer want sy was vol koeke, Jos.\u201d en \u201cEk los \u2019n\u00a0bak Hagen Daz-roomys en sjokoladesous in die yskas vir as jy uitkom. Die seuns het belowe hulle sal nie daaraan raak nie, groete, Jos.\u201d<\/p>\n Teen die Vrydag word sy wakker na haar oggendslapie met die geur van wit rose wat die kamer vul. Sy weet dadelik dit kom van Hendri. Hy het haar in die hospitaal opgespoor. Sy wil nie die kaartjie lees nie. Ondanks al die drups en rus het sy steeds nie krag vir Hendri en sy verduidelikings nie. Sy voel steeds hy moes van die begin af met haar eerlik gewees het.<\/p>\n Na nog \u2019n\u00a0paar uur se slaap is sy bewus van iemand langs haar bed. Dis Lorna. Arien voel hoe die paniek deur haar are vloei.<\/p>\n Lorna neem haar hand.<\/p>\n \u201cMoenie vir my bang wees nie, Arien. Ek het net kom kyk of jy ok is. Ek weet nie, maar jy is anders as die ander. Jy verdien nie iemand soos Hendri nie. Ek voel ek moet jou beskerm teen hom.\u201d<\/p>\n Arien sluk die droogheid in haar keel weg.<\/p>\n \u201cJy het my salon vernietig.\u201d<\/p>\n Sy ruik Lorna se Michael Kors-parfuum hier naby haar gesig.<\/p>\n \u201cEk weet wat by jou salon gebeur het en ek weet Hendri probeer jou oortuig dit is ek wat dit gedoen het. Het hy onlangs vir jou \u2019n\u00a0pak sielkundige verslae oor my gestuur? Ek het so gedink. Dis wat hy altyd doen. Ek ken al sy modus operandi. Ek wil jou net waarsku, moenie vir sy emosionele manipulasie val nie. Jy is vir hom \u2019n\u00a0onweerstaanbare speelding omdat jy teenstand bied. Die feit dat jy nog nie ten volle aan hom oorgegee het nie, maak jou vir hom\u2019n prooi wat hy obsessief gaan jag. Ek moet jou waarsku, hy gee nie maklik op nie. Hy sal eers tevrede wees as jy in sy mag is. Hy maak so met ons almal. Met my en met sal sy \u2018prinsesse\u2019. Hy soek ons met die hand uit. Hy kyk uit vir kwesbare vroue soos ek en jy. Dan begin hy met sy spel. Hy trek jou stadig in sy web.\u201d<\/p>\n Arien voel skielik helder wakker. Sy voel sy moet na elke woord luister wat Lorna uiter.<\/p>\n \u201cHy het my altyd vertel jy was sy eerste prinses. Daarom was ek verras toe ek agterkom daar is iets aan die gang tussen julle. Ek dink hy het altyd gehoop jy kom terug na sy web.\u201d<\/p>\n Lorna vertel hoe sy in Hendri se web vasgevang geraak het.<\/p>\n \u201cEk was \u2019n\u00a0vaal, mollige meisietjie. Maar Hendri het die potensiaal in my gesien. Hy het my begin oortuig ek is sy prinses. Hy het my trouens in sy prinses verander. Hy het saam met my gedraf en ons was saam op \u2019n\u00a0gesonde eetprogram. Toe begin sy \u2018geskenke\u2019. Vir een verjaarsdag is my neus reggemaak. Vir ons eerste huweliksherdenking is my borste vergroot. Gaandeweg het Hendri my lewe begin regeer. Ek was nie meer sy prinses nie. Ek was soos sy gevangene. Ek moes elke dag ure in die gimnasium oefen. Ek het van prote\u00efenskommels geleef. Elke oggend het hy my klere en grimering vir die dag uitgepak.