Die salon is vol bespreek. Arien is dankbaar dit lei haar gedagtes af van haar effe onstuimige lewe. Sedert Hendri se laaste besoek boer hy in haar gedagtes. Sy kwesbaarheid het ou emosies in haar wakker gemaak. Arme Hendri. Hy lyk so vol selfvertroue. Wys jou net. Hy het materieel alles wat sy hart begeer, maar sy huwelik is vol hartseer. As \u2019n vrou soos Lorna maar geweet het wat \u2019n\u00a0onvervulde huwelik regtig is. Iemand soos Lorna moet bietjie \u2019n\u00a0paar maande saam met \u2019n\u00a0verslaafde soos Jos bly. \u2019n\u00a0Man wat nie altyd saans huis toe kom nie en sy vermaak by ander vroue soek. Hoe onregverdig is die lewe? As Lorna maar besef hoe gelukkig sy is dat haar man hard werk en darem elke aand by die huis is.<\/p>\n
Jos hou al vir weke sy afstand want hy is diep seergemaak dat sy ondanks sy nuwe rehabilitasieprogram steeds met die egskeiding voortgaan. Die seuns\u00a0 is baie rustiger sedert hulle begin aanvaar het dat \u2019n\u00a0egskeiding mettertyd vir hulle \u2019n\u00a0meer stabiele huishouding gaan gee.<\/p>\n
Arien is besig met \u2019n\u00a0groep vroue wat hulself saam kom bederf vir hul skool se veertigjarige re\u00fcnie. Gesigbehandelings, masseersessies en mani- en pedikure is ingeryg in elke minuut van die dag.<\/p>\n
Na \u2019n\u00a0paar strawwe ure\u00a0kan Arien uiteindelik self haar voete in \u2019n\u00a0masserende voetspa laaf. Sy is gedaan, maar die oomblik toe Jana die koppie tee langs haar neersit, weet sy daar is \u2019n\u00a0groot probleem. Dit is die laaste ding waarvoor sy vandag lus is.<\/p>\n
\u201cJong , hier is \u2019n\u00a0huilende vrou in die voorportaal. Sy smeek dat ons haar inpas vir \u2019n\u00a0troetel-sessie. Siestog, sy het erge huweliksprobleme en sy s\u00ea ons sal haar lewe red as sy vir \u2019n uur net kan ontspan.\u201d<\/p>\n
Arien het dadelik begrip vir die vrou se probleem. Sy het dikwels self gevoel sy het \u2019n\u00a0bederfsessie nodig as haar lyf styf getrek is van spanning.<\/p>\n
\u201cDie probleem is net dat sy wil h\u00ea jy moet haar behandel. Iemand het jou by haar aanbeveel en sy voel net jy sal haar hartseer en spanning kan weg masseer. Ag, kom ons help die arme vrou. Sy is in \u2019n\u00a0helse toestand. Ek belowe jou as jy klaar is neem ek jou onder hande op die masseertafel.\u201d<\/p>\n
Die vrou sit in \u2019n\u00a0beteuterde bondeltjie in die ontvangsarea. Sy snuit kort-kort haar neus in \u2019n\u00a0snesie en Arien kan sien haar neus is al bloedrooi van die huil.<\/p>\n
Jana dra sommer vir die vrou ook \u2019n\u00a0koppie tee aan. Sy hou ook \u2019n\u00a0bordjie sjokoladekoekies na die vrou uit.<\/p>\n
\u201cEet, jy het dit nodig. Daarna sal Arien jou van al jou sorge laat vergeet.\u201d<\/p>\n
Arien het al \u2019n\u00a0paar keer \u2019n\u00a0snikkende vrou op haar masseertafel gehad. Sy hou die snesies byderhand en saam met die strelende musiek gesels sy sag met haar kli\u00ebnt.<\/p>\n
Vir die eerste paar minute huil die vrou onbedaarlik. Arien gebruik mandaryn-olie omdat dit \u2019n\u00a0kalmerende effek het. Sy kan voel die vrou se skouer- en nekspiere is soos staalkabels. Sy werk sagkens oor die gespanne spiere tot sy voel die spasma begin effe skiet gee.<\/p>\n
Die vrou het \u2019n\u00a0pragtige sonbruin lyf, merk sy op. Hoe hartseer dat \u2019n\u00a0vrou met so \u2019n\u00a0lieflike lyf ongelukkig getroud is. Dit voel skielik of almal om haar ongelukkig getroud is.<\/p>\n
\u201cJy sal nou begin ontspan. Luister na die musiek. Laat jou gedagtes ver weg dwaal na die gelukkigste plek waar jy al ooit was.\u201d<\/p>\n
Die vrou huil sag.<\/p>\n
\u201cMy wittebrood in Thailand. Dit was idillies. Ons was so verlief. Toe het ek gedink niks sal ons huwelik ooit kan benadeel nie.\u201d<\/p>\n
Sy huil skielik harder.<\/p>\n
\u201cWeet jy hoe voel dit as jy na \u2019n\u00a0paar jaar nie meer goed genoeg is nie?\u00a0 Ek het gesorg dat my lyf perfek is. Ek het op slaaiblare geleef en elke dag geoefen. Maar dit was nie goed genoeg vir hom nie. Hy het altyd \u2019n\u00a0vrou gekry wat beter afleiding is as ek.\u201d<\/p>\n
