Sy is een van die spogkinders\u00a0van haar skool. Akademies het sy uitgeblink en sy het \u2019n paar agtereenvolgende jaar die nasionale redenaarskompetisie gewen. Janet Ferreira* is \u2019n agtermekaar meisiekind en haar ouers se trots. Sy was 15 toe sy vroe\u00ebr vanjaar die eerste keer seks met haar ho\u00ebrskoolliefde, die 16-jarige Jean-Pierre*, gehad het. Hulle het toe al vyf maande uitgegaan en het saam besluit dat hulle seks wil h\u00ea.<\/p>\n
Ek was een van die enigste meisies in ons groep wat toe n\u00f3g nie seks gehad het nie. Almal het my laat verstaan dis anyway<\/em> nie so \u2019n big deal<\/em> om jou maagdelikheid te verloor nie. En feitlik al my vriende doen dit,\u201d vertel sy. \u201cEk is regtig nie \u2019n losbol, goedkoop of \u2019n slegte girl<\/em> nie. Maar ek gee baie om vir Jean-Pierre en het werklik gereed gevoel om saam met hom te slaap.\u201d Sy en Jean-Pierre het kort daarna, een aand terwyl sy ouers uit was, by hul huis in Morelettapark seks gehad. Daarna het hulle byna elke week minstens twee of drie keer seks gehad \u2013 \u00f3f by sy huis, \u00f3f haar huis, by partytjies waar die ouers nie daar is nie (en selfs waar die ouers w\u00e9l daar is) en hulle het dit tot al \u2019n keer in die skool se toilette gedoen.<\/p>\n Tog, as jy vandag vir Janet se ma vra of haar dogter nog \u2019n maagd is, sal sy daarby sweer. \u201cMy ouers is regtig verskriklik konserwatief en vir hulle is seks voor die huwelik nie eens \u2019n opsie nie. Ek beny my vriendinne wat openlik met hul ouers oor hierdie goed kan praat, want ek gaan eerder dood voor ek my ma vertel ek en Jean-Pierre slaap saam. Natuurlik is ek doodbang om swanger te word, maar dis nie so maklik om voorbehoedpille in die hande te kry nie, en bowenal is ek bang my ma kom daarop af. Sy sal my nie vergewe nie. \u201cDit sal my ouers se harte breek as hulle weet ek is nie meer \u2019n maagd nie, maar die werklikheid is dat ek amper niemand ken wat op my ouderdom nog \u2019n maagd is nie. \u201cSelfs al is ek bang om swanger te raak, het dit my nie gekeer om seks te h\u00ea nie. Jean-Pierre sit elke keer \u2019n kondoom aan … My ma sal waarskynlik die h\u00e9\u00e9l laaste mens wees wat weet ek is swanger, as dit ooit met my moet gebeur. Dis ironies, want ons het eintlik \u2019n baie goeie verhouding.\u201d<\/p>\n Janet se vertelling is die werklikheid en \u2019n situasie wat hom waarskynlik in menige ouerhuis afspeel – of ouers nou daarmee saamstem of nie. En al sweer jy hulle die dood voor o\u00eb, of soebat hulle op jou knie\u00eb, jy het geen waarborg dat hulle ni\u00e9 seks gaan h\u00ea nie. \u201cDie redes hiervoor is omdat ons kinders al meer en al vroe\u00ebr aan seksualiteit en seksuele inligting blootgestel word,\u201d s\u00ea Ilze van der Merwe, \u2019n opvoedkundige sielkundige en die medeskrywer van die boek Maklike antwoorde op ongemaklike vrae. \u201cRy jy op doodgewone paaie met jou kinders op pad skool toe, word jy gebombardeer deur advertensieborde waarop halfkaal vroue poseer. Sit jy die TV aan, is daar helder oordag seks in jou televisiekamer. Kinders hoor van seks op die radio, in musiek en veral by hul maats. En d\u00eds waarom jy as ouer reeds vandat jou kinders so jonk soos drie jaar is, \u2019n oop verhouding oor seksualiteit moet h\u00ea,\u201d s\u00ea Ilze. Dit beteken nie jy moet jou tiener aanmoedig om seksueel aktief te wees nie, maar \u2019n oop verhouding oor seks sal hulle meer bewus maak van alles wat daarmee gepaardgaan.