{"id":168193,"date":"2026-09-14T16:32:52","date_gmt":"2026-09-14T14:32:52","guid":{"rendered":"https:\/\/novanews.co.za\/rooirose\/?p=168193"},"modified":"2026-09-15T12:16:44","modified_gmt":"2026-09-15T10:16:44","slug":"gewilde-musiekblyspel-se-soete-terugkeer-na-die-planke","status":"publish","type":"post","link":"https:\/\/novanews.co.za\/rooirose\/gewilde-musiekblyspel-se-soete-terugkeer-na-die-planke\/","title":{"rendered":"Gewilde musiekblyspel se soete terugkeer na die planke"},"content":{"rendered":"

Deur Rachel Jonker<\/em><\/p>\n

 <\/p>\n

Toe Afrikaanse rolprentgangers in 2012 die eerste keer met die rolprent <\/span>Semi-Soet <\/span><\/i>kennis gemaak het,<\/span> kon niemand voorspel hoe vinnig di\u00e9 romantiese komedie \u2019n tydlose treffer sou word nie. En toe dit eers in \u2019n musiekblyspel vir die verhoog omskep is, is \u2019n nuwe teatertreffer gebore.<\/span>\u00a0<\/span><\/p>\n

Nou keer <\/span>Semi-Soet \u2013 Die Musiekblyspel<\/span><\/i> in September 2026 terug na die verhoog, hierdie keer op een van Suid-Afrika se grootste verho\u00eb, die Teatro by Montecasino<\/strong>, te danke aan AfriForum en Inhoud Huis Musiek, met die ondersteuning van RSG en kykNET. En ja, Bobby van Jaarsveld<\/strong> (en sy Speedo) en Anel Alexander<\/strong> sal weer die karakters van JP en Jaci vertolk.\u00a0<\/span>\u00a0<\/span><\/p>\n

Toe die produksie in 2025 as die eerste oorspronklike Afrikaanse musiekblyspel van sy soort in bykans \u2019n dekade agt weke lank aand n\u00e1 aand by AfriForum-teater uitverkoop was, was dit duidelik dat hulle met iets baie spesiaals besig as. Volgens Salet Smith, bestuurder van AfriForum-teater, was dit duidelik dat die storie sterk by gehore van alle ouderdomme aanklank gevind het. Nou bied die Teatro die geleentheid om op daardie sukses voort te bou en die produksie op \u2019n groter skaal aan te bied, sonder om iets van die hart, humor of sjarme te verloor wat dit in die eerste plek so geliefd gemaak het.<\/span>\u00a0<\/span><\/p>\n

Volgens Anel Alexander, wat in die rolprent \u00e9n die musiekblyspel die rol van Jaci van Jaarsveld vertolk, is dit waaroor teater gaan: om mense \u2019n blaaskans van hul stresvolle lewe te bied waar hulle vir \u2019n oomblik saam met vriende en familie kan saamkom en so kan lag dat jy huil.<\/span>\u00a0<\/span><\/p>\n

Kom deel in die verhaal van Jaci en JP \u2013 twee mense wat voorgee om die perfekte paartjie te wees, net om te ontdek dat liefde soms op die mees onverwagse plekke wag.<\/span>\u00a0<\/span><\/p>\n

 <\/p>\n

rooi rose<\/em> het \u2019n paar vrae aan die akteurs gestel:<\/h4>\n
Julle het Semi-Soet <\/i>al suksesvol in die Afriforum-teater opgevoer. Wat gaan hierdie keer anders wees by die Teatro by Montecasino?\u00a0<\/strong><\/h5>\n

Carmen Basson<\/span><\/b>: Ons het verlede jaar <\/span>Semi-Soet<\/span><\/i> by die AfriForum-teater gedoen, en vanjaar vat ons dit na Montecasino se Teatro. Dis een van Suid-Afrika se grootste teaterverho\u00eb.<\/span>\u00a0<\/span><\/p>\n

Daar was meer as tien jaar lank nie \u2019n Afrikaanse produksie op di\u00e9 verhoog nie. Vir ons is dit \u2019n kans om Afrikaans en ons kultuur op \u2019n groter vlak te vier en te wys: Ons kan dit in Afrikaans net so goed doen!<\/span>\u00a0<\/span><\/p>\n

En hierdie jaar is <\/span>Semi-Soet<\/span><\/i> n\u00f3g groter: \u2019n groter geselskap, indrukwekkende danse, nuwe musiek en \u2019n groter gehoor.<\/span>\u00a0<\/span><\/p>\n

Meer mense om saam te sing. Meer mense om saam te lag. En vir \u2019n paar uur net weg te breek van \u2019n w\u00eareld wat soms swaar voel.<\/span>\u00a0<\/span><\/p>\n