Arien troos en gee neutrale antwoorde. Sy weet dit sal onprofessioneel wees om haar eie persoonlike lewe by die gesprek in te bring. Maar sy verstaan die vrou se hartseer. Sy weet hoe dit voel as jou man vermaak soek in die arms van \u2019n\u00a0ander vrou.\u201d<\/p>\n
Sy pak die louwarm klippe al langs die vrou se rugstring.<\/p>\n
\u201cDie gewig van die klippe en die hitte sal jou lyfseer weg streel. Voel jy die sagte rondheid van die klippe? Adem die aromatiese olies in. Ek wil h\u00ea jou lyf en gees moet rus. Vergeet van alles. Op hierdie oomblik is dit net jy wat saak maak. Wees selfsugtig en dink net aan jouself en wat jou gelukkig sal maak.\u201d<\/p>\n
Die vrou snuit haar neus en draai haar kop skuins in Arien se rigting. Haar o\u00eb is powwerig gehuil.<\/p>\n
\u201cAl wat my gelukkig sal maak, is dat my man ander vroue sal uitlos. Kyk na my. Is ek fisiek so afstootlik dat hy bevrediging by ander vroue moet soek?\u201d<\/p>\n
Arien kyk na die vrou se sy gladde, sellulietlose bene, haar gespierde agterstewe en ferm rug. Sy het perfekte borste en geen los nekvelle nie. Daar is hier en daar tekens van kosmetiese hulp, maar die vrou het \u2019n\u00a0pragtige lyf.<\/p>\n
\u201cEk wens ek het soos jy gelyk. Ek het selluliet aan my bene en rekmerke op my maag na my babas. Jou lyf is pragtig en jy hoef nie te voel daar is iets met jou verkeerd nie.\u201d<\/p>\n
Die vrou slaan met haar vuiste op die masseertafel.<\/p>\n
\u201cMaar ek is nie perfek nie! Ek is nie goed genoeg vir hom nie! Hy soek altyd ander vroue wat beter is. Hy vertel my gereeld wat hulle alles het wat ek nie het nie. Partykeer is dit geleerdheid, soms avontuurlus, baie keer kennis van seksuele bevrediging wat ek blykbaar nie het nie. Ek het al alles probeer om by te hou. Ek het studeer, kursusse bygewoon, my borste laat groter maak, my neus laat reguit maak. Ek is net nooit goed genoeg nie.\u201d<\/p>\n
Na \u2019n\u00a0lang sessie begin die vrou uiteindelik kalmeer. Sy l\u00ea doodstil en haal diep asem. In een stadium dink Arien selfs sy is aan die slaap.<\/p>\n
Op \u2019n\u00a0vreemde manier help die terapie aan die bedroefde vrou Arien ook ontspan. Dit laat haar voel sy is nie die enigste een wat \u2019n\u00a0mislukking van \u2019n\u00a0huwelik het nie.<\/p>\n
Die vrou bind na die sessie haar blonde hare in \u2019n\u00a0poniestert en stap grimeringloos voorportaal toe.<\/p>\n
\u201cDankie. Ek voel beter. Ek het gekry waarna ek gesoek het.\u201d<\/p>\n
Arien pak \u2019n\u00a0mandjie vol bederfgoed en hou dit na die vrou uit.<\/p>\n
\u201cVandag se sessie is op my. Gaan bederf jouself. Jy verdien dit. Moenie toelaat dat jou man jou laat voel jy is nie goed genoeg nie. Jy is. Onthou dit.\u201d<\/p>\n
Lank na die vrou by die salon uit is sit Arien nog in haar kantoor en dink oor die vrou se bedroefde geween tydens die massering. Sy het lanklaas so \u2019n\u00a0gebroke mens gesien.<\/p>\n
Net voor sy die salon se deur agter haar toetrek, zirrr haar selfoon se WhatsApp-funksie.<\/p>\n
Sy ken nie die nommer nie.<\/p>\n
\u201cDankie vir die heerlike massering. Ek weet nou hoekom jy die nuwe afleiding in Hendri se lewe is. Jou hart is so sag soos jou hande. Ons sal mekaar weer sien, Lorna.\u201d<\/p>\n","protected":false},"excerpt":{"rendered":"
Hoofstuk 16 van ons vervolgverhaal, Wipkar. Geskryf deur Martie Swanepoel. Foto Pixabay<\/p>\n","protected":false},"author":8,"featured_media":65029,"comment_status":"open","ping_status":"closed","sticky":false,"template":"","format":"standard","meta":{"_acf_changed":false,"footnotes":""},"categories":[43452,3476],"tags":[1258,1518,4119,12985],"class_list":["post-71249","post","type-post","status-publish","format-standard","has-post-thumbnail","hentry","category-lees","category-ontspanning","tag-lees","tag-kortverhaal","tag-vervolgverhaal","tag-wipkar"],"acf":[],"yoast_head":"\n