<\/p>\n Ilze s\u00ea dat Oprah Winfrey en die tydskrif Seventeen se onlangse navorsing gewys het dat meisies wat van kleins af seksuele voorligting gekry het en \u2019n oop verhouding met hul ouers oor die saak het, eers baie later seksueel aktief raak omdat hulle presies weet wat seks behels en wat om te verwag. Dis wanneer kinders met die idee leef dat seks iets magies en onbereikbaar is dat hulle meer geneig is om vroe\u00ebr daarmee te eksperimenteer. Om jou kinders bloot te verbied om seks te h\u00ea, gaan glad nie help nie. \u201cGesels eerder vroegtydig en openhartig met hulle oor seks. Praat met hulle oor die gevare daarvan, maar moenie net op die negatiewe aspekte konsentreer nie. Praat eerder ook oor die implikasies van \u2019n seksuele verhouding; stel vas wat jou dogter se emosionele verwagtinge is, en of sy seker is die seun gaan haar sy vaste meisie maak. Vir jou seun kan jy vra of hy nie \u2019n wanindruk van \u2019n meisie het nie? Hoekom wil hy so graag met haar seks h\u00ea, is dit nie dalk net vir sy eie seksuele bevrediging nie?\u201d s\u00ea Ilze. En wat as jou tiener jou wel genoeg vertrou en s\u00ea dat sy daaraan dink om seks met haar k\u00earel te h\u00ea? Ronel* en Kobus* het \u2019n goeie en oop verhouding met hul dogter Karlien*.<\/p>\n Hulle s\u00ea desondanks was dit vir hulle een van die moeilikste goed toe sy in haar graadtienjaar vir hulle kom vertel dat sy dit oorweeg om seks met haar k\u00earel te h\u00ea. \u201cOns was albei geskok. Ons het met haar oor die saak gesels en wou veral weet hoekom sy dit wou doen. Haar antwoord was dat sy regtig baie vir hom omgee.\u201d Kobus het haar daarop gewys dat as sy haar maagdelikheid vir \u2019n ou gegee het, dit vir altyd aan hom gaan behoort. Sy kan daardie \u201cgeskenk\u201d nooit weer vir iemand anders gee nie. Haar antwoord was dat nie een van haar vriende meer maagde is nie. Sy het uit gevoel en wou nie die enigste tiener op aarde wees wat nog \u2019n maagd is nie. \u201cWat jy in ruil kry, is die aanvaarding van \u2019n groep vriende wat oor \u2019n paar jaar nie meer deel van jou lewe gaan wees nie. En jy koop die guns van \u2019n seksmaat wat nie met jou gaan trou nie en wat waarskynlik oor \u2019n maand \u2019n ander meisie gaan h\u00ea. Moenie dink \u2019n orgasme gaan hierdie ou joune maak nie,\u201d het Kobus sy kind probeer waarsku. Tevergeefs. Die volgende dag het Ronel vir Karlien na hul huisdokter geneem en die situasie verduidelik.