Arien was \u2019n hele dag rekenaarvry terwyl sy haar lyf laat koester het en in Sandton City die verbode kredietkaart rondgeswaai het. Dit het groot inspanning geverg om nie haar e-pos oop te maak nie en sy het trots aan Cari gerapporteer dat sy by haar leermeestres se instruksies hou.<\/p>\n
Die hele Hendri-ding is vir Cari \u2019n\u00a0groot erns. Sy neem haar rol as raadgewer van Arien se liefdesake asook haar taak as dieetkundige ernstig op. Die son het skaars opgekom of haar eerste WhatsApp aan Arien kom deur: \u201cOnthou jou suurlemoensap en jou groen kragsap! Het jy toe die boek gelees?\u201d<\/p>\n
Die kragsap het Arien \u2019n\u00a0paar keer deur die nag opgejaag. Sy het stilweg geprotesteer dat die aaklige konkoksie haar vet beter wegsmelt want die lyding is darem erg. Cari se opdrag is dat sy nie elke dag op die skaal mag klim nie. Dis glo ontmoedigend. Van die kenners wat sy geraadpleeg het, s\u00ea mens moet net elke dag na jouself in die spie\u00ebl kyk en jy sal gewig verloor.<\/p>\n
\u201cEk dink ek gaan sterf van ontbering nog voor ek 10 kg verloor,\u201d het Arien drie-uur die oggend haar selfaangestelde dieetkundige per WhatsApp ingelig, maar Cari se ondersteuning tydens die nagtelike lyding was taamlik onsimpatiek: \u201cHou tog op kla en dink aan die kilogramme wat jy verloor as jy so badkamer toe hol! En los my nou ek wil slaap!\u201d<\/p>\n
Vir die voorgeskrewe oggend-draffie het Arien byna nie energie gehad nie. Sy kon voel hoe haar maag gor en draai soos die groen sap met elke tree haar spysverteringstelsel ontstel. \u201cDit beter werk, dit beter werk,\u201d het Arien tree vir tree aan haarself die mantra van die dik desperate vrou herhaal.<\/p>\n
***<\/p>\n
Zirrrwhieeeee! Uitgeput en so rooi soos \u2019n\u00a0beet staan sy na die drafsessie in die kombuis om haar towersap te meng. Die seuns se monde hang oop oor hul ma se nuwe drafgier en die groen sap. Arien hoor hoe hulle vir mekaar fluister: \u201cMa het dit nou finaal verloor.\u201d<\/p>\n
Selfs Jos het ook agtergekom iets is aan die gebeur want elke oggend word sy babalaasslaap met \u2019n\u00a0zirrrwhiiee! onderbreek. Nie dat sy dink hy sal \u2019n\u00a0ooglid knip as hy hoor sy beplan om saam met \u2019n\u00a0ander man te gaan koffie drink nie. Hy sal dit waarskynlik verwelkom dat iets haar besig hou terwyl hy sy lewe geniet.<\/p>\n
Na \u2019n\u00a0stort glip sy haar nuwe onderklere aan. Sy bekyk haarself in die spie\u00ebl. Sy voel soos \u2019n\u00a0godin. Weliswaar \u2019n\u00a0Botticelli-godin, maar vir eers is dit goed genoeg. Sy voel klaar beter.<\/p>\n
Op pad salon toe is haar rekenaar-inboks al waaraan sy kan dink. Sy brand om te sien of Hendri weer van hom laat hoor het.<\/p>\n
Terwyl die verkeer in Conrad Drive om haar opdam, begin sy opnuut haar e-pos aan hom formuleer. Sy wil koel en kalm klink. Nie te oorywerig nie, soos Cari ges\u00ea het. Sy sal Cari se raad tot op \u2019n\u00a0punt volg, neem sy haar voor, maar sy is nie van plan om Hendri haar minnaar te maak nie. Die gedagte om saam met hom te gaan koffie drink, is klaar vir haar genoeg opwinding. Sy wil net weer vir \u2019n\u00a0slag begeerlik en beminlik voel.<\/p>\n
