{"id":3462,"date":"2026-02-09T09:22:00","date_gmt":"2026-02-09T07:22:00","guid":{"rendered":"http:\/\/rooirose.dvlp.site\/my-kind-haat-skool\/"},"modified":"2026-02-09T09:30:36","modified_gmt":"2026-02-09T07:30:36","slug":"my-kind-haat-skool","status":"publish","type":"post","link":"https:\/\/novanews.co.za\/rooirose\/my-kind-haat-skool\/","title":{"rendered":"My kind h\u00e1\u00e1t skool! Wat nou?"},"content":{"rendered":"

Sukkel jy jou soggens kapoet om jou kind uit die bed te kry? Is die atmosfeer \u2019n kruitvat wat die geringste vonkie nodig het om te ontplof? Baklei sy soggens vandat sy haar o\u00eb oopmaak oor die kleinste dingetjie? Omdat sy moet opstaan terwyl sy nog s\u00f3 moeg is; oor die melk te koud of te warm is; oor haar skoene nie op hul plek is nie; oor haar skoolkos; oor haar boetie of die hond vir haar kyk; oor hoe sleg haar hare lyk? Of is sy elke oggend siek? Jou kind wil nie skool toe gaan nie. Die meeste kinders voel die een of ander tyd nie lus om skool toe te gaan nie. Dis normaal, veral as hulle \u2019n aanpassing moet maak waarvoor hulle bang is \u2013 soos om na \u2019n nuwe skool te gaan. Gewoonlik duur die gevoelens nie te lank nie. Maar wat as dit aanhou en erger word? Kinders doen goed as hulle kan. Kinders wil meestal hul ouers en onderwysers tevrede stel. Kinders wat nie skool toe wil gaan nie, of skool verpes, het gewoonlik \u2019n probleem. Veral kleintjies. Die meeste van di\u00e9 kinders het nie die vaardighede om te voldoen aan die eise wat aan hulle gestel word nie \u2013 en dis nie hul keuse nie.<\/p>\n

Hulle reageer op baie maniere hierop: Hulle is ongemotiveerd en doen net die nodigste of selfs minder, of word siek, of bied weerstand. Dan kry hulle gou-gou die etiket dat hulle lui, ongemotiveerd, moedswillig en stout is, wat hulle weer in konflik met hul onderwysers en ouers bring. Aanlyn is daar talle blogs en groot groepe kinders wat dikwels in sterk gekruide taal vertel hoe en hoekom hulle skool so haat. En ironies gebruik hulle skuilname soos Useless man en Darkangel. Daar is \u201cek haat skool\u201d-lirieke, -T-hemde, -aanhalings, -voorstellings. Maar die meeste kinders loop met die gevoelens opgekrop en dan bars hul frustrasie tuis op allerlei maniere uit.<\/p>\n

 <\/p>\n

\"\"<\/p>\n

 <\/p>\n

Pieter*, \u2019n tiener, vertel: <\/strong>\u201cSkool suck! Ek haat die verdomde plek! En alles daarvan. Die dom werk, die klasse, die rye, die simpel onderwysers en die kinders. Dis dieselfde goed oor en oor. Ek raak naar as ek nog iets oor vigs moet leer. Die onderwysers dink hulle het mag en kan jou beheer -wat jy moet doen, mag s\u00ea en dink, wat jy mag aantrek, hoe jy moet lyk. Die wiskundeonnie is die ergste met haar geskree en gedreig oor detensiebriewe, sy kan dit in haar dinges opdruk. En die kinders: Daar is mos altyd \u2018pliggies\u2019 wat dink hulle is s\u00f3 oulik. Hulle kruip net en dink hulle is beter as ander. As die toetsuitslae en rapport kom, d\u00e1n kry ek nou moeilikheid by my pa en hoor ek hoe treurig ek is. As ek net dink ek moet m\u00f4re skool toe gaan, of huiswerk doen, is ek sommer naar en omgekrap.\u201d<\/p>\n

Annemie*, sewe jaar oud: <\/strong>\u201cSkool is nie lekker nie. My juffrou is oukei, maar ek is bang vir haar. As ek nie stilsit nie, moet ek voor langs haar gaan sit, of langs so \u2019n seuntjie wat my heeltyd pla, lelike goed vir my s\u00ea en my goed vat. Ek kan nie dink as die kinders praat nie. Ek kry nie my werk klaar nie, en dan spot die ander my omdat ek laaste klaar is. Pouses moet ek inbly om my werk klaar te maak. Maar die maatjies wil in elk geval nie met my speel nie. Ek wens daar was nie \u2019n skool nie en ek hoef nooit weer te gaan nie.\u201d Nie alle kinders is in staat om te erken hulle het \u2019n probleem, of om dit soos Pieter en Annemie te verwoord nie. Baie s\u00ea net dat dit nie lekker is nie en probeer dit vermy.<\/p>\n

 <\/p>\n

 <\/p>\n

Dan kla hulle dat hulle te siek voel<\/strong><\/h4>\n

 <\/p>\n