{"id":68551,"date":"2017-03-22T09:24:58","date_gmt":"2017-03-22T07:24:58","guid":{"rendered":"http:\/\/novanews.co.za\/rooirose\/?p=68551"},"modified":"2017-07-13T12:58:07","modified_gmt":"2017-07-13T10:58:07","slug":"reine-swart-oor-branderplankry-portland-en-haar-droomrol","status":"publish","type":"post","link":"https:\/\/novanews.co.za\/rooirose\/reine-swart-oor-branderplankry-portland-en-haar-droomrol\/","title":{"rendered":"Reine Swart oor branderplankry, Portland en haar droomrol"},"content":{"rendered":"

Vertel vir ons meer van jou karakter, Miemie, in Kampterrein<\/em>. Uit die lokprent kom ons agter dat sy \u2019n bietjie meer glamorous<\/em> is as die ander en definitief ook elke kampeerder se droommeisie is.\u00a0<\/strong><\/p>\n

Miemie is nie die tipiese kampeerder nie – sy spandeer die meeste van haar tyd aan haar hare en grimering. Dus is sy in vergelyking met die ander kampeerders nie so behulpsaam nie (sy kan basies nie \u2019n tent opslaan nie). Sy is sosiaal en hou vreeslik baie van aandag. Miemie is baie intelligent, maar sy hou meer daarvan om aandag te trek met haar voorkoms. Sy is besig om te studeer en toon min respek vir haar ouers. Ek dink nie Miemie is \u2019n kampeerder se droommeisie nie, want sy maak nie kos nie, was nie skottelgoed nie en sal beslis nie help uitpak nie. Miemie is wel \u2019n goeie vriendin vir haar mede-kampeerders.<\/p>\n

Hoe was dit vir jou op stel?\u00a0<\/strong><\/p>\n

Luhann Jansen is \u2019n baie talentvolle regisseur wat presies weet wat hy wil h\u00ea. Dit maak dit lekker en makliker vir die akteurs, want die boodskap wat hy oordra is duidelik. Dit was heerlik op stel en ons het baie gelag. Ek het meestal saam met Edrien Erasmus, Jurgen Helberg en Ruan Wessels gewerk. Al drie van hulle het lekker karakters gehad en ek kon soveel leer by elkeen. Ek kan wel bys\u00ea dat die hele span wat betrokke is by Kampterrein<\/em>, \u2019n ongelooflike vriendelike en kunstige groep mense is om mee saam te werk.<\/p>\n

Jy moes vir Die Pro<\/em> leer branderplank ry, reg? Was daar iets aan jou karakter in Kampterrein<\/em> wat jy moeilik gevind het om toe te pas?<\/strong><\/p>\n

Ja, ons moes destyds leer branderplankry vir Die Pro<\/em> en ek beveel dit beslis vir ander mense aan. Ek moes nie nuwe vaardighede leer vir Kampterrein<\/em> nie. Miemie dra baie minder klere as wat ek doen, maar dis darem nou nie s\u00f3 erg nie.<\/p>\n

Soos ons verstaan, is jy tans in Los Angeles.\u00a0Waarmee is jy besig?\u00a0<\/strong><\/p>\n

Ek en my man, Xander, bly op die oomblik in die idilliese Portland, Oregon. Ons het pas getrek en probeer nog ons voete vind. Portland is \u2019n vriendelike “groen” stad met sneeuberge aan die een kant en die strand aan die ander kant. Ons probeer nuwe dinge soos ski en stap deur die woude. Ek is op die oomblik besig\u00a0met film-kursusse om die industrie en mense in Portland te leer ken. Ek het in \u2019n reeks films hoofrolle of bykarakters vertolk wat vanjaar of volgende jaar in teaters sal verskyn: Nul is Nie Niks Nie<\/em><\/strong> (kykNET), Van der Merwe <\/em><\/strong>(Boomtown Boys), Siembamba<\/em><\/strong> (Phoenix Films) en The Empty Man<\/em><\/strong> (20th Century Fox). Baie Suid Afrikaanse akteurs en aktrises het rolle vertolk in National Geographic se TV-reeks Origins<\/em><\/strong> wat tans wys, waarin ek die rol van \u2019n Nebraska-boeremeisie vertolk het.<\/p>\n