Dis nie net \u2019n musiekblyspel nie. Dis \u2019n viering van Afrikaans, en ons is ongelooflik trots om deel daarvan te wees.\u00a0<\/span>\u00a0<\/span><\/p>\n

\u00a0<\/span><\/p>\n

Wat was vir julle die uitdagendste toneel om op die planke te vertolk?\u00a0<\/strong><\/h5>\n

Anel Alexander<\/span><\/b>: Ek dink die hele proses is maar uitdagend, want dit is \u2019n splinternuwe musiekblyspel. Dit is nie <\/span>cookie-cutter <\/span><\/i>soos <\/span>Mamma Mia <\/span><\/i>of <\/span>Cats<\/span><\/i>, wat van Broadway afkom nie. Daardie tipe toneelstukke word al jare gedoen en die choreografie en so meer is lankal al bepaal.\u00a0 Ons s\u2019n is \u2019n splinternuwe musiekblyspel en dit is in Afrikaans.<\/span>\u00a0<\/span><\/p>\n

Aan die een kant maak dit dit <\/span>great<\/span><\/i>, want jy het die <\/span>blank slate<\/span><\/i>, aan die ander kant maak dit dit vreesaanjaend, want jy het die <\/span>blank slate<\/span><\/i>.<\/span>\u00a0<\/span><\/p>\n

So ek dink laas jaar was ons nie seker dat dit gaan werk nie: Dit werk in die fliek en die humor is vinnig, maar met die fliek kan jy <\/span>edit <\/span><\/i>tussen <\/span>shots <\/span><\/i>en vinnig <\/span>edit <\/span><\/i>tussen <\/span>scenes<\/span><\/i>. Ons was nie 100% seker dat dit na die verhoog gaan deurspoel nie. Maar dit het! Dit het nie net ge-<\/span>translate <\/span><\/i>na die verhoog<\/span> nie, dit was asof die musiekblyspel iets bygevoeg het. Dit het r\u00earig gevoel asof die musiekblyspel dit vat wat mense van die <\/span>movie<\/span><\/i> hou, en dit net so na die volgende vlak toe neem.\u00a0<\/span>\u00a0<\/span><\/p>\n

\"Die

Die rolverdeling van Semi-Soet \u2013 Die Musiekblyspel. Foto: Verskaf<\/p><\/div>\n

Watter liedjie in die musiekblyspel is julle gunsteling om op te voer en hoekom?<\/span><\/b>\u00a0<\/span><\/h5>\n

Anel: <\/span><\/b>\u00a0Johan Voster en Jacomien de Villiers het net r\u00earig vir ons sulke lekker treffers geskryf. Daar is nou repetisies aan die gang, en ek gaan slaap met die liedjies in my kop en as ek wakker word dan vang ek myself dat ek dit steeds neurie. Maar ek dink die wenner wat gaan uitstaan, is die nuwe liedjie wat ons vir Chadri geskryf het: \u201cRek strek baba\u201d.<\/span>\u00a0<\/span><\/p>\n

Dis is ook onlangs op alle stromingsplatforms vrygestel en Marcelle Peach, wat die rol van Chadri vertolk, gaan gehore verstom! Dit is nie net snaaks nie, maar daai <\/span>girl <\/span><\/i>se <\/span>vocal capacity<\/span><\/i> laat my sommer hoendervleis kry.<\/span>\u00a0<\/span><\/p>\n

 <\/p>\n

Inge Lochner:<\/span><\/b> Ons gunstelingliedjie is definitief Boudpars! Dit is \u2019n goedvoelliedjie wat vreeslik lekker is om op te voer met die energieke sang, dans en storievertelling. Die liedjie is so goed geskryf en gechoreografeer dat die gehoor definitief saam sal wil dans.<\/span>\u00a0<\/span><\/p>\n

 <\/p>\n

Wat dink julle voeg die musiekblyspelformaat tot die storie by?<\/span><\/b>\u00a0<\/span><\/h5>\n

Nadia Beukes:<\/span><\/b> Die musiekblyspelformaat vat \u2019n storie soos <\/span>Semi-soet<\/span><\/i>, wat reeds soveel mense in die rolprentformaat bekoor het, na \u2019n volgende vlak met die mooiste musiek en lirieke deur Johan Vorster en Jacomien De Villiers en natuurlik ook die indrukwekkende choreografie deur Phillip Schnetler. Dit gaan beslis gehore se hartsnare roer en hulle hopelik van oor tot oor laat glimlag terwyl hulle saamsing en deel in die vreugde van hierdie tydlose liefdesverhaal.<\/span>\u00a0<\/span><\/p>\n