Cari weet Arien wil die brieke aandraai na die koffie-sessie. \u201cAi, Meisie, jy is die na\u00efefste mens wat ek ken! Daardie Hendri is ge\u00efnteresseerd, ek kan dit aanvoel. Dink jy regtig hy sal tevrede wees om net een keer te gaan koffie drink? Nee, jong, ons wil h\u00ea die man moet jou oorrompel en jou vry tot jou wange gloei.\u201d<\/p>\n
Arien se konserwatiewe inbors keer elke keer woes as haar gedagtes saam met die van Cari op \u2019n\u00a0stomende avontuur gaan. Sy herinner Cari protesterend aan haar getroude status, maar dit laat haar vriendin net verontwaardig snork. \u201cGmfff, getroud! Dink jy Jos onthou nog hy is getroud? Kom nou, verstaan jy nie dat ek jou wil help om uit die dooie huwelik te breek nie?\u201d Sy weet Cari bedoel dit goed. Sy wens soms sy kon soos Cari wees. Cari sou lankal van Jos geskei het. Cari verstaan nie hoe die hele Hendri-ding\u00a0 haar gemoed skommel en hoe sy die een oomblik opgewonde raak oor die vooruitsig om Hendri weer te sien, maar dan weer verval in wroegende selfverwyt en vrees.<\/p>\n
Vry. Cari s\u00ea sy kort \u2019n\u00a0goeie vry om uit haar groef te kom. Maar \u2019n\u00a0goeie vry met enige man buiten Jos sal ontrouheid wees. Sy weet.<\/p>\n
Sy kan nie eens onthou wanneer laas sy en Jos gevry het nie. Miskien toe die kinders klein was? Daarna het hulle in die tipiese strik getrap van verby mekaar begin leef. En die bietjie verhouding wat daarna oorgebly het, is deur Jos se toenemende drankmisbruik vernietig.<\/p>\n
Cari verseker haar heeltyd sy verdien om soos \u2019n\u00a0beminde vrou te voel, maar na jare se agterspeen suig in \u2019n\u00a0huwelik voel sy sy verdien nie geluk nie.<\/p>\n
Sy waardeer Cari se pogings om haar lewe op te kikker, maar in haar hart is sy steeds net gewone ou Arien. Na haar inkopietog die vorige dag het \u2019n\u00a0pakkie van Cari haar by die salon ingewag. \u2019n\u00a0Boksie met rooi harte-papier. Binne, in passievolle pienk sneespapier toegewikkel, was daar \u2019n\u00a0stomende boek met seksraad, \u2019n\u00a0stel pienk handboeie en \u2019n\u00a0vere boa. Ai, die Cari! Sy het die boek vlugtig oopgemaak en blosend na \u2019n\u00a0paar sketse gekyk. Liewe aarde! Sy het dit toegeklap asof haar ma oor haar skouer loer. Dis sulke tye wat sy wonder hoekom sy en Cari sulke goeie vriendinne is. Cari se Europese bloed is veels te vurig vir haar.<\/p>\n
Cari het geweet die boek gaan Arien effe ontsenu.<\/p>\n
\u201cDis net \u2019n bietjie inspirasie. Moet tog nie so \u2019n\u00a0ou koekie wees nie. Die boek het oulike tips! \u2019n\u00a0Grimeerkunstenaar wat saam met my op \u2019n\u00a0shoot<\/em> gewerk het, het die boek aanbeveel en ek het vir myself ook een gekoop!\u201d<\/p>\n Arien het die boek in \u2019n\u00a0laai by die salon toegesluit. Daar is nie \u2019n\u00a0manier dat sy dit ooit huis toe sal kan neem nie. S\u00ea nou die seuns kom daarop af? Of wat sal gebeur as sy in \u2019n\u00a0ongeluk beland en iemand kry die boek in haar kar? Dis erg genoeg dat die ding in haar laai op kantoor is.<\/p>\n Terwyl sy buffer teen buffer deur die Sandton-verkeer sukkel, hoop sy Cari het nie vir die grimeerkunstenaar vertel vir wie die seksboek raad moet gee nie! Sy sal nooit weer haar gesig by \u2019n\u00a0skoonheidslaunch<\/em> kan wys nie.