Jy het \u2019n graad in Industri\u00eble\u00a0Ingenieurswese aan die Universiteit van Pretoria verwerf. Hoe het jy\u00a0toe op die ou einde in die filmbedryf beland?<\/strong><\/p>\n

Ek wou oorspronklik in filmproduksie\u00a0werk en wou die industrie met iets buitengewoon betree. Dus het ek \u2019n graad gaan doen wat oor universele prosesse gaan. Die idee het gekom toe my tannie (Sonja) my vertel het van \u2019n Vrystaatse seun met \u2019n graad in Elektriese Ingenieurswese\u00a0wat vir Steven Spielberg werk. Ek het op universiteit in \u2019n advertensie gespeel en agtergekom dis wat ek graag wil doen. Ek geniet die filmbedryf ongelooflik baie en sal graag in die toekoms ook meer ervaring wil opdoen agter die skerms.<\/p>\n

Jy was\u00a0al in \u2019n groot verskeidenheid TV-programme, films en advertensies (waarin onder meer Bloedbroers, Villa Rosa en ook jou eerste hoofrol\u00a0in 2015 in\u00a0Die Pro). Hoe voel dit vir jou om jouself in films en op TV te sien?<\/strong><\/p>\n

Dis nie regtig vir my lekker om na my eie werk te kyk nie, ek geniet die werk self, maar is krities oor my eie werk. Dis vir my baie lekkerder om ander mense se films en TV-reekse te kyk. As ek in my hart voel dat die toneel goed was, dan is ek tevrede. Dit is tog nodig om soms te kyk sodat mens kan verbeter en om sekere dinge volgende keer anders te doen.<\/p>\n

Hoe voel dit om in\u00a0\u2019n nuwe karakter se skoene te klim?\u00a0<\/strong><\/p>\n

Dit voel vir my soos \u2019n voorreg en ek is altyd gek oor my eie karakter, hetsy sy die antagonis of protagonis is. Die navorsing en respek wat mens vir verskillende mense kry, is vir my \u2019n besonderse deel daarvan, want elke mens\/karakter is uniek.<\/p>\n

Wat is die een les (motto) wat jy regdeur jou lewe saam met jou sal dra?<\/strong><\/p>\n

Elke liewe mens is net so spesiaal soos jy, van die boemelaar op die hoek tot die miljoen\u00ear in sy vliegtuig.<\/p>\n

Ek wil nie mense “aanbid” nie en ek wil ook nie neerkyk op enige iemand nie. Deur God se o\u00eb is ons almal gelyk.<\/p>\n

As vierjarige dogtertjie het jy altyd\u00a0gesing: “Ek is Cinderella. Ek is \u2019n moviestar<\/em>!” Vandag is jy werklik \u2019n ster en daarom sal ons graag wil weet wat jou droomrol is. <\/strong><\/p>\n

Gits, ja daai deuntjie. My droomrol is eerder droomrolle, want ek wil \u2019n verskeidenheid doen, van die malletjie tot \u2019n seerower. Solank elke rol \u2019n uiterste is.<\/p>\n

Laastens wil ons by jou weet teenoor wie jy nog sal wil speel?\u00a0<\/strong><\/p>\n

Sjoe, daar is so baie om van te kies, maar as ek nou een moet noem is dit Neels van Jaarsveld. In my opinie is hy een van ons land se beste akteurs en mens kan baie by hom leer. Internasionaal sal ek graag teenoor\u00a0Lupita Nyong’o wil speel, want sy gee altyd \u2019n intense optrede en weereens wil ek leer.<\/p>\n

Kampterrein <\/em><\/strong>word Vrydag, 24 Maart 2017 landswyd vrygestel.<\/p>\n

Kyk hier na die amptelike lokprent<\/h4>\n