<\/p>\n Hy het \u2019n voorbehoedpil voorgeskryf en ook \u2019n MIV-bloedtoets laat doen. Hy het aanbeveel dat haar k\u00earel ook eers die toets doen voor hulle seks het. \u201cDit was een van die moeilikste goed wat ons in ons lewe moes doen, maar aan die ander kant het ons geweet dis eintlik maar onvermydelik. Ons kan nie die risiko loop dat ons meisiekind swanger raak nie. Natuurlik stel ons steeds grense. Sy en haar k\u00earel het beslis nie nou die groen lig om seks te h\u00ea soveel hulle wil en wanneer hulle wil nie,\u201d s\u00ea die ouerpaar. Ilze s\u00ea hulle is wyse ouers. \u201cNatuurlik kan jy nie jou tiener aanmoedig om seks te h\u00ea nie, maar omdat Karlien gekies het om haar ouers te vertrou, mag hulle haar nie wegstoot nie. Dit help nie jy as ouer steek jou kop soos \u2019n volstruis in die sand nie \u2013 die kwessie gaan nie weggaan nie. Dis \u2019n werklikheid dat \u2019n baie klein persentasie jongmense seks weerhou tot hulle getroud is.\u201d<\/p>\n Vir meisies<\/strong><\/span><\/p>\n Ilze s\u00ea: \u201cDie werklikheid is dat seks jou lewe heeltemal omver gaan gooi. Onthou, wanneer jy jou maagdelikheid vir \u2019n seun gee, gaan jy voel hy skuld jou iets. \u201cSeks kan jou swanger maak en \u2019n swangerskap gaan jou lewe handomkeer verander. Wil jy regtig nou al \u2019n baba h\u00ea? Besef jy dit gaan \u00e1l jou toekomsplanne beduiwel, jou jongmenslewe binne \u2019n oogwink be\u00ebindig? \u2019n Swangerskap gaan jou dwing om groot besluite te neem waarvoor jy eintlik nog glad nie opgewasse is nie. \u201cOnthou, tienerseuns is testosteroongedrewe masjiene \u2013 en sommige seuns manipuleer meisies om met hulle seks te h\u00ea. Moenie swig voor goed soos: \u2018As jy my liefhet, sal jy met my seks h\u00ea nie.\u2019 Die kans is heel goed dat hy jou in elk geval oor \u2019n maand of twee gaan los, al het jy met hom seks gehad. Die uiteinde gaan wees dat jy woedend vir jouself is, en elke kriesel selfrespek gaan verloor.\u201d<\/p>\n Vir seuns<\/strong><\/span><\/p>\n \u201cMeneer, besef jy dat jy net soveel verantwoordelikheid dra as jy \u2019n meisie swanger maak? Is jy gereed om nou al \u2019n pa te word en na \u2019n kind om te sien? \u201cSeksueel oordraagbare siektes is \u2019n werklikheid en sodra jy roekeloos met seks is, is jou kanse net soveel groter om \u2019n seksueel oordraagbare siekte op te doen. \u201cRespekteer jou eie lyf \u00e9n \u2019n meisie se lyf deur dit nie met seks te misbruik nie. Van seks kan jy baie siek word, selfs doodgaan, en jy kan \u2019n ouer word op sestien en jou hele lewe opduiwel. Jy verbind jouself in siel, gees en liggaam met die mens met wie jy seks het, en jy leef dalk vir altyd met daardie bindinge.\u201d<\/p>\n Die w\u00eareldbekende menslike gedragspesialis dr. John Demartini van die Demartini Institute se boodskap vir tieners oor seks: \u201cWanneer jy verlief is, bruis \u2019n stroom hormone deur jou liggaam \u2013 serotonien, vasopressien, adrenalien en feromone – en dit laat jou brein dink dat jy regtig lief vir iemand is. En eintlik is jy soveel weerloser in hierdie staat van verliefdheid \u2013 jy doen goed wat jy oor die algemeen nie eens sou oorweeg het nie. \u201cSodra ons seks met iemand het, raak ons \u2019n bietjie magteloos. \u2019n Sterk mens wat bemagtig is, is baie meer selektief met sy\/haar seksmaats. Die kuns is om soveel selfwaarde en agting binne jouself te vind dat jy nie sommer saam met enigeen in die bed sal spring nie. \u201cElke keer as jy saam met n\u00f3g iemand anders slaap, minimaliseer jy jou net n\u00f3g \u2019n bietjie en raak jy al weerloser.\u201d<\/p>\n