\u201d<\/p>\n Arien weet elke woord wat Lorna uiter, is waar. Sy kry koue rillings as sy ou gedragspatrone van Hendri uit hulle jeug onthou. Hy het graag vir haar voorgeskryf wat om aan te trek. Hy het vir haar naellak en grimering aangedra. En lyfklewende toppies wat haar ma ontstel het. Hendri het haar hart destyds gebreek, maar nou weet sy dit was haar redding. Sy het \u2019n\u00a0lewe van hel ontsnap. Sy kon dieselfde pad as Lorna geloop het. Sy weet nou sy het so reg in Hendri se hand gespeel toe sy hom weer gekontak het.<\/p>\n \u201cJy was vir Hendri \u2019n\u00a0onafgehandelde projek. Hy het my dikwels van jou vertel. Hy het ges\u00ea jy is die een meisie wat hy nie ten volle in sy mag kon kry nie.\u201d<\/p>\n Lorna vertel hoe Hendri mettertyd nie meer tevrede was met net een \u201cslaaf\u201d nie.<\/p>\n \u201cHy het die een na die ander vrou uitgesoek en haar begin manipuleer en verander. Hy vertel hulle eers hoe onweerstaanbaar hulle is, dan begin sy \u2018geskenke\u2019 aan sy nuwe prinses. Hy laat jou borste vergroot, maak jou tande en neus perfek, hy laat jou ure oefen. Ek het foto\u2019s van al sy slagoffers?\u201d<\/p>\n Arien knik haar kop gewillig en skuif reg terwyl Lorna die foto\u2019s een vir een vir haar aangee. Haar hele lyf begin bewe as die pak van tien vroue se foto\u2019s op haar bed uitgesprei l\u00ea. Hulle lyk almal soos klone van Lorna. Dis asof Hendri \u2019n\u00a0dr. Frankenstein-sindroom het. Hy wil die perfekte vrou skep.<\/p>\n Trane loop vryelik oor Lorna se wange.<\/p>\n \u201cAl daardie sielkundige verslae wat Hendri vir jou oor my gestuur het. Dis alles waar. Ek het by tye heeltemal in duie gestort en by tye stapelgek opgetree. Maar glo my, dis hy wat my daarheen gedryf het. Al hierdie vroue wat jy hier sien. Hulle was elkeen al een of ander tyd in \u2019n\u00a0senu-kliniek. Dis deel van Hendri se spel. Hy speel met jou kop en oortuig jou en ander om jou dat jy mal is. Maar eintlik … en Arien jy moet nou baie mooi na my luister, eintlik is dit Hendri wat mal is. Hy is \u2019n\u00a0narssis. Hy wil jou beheer en omvorm. Hy wil h\u00ea ek en jy en al hierdie vroue moet hom aanbid. Maar jy, ek het daardie dag in jou salon geweet jy is anders. Ek het gevoel ek moet jou help om nie \u2019n\u00a0kloon van my en die ander te word nie.\u201d<\/p>\n Dit neem Arien \u2019n\u00a0rukkie om al die inligting na die regte kanale in haar gemoed te stuur.<\/p>\n \u201cEn my salon? Hoekom het jy my salon vernietig?\u201d<\/p>\n Lorna neem beide Arien se hande in hare.<\/p>\n \u201cDink jy regtig dit is ek wat al daardie skade aangerig het? Het Hendri vir jou \u2019n\u00a0pak note gestuur om die skade te herstel? Ja? Dis hoe hy werk. Dit maak hom die held wat jou kom red uit die kloue van sy mal vrou.\u201d<\/p>\n <\/p>\n","protected":false},"excerpt":{"rendered":" Hoofstuk 18 van ons vervolgverhaal, Wipkar. Geskryf deur Martie Swanepoel. Foto: Pixabay<\/p>\n","protected":false},"author":8,"featured_media":65029,"comment_status":"open","ping_status":"closed","sticky":false,"template":"","format":"standard","meta":{"_acf_changed":false,"footnotes":""},"categories":[15260,15259,43452,3476],"tags":[1518,4119,12985],"class_list":["post-72350","post","type-post","status-publish","format-standard","has-post-thumbnail","hentry","category-use-only-text-and-body-images","category-caxton","category-lees","category-ontspanning","tag-kortverhaal","tag-vervolgverhaal","tag-wipkar"],"acf":[],"yoast_head":"\n