<\/p>\n
Hustera Ectomia<\/p>\n
Dis die negentiende. Donderdag. Die dag van dinge, besef ek toe my selfoon om vieruur tsjwierie-tsjwierie. Ek druk hom dood. Morsdood. Af. Nie op daai sleep-some-more funksie nie. Vloog uit die kooi en loop outomaties kombuis toe. Vir koffie\u00efen en nikotien, maar briek by die ketel in my slippers vas. D\u00e9m. Daar staan dit – in my eige handskrif. Swart-op-wit. Wit-op-swart. \u2019n Wit nota vasgeprestiek op my swart ketel. Nil per mond. Ek het vergeet. Momenteel. Dis nou nie van ou derdom nie, verstaan my goed. Dis natuurlik van overload. Dit m\u00e1g dieselle klink, maar dit \u00eds nie. Overload is vleiender. Glo iets van s\u00f3 besig wees dat jou brein onbenullige inligting verwerp. Sowaar, daar \u00eds vandag \u2019n onbenulligheid op my pad, val dit my by. Histerektomie. Myne.<\/p>\n
Klein prosedure. Die HAT s\u00ea hustera (baarmoeder) en ectomia (chirurgiese verwydering). Vaginaal. Ek weet darem waar d\u00edt is. Die buurvrou s\u00ea, \u201cDis nou so van onnir af, ek weet darem nie so mooi nie … \u201d Die badkamerspi\u00ebel sien dat my kop nie eens omgekrap is nie, en dat ek ook nie soos elke ander oggend sakke onder my o\u00eb het nie. Ek het nou nie juis veel geslaap nie. Ek k\u00e1n nog omdraai, dink ek. Uit hierdie ding kom sonder dat die ding uit my kom.<\/p>\n
Hoekom pyn ek so, wonder ek vir die soveelste keer. Toe ek destyds die kot en die pram vir die buurvrou se kind-vol-kind gegee het, was daar g\u2019n wroegte in my nie. Maar die kot het nie die vier vruggies wat ek in my bekken gedra het, in amnion, chorion en vrugwater gekoester nie. Die pram was nie die eerste om vlindersag vir my te fluister dat hulle d\u00e1\u00e1r was nie. En die motorstoeltjie het ook nie n\u00e1 nege maande saam met my, asem-vir-asem, hul koppies laat kroon nie. En dit was goed. S\u00f3 wonderlik, volkomevrou-goed.<\/p>\n
Ek kyk af na die kaal driehoek tussen my bene. (Die instruksie was duidelik: \u201cclear bottom\u201d. Met moeite, vat dit nou maar van my vir die reine waarheid!) Daar\u2019s nie eens \u2019n enkelte donsie oor om my skaamte mee weg te steek nie. Ek is dogtertjie-kaal. Kind-kaal. Kinds-kaal? En ek huil. Oor \u2019n weet-nie-wat-tigheid. Oor iets wat ek seker nie eens gaan mis nie – ek kan mos onmoontlik iets mis wat verskuil, \u00earens undercover l\u00ea nie. Maar die \u201ciets\u201d het my sedert my pepertyd (soos oorle\u2019 Ouma dit genoem het) elke agt en twintig dae opnuut voorberei om gewillig n\u00f3g \u2019n vruggie groot te maak. Ek wil n\u00f3\u00fa ry, s\u00ea ek. Anders w\u00e9\u00e9t ek, gaan ek kop uittrek. Maar daaroor s\u00ea ek liewerster niks. Watter man sal hierdie gedoentigheid in my vroukop tog verstaan?<\/p>\n
Die papierbloemer is \u2019n one-size-fits-all. Voorwaar, t\u00f3t my tieties pas in! Die blou voorkant-agtertoe jassie se bandjies makeer, en ek hang sleg uit. My ou man gaan soek iemand om te kom help, maar hulle is volgens die geluide wat in die gang gebeur, besig om mekaar met stainless steel-skottels dood te gooi. Die tweede jakkie het ook nie tossels aan nie. Later hol die narkotiseur in, rits \u2019n stel vrae af. Ly ek dalk aan porfirie? Nee. (As ek nie eens weet w\u00e1t dit is nie, kan ek dit seker nie onder lede h\u00ea nie.) En ek s\u00ea ek rook twintig sigarette. Nee, nie per week nie, Dokter. Hy vlug. Ek wou hom nog s\u00ea my bloeddruk val sleg n\u00e1 narkose, en dat ek so naar word dat ek bang is my d\u00earrims val uit, maar hy\u2019s reeds R700 weg. En ek wou ook net vir die volledigheid van die rekord vir hom s\u00ea dat my oorle\u2019 ouma navy-blou-langbeenbloemers gedra het.<\/p>\n