<\/p>\n Haar kop flits terug na die paar sketse wat sy in die boekie gesien het. Sjoe! Sy en Jos het nooit sulke avontuurlustig dinge aangevang nie. Dalk was sy nog altyd die demper op hulle slaapkamersake? Maar Jos … hy het haar lanklaas bemind laat voel.<\/p>\n Sy draai die karradio harder om haar onsuiwer gedagtes te tem. Donna Summer se “Dim all the lights” speel en dit is die laaste ding wat sy wil hoor. Sy wil op hierdie oomblik niks weet van romantiese ligte en sensuele speletjies nie. Sy draai die radio vinnig sagter en kyk skuldig rond of een van die mense in die karre langs hare haar gedagtes kan lees. Haar oog vang die van \u2019n\u00a0man in die Porch\u00e9 langs haar. Hy glimlag breed\u00a0 en knipoog vir haar! Sy skrik so groot sy los haar kar se koppelaar en haar kar spring vorentoe. Die Porch\u00e9 Casanova geniet haar reaksie en hy gee \u2019n\u00a0speelse toet-toeteroe-toet-toet en wuif in die verbygaan vir haar.<\/p>\n Het die w\u00eareld om haar die kluts kwytgeraak? Nog nooit het vreemde mans vir haar in die verkeer geknipoog nie. Straal sy dan haar beplande ontrouheid uit? Kan almal op haar gesig sien sy het gister vir die eerste keer in haar lewe deur \u2019n\u00a0seksboek geblaai?<\/p>\n Sy wens sy kon iewers afdraai en wegkom van die alsiende o\u00eb van die man in die silwer sportmotor. Die baan verkeer waarin sy is, kruip stadig vorentoe en die silwer Porch\u00e9 is nou net so skuins voor haar. Sy sit haar donkerbril op, en dan, op die ingewing van die oomblik maak sy haar lippe nog rooier.<\/p>\n Asof Cari weet haar vriendin is in nood, bel sy. Arien vertel haar van die man in die silwer blits.<\/p>\n \u201cDis fantasties, Meisie! Sien? Jy begin klaar die gloed kry.\u201d<\/p>\n \u201cWatter gloed?\u201d<\/p>\n \u2019n\u00a0Lang sug volg oor die foon.<\/p>\n \u201cMan, die soort wat \u2019n\u00a0vrou kry wat onweerstaanbaar voel.\u201d<\/p>\n Arien s\u00ea sy voel nog nie onweerstaanbaar nie. \u201cMy maag draai van daai groen gemors en my kop is deurmekaar. Jy is \u2019n\u00a0slegte invloed! Ek soek my ou lewe terug!\u201d<\/p>\n Cari lag asof sy van beter weet. \u201cWees jy net \u2019n\u00a0soet meisie en sluk jou sap. En as jy by die kantoor kom, skryf jy daardie e-pos aan handsome<\/em> Hendri. En blind cc<\/em> my sommer. Ek wil darem kyk of my protege haar opdragte uitvoer.\u201d<\/p>\n By die kantoor staar Arien na die rekenaarskerm. Die merker klop net so vinnig soos haar hart. Sy klik op die Gmail-ikon. Haar oog sien dit dadelik. Drie e-posse van Hendri!<\/p>\n \u201cHaai Rientjie, wat het van jou geword?\u201d En dan: \u201cRientjie, ek is ernstig. Ek moet jou sien!\u201d Die laaste een laat haar hart \u2019n\u00a0sekonde gaan staan: \u201cEk het jou nooit vergeet nie.\u201d<\/p>\n Sy kry nie asem nie. Van benoudheid neem sy \u2019n\u00a0sluk groen sap uit haar waterbottel.<\/p>\n \u201cEk het jou nooit vergeet nie.\u201d Hendri wat haar hart gebreek het, s\u00ea hy het haar nooit vergeet nie. Hendri wat haar sy prinses wou maak.<\/p>\n Die emosie raak te veel vir haar. Sy moet uit die kantoor kom. Dit voel of die mure al nader aan haar beweeg. Benoudheid en opwinding laat haar kop draai. Sy stap vinnig uit die gebou. Buite in die tuin voel dit of sy hiperventileer. Wat het sy aangevang? Sy wil voel soos sy nou voel en sy wil ook nie so voel nie. Sy het in jare nie so gevoel nie. Die gevoel van opwinding en effense verliefdheid is soos \u2019n\u00a0balsem op haar uitgedroogde gemoed en dit oorheers die gewete wat in die agtergrond aan haar knaag … Jos … die seuns.<\/p>\n Dan tref dit haar. Sy weeg seker nog 82 kg! Sy is beslis nie reg om Hendri te sien nie. Hy sal hom dood skrik as hy sien sy prinses van skool het deur die jare in \u2019n\u00a0ronde pampoen verander. Sy sal moet speel vir tyd!<\/p>\n Die twyfel oor haar voorkoms raak te veel vir haar en sy gaan weeg haar stilletjies in een van die terapiekamers. 80.6kg!! Joegaai! Cari se sap werk! Sy skep moed. Haar deurmekaar kop begin berekenings maak. Miskien kan sy tog die ergste gewig afskud voor sy die afspraak met Hendri maak!<\/p>\n Sy sweef op \u2019n\u00a0wolk. Sy het 1.4 kg verloor en sy voel sexy in haar peach pantie en nuwe kant bra! En in haar inboks is \u2019n\u00a0e-pos van Hendri wat s\u00ea hy het haar nooit vergeet nie! Na al die jare!<\/p>\n Sy gaan sit voor die rekenaar. \u201cLiewe Hendri …\u201d Dan skrap sy die \u201cLiewe\u201d en vervang dit met \u201cDags\u00ea Hendri\u201d. Sy moet die man se aanslag effens demper want dinge hardloop nou te vinnig vir haar.<\/p>\n \u201cDags\u00ea Hendri, Dit gaan vreeslik druk by die salon. Boonop moet ek twee weke na \u2019n\u00a0kongres gaan …\u201d Twee weke. Sy speel vir tyd. Haar gewete kla haar aan oor die leuentjie, maar sy weet sy het meer tyd nodig voor sy gereed sal wees.<\/p>\n \u201cEk sal ongelukkig eers na die kongres saam met jou kan gaan koffie drink sodat ek jou ou foto\u2019s vir jou kan gee.\u201d<\/p>\n Cari is vreeslik be\u00efndruk met haar vriendin se vordering. \u201cMooi so, jy leer vinnig! Laat hom bietjie wag. Jy het hom klaar aan die hoek!\u201d<\/p>\n Arien weet nie of sy opgewonde moet wees oor Cari se uitdrukking nie. Sy weet nie wat gaan sy met die groot vis maak as sy hom vang nie.<\/p>\n Haar foon lui. Dis Jos.<\/p>\n \u201cEk … ek is jammer ek het so baklei oor die onderklere. Jy is reg, jy koop nooit\u00a0 vir jou mooi goed nie.\u201d<\/p>\n Sy is lus en vra hom of hy gedrink is. Sy ken nie meer die sagte stemtoon in Jos se stem nie.<\/p>\n \u201cJy kan maar vir jou nog \u2019n\u00a0paar broekies en bras gaan koop. Ek het vanoggend gesien toe jy dit aantrek. Dit lyk goed. Kom wys my vanaand wat jy gekoop het.\u201d<\/p>\n Dit neem die wind uit haar seile. Wat het in Jos gevaar?<\/p>\n \u201cDis nie nodig nie. Ek het nou genoeg onderklere. Ek moet nou gaan. \u2019n\u00a0Kli\u00ebnt wag vir my.\u201d<\/p>\n Haar hande bewe en die trane vloei spontaan oor haar wange.<\/p>\n Sy voel sy sit heel voor in die wikpar. Dit huiwer oor \u2019n\u00a0groot afdraande en dit swaai om skerp hoeke en draaie. Haar hele wese wip wip wip.<\/p>\n","protected":false},"excerpt":{"rendered":" Wipkar, hoofstuk 4. Geskryf deur Martie Swanepoel<\/p>\n","protected":false},"author":8,"featured_media":65029,"comment_status":"open","ping_status":"closed","sticky":false,"template":"","format":"standard","meta":{"_acf_changed":false,"footnotes":""},"categories":[43452,3476],"tags":[1258,1518,4119],"class_list":["post-66127","post","type-post","status-publish","format-standard","has-post-thumbnail","hentry","category-lees","category-ontspanning","tag-lees","tag-kortverhaal","tag-vervolgverhaal"],"acf":[],"yoast_head":"\n