Die gekepste teatertannies gooi \u2019n hewige tantrum toe ek nog op die lewwie sit en douche terwyl ek glo al onder die mes moes wees. W\u00e1t \u2019n gesukkel. Ek was te skaam om vir die suster te s\u00ea dat ek nie \u2019n koekiengkloe het hoe om die stukkie apparaat, wat vir my erg gelyk het na iets wat jy slegs by \u2019n adult shop kan koop, te gebruik nie. Maar ek was bang ek lyk dom. Gelukkig het ek toe reeds die enema gehad, en als gaan tog maar oor holtes hier.<\/p>\n
Die premed? Di\u00e9 drink ek sommer al sittende op pad teater toe. So much for a PRE-med. Ek sak terug op die trollie en die dak swiep blok vir blok oor my oorgelewerdheid verby.<\/p>\n
Die teater is bitter koud. Bibberkoud. Verbeel ek my, of word die teaterbed elke keer wat \u00e9k dit moet gebruik, smaller? Daar\u2019s nou net plek vir \u00e9\u00e9n van my twee boude. Ek wikkel-wikkel hulle toe maar om \u2019n veilige middelpunt te probeer kry. \u2019n Gemaskerde doekvoetvrou maak my bolyf kaal en plak elektrodes vir monitors vas terwyl sy my indringend pols oor die doeltreffendheid van die fleet-enema wat ek so flussies in die saal gehad het. Aan die ander kant gee die narkotiseur voor dat hy vreeslik jammer is oor die \u201cklein prikkie\u201d wat hy met grootskaalse oorgawe maak. Hy laat my vloeke tussen sewe(?) ligte stol. Ek wou nog vir haar s\u00ea van die lawement, en dat ek bang is dat ek dood sal gaan.<\/p>\n
En dat hulle nie vir my ou kale Katriena moet lag nie, sy \u00eds after all op pension …<\/p>\n
VIR \u2019N HELE SES WEKE LANK het ek gevoel. En gevoel. W\u00e9\u00e9r gevoel. Maar niks het gepyn nie. Nie my lyf nie, nie my hart nie. Niks. Ek is net nog maar net ek. En ek mis niks. Ver-mis niks. Ek loop haal de laaste broekie en bra uit my onderklerelaai, pak dit in \u2019n sak en gaan sit dit op \u2019n klip op die sypaadjie vir iemand wat dalk glad nie \u2019n bloemir of boddis besit nie. Net vandag vat ek my \u201cbusfare home\u201d (daai paar pennies wat ons girls in ons agterbeursies hou net vir ingeval) en gaan koop vir my splinternuwes by Woolies en drink sommer \u2019n cappuccino-heildronk op my nuwe ou lyf!<\/p>\n
<\/p>\n","protected":false},"excerpt":{"rendered":"
Hustera Ectomia Dis die negentiende. Donderdag. Die dag van dinge, besef ek toe my selfoon om vieruur tsjwierie-tsjwierie. Ek druk hom dood. Morsdood. Af. Nie op daai sleep-some-more funksie nie. Vloog uit die kooi en loop outomaties kombuis toe. […]<\/p>\n","protected":false},"author":9,"featured_media":98958,"comment_status":"closed","ping_status":"closed","sticky":false,"template":"","format":"standard","meta":{"_acf_changed":false,"footnotes":""},"categories":[43452],"tags":[],"class_list":["post-5211","post","type-post","status-publish","format-standard","has-post-thumbnail","hentry","category-lees"],"acf":[],"yoast_head":"\n