 <\/p>\n

Anel:<\/span><\/b> Ja, dit is r\u00earig asof dit net alles, wat lekker is van <\/span>Semi-soet<\/span><\/i>, nog lekkerder kom maak. Ons is of heeltyd op ons fone, of heeltyd op ons <\/span>laptop<\/span><\/i>, of heeltyd op die TV. Om teater toe te kom, is so \u2019n gemeenskapservaring en <\/span>Semi-soet<\/span><\/i> \u2013 die musiekblyspel is die <\/span>epitome <\/span><\/i>van dit, want dit is r\u00earig so lekker om hierdie storie saam met ander mense te beleef.<\/span>\u00a0<\/span><\/p>\n

\u00a0<\/span><\/p>\n

\u2019n Vraag aan Bobby: Die vorige keer wat ‘n Afrikaanse musiekblyspel, <\/span><\/b>Liefling<\/span><\/i><\/b> (2014-2015), op die planke by Montecasino was, het jy ook die manlike hoofrol vertolk. Hoe verskil Jan en JP? Op watter maniere het jou voorbereiding vir die rolle verskil?<\/span><\/b>\u00a0<\/span><\/h5>\n

Bobby:<\/strong> Ja, dit is twee heeltemal verskillende rolle en ek was ook baie jonger met <\/span>Liefling<\/span><\/i>. Ek het ook die hoofrol in die fliek gespeel, en dit was eintlik makliker vir my om dit toe op die planke te vertolk.\u00a0<\/span>\u00a0<\/span><\/p>\n

Dit was dus amper soos \u2019n <\/span>copy <\/span><\/i>en <\/span>paste<\/span><\/i>.\u00a0<\/span>\u00a0<\/span><\/p>\n

Ek het nie in die fliek <\/span>Semi-soet<\/span><\/i> gespeel nie, so dis definitief \u2019n bietjie moeiliker om hierdie een te vertolk. Hier is ook baie meer danse sowel as intiemer toneelspel betrokke.\u00a0<\/span>\u00a0<\/span><\/p>\n

Die beste wat ek kan doen, is om die fliek oor en oor te kyk. Nie om Nico Panagio te <\/span>copy <\/span><\/i>nie, maar om my eie <\/span>flavour <\/span><\/i>na die karakter te bring. Dis om seker te maak dat ek die regte <\/span>vibe <\/span><\/i>na die musiekblyspel toe bring.<\/span>\u00a0<\/span><\/p>\n

En ja, dis maar net om oor en oor te repeteer, en om in die rol in te kom. Hierdie keer is weliswaar by Monte Casino Teatro wat baie meer intens is, en baie harder werk.<\/span>\u00a0<\/span><\/p>\n

Daar is baie meer dialoog, baie meer snaakse oomblikke, en ook baie meer werk. My medespeler is Anel, en ek het baie vertroue in haar. Sy was in die fliek en sy weet wat sy doen. Ek vat haar leiding dus baie ernstig op. Ek kan net my beste lewer en goed voorberei.\u00a0<\/span><\/p>\n

 <\/p>\n

\"\"\u00a0<\/span><\/p>\n

\u00a0<\/span><\/p>\n

‘n Vraag aan Anel: Hoe voel dit om meer as tien jaar later, na \u2019n vervolgfliek en \u2019n\u00a0 suksesvolle musiekblyspel, steeds gehore met <\/span><\/b>Semi-soet<\/span><\/i><\/b> te bekoor?<\/span><\/b>\u00a0<\/span><\/h5>\n

Anel:<\/span><\/b> Ja, ek moet eerlikwaar s\u00ea, ek kan verskriklik duidelik die oomblik in 2009 onthou toe ek en my oorlede man, James, besluit het om <\/span>Semi-soet<\/span><\/i> te doen. Ek weet nie hoekom nie, maar dit is so duidelik in my kop. Dit was \u2019n Saterdagaand, en ons was op pad na vriende toe vir aandete. Ons het pas met ons eerste fliek, <\/span>Discreet<\/span><\/i>, klaargemaak, wat \u2019n onafhanklike fliek was. Ons het gepraat oor wat ons volgende gaan doen en besluit om iets meer kommersieel te doen. Ons het by \u2019n verkeerslig in Linden gestop, en toe draai James, my baie Skotse man na my toe, en s\u00ea vir my: \u201cAnel, wat jy volgende moet doen, is om \u2019n Afrikaanse Hollywood-styl romantiese komedie vir die volk te maak.\u201d<\/span>\u00a0<\/span><\/p>\n

En dis waar <\/span>Semi-soet<\/span><\/i> gebore is, en as jy daai tyd, dit was 2009, vir my kom s\u00ea het 17 jaar later gaan dit \u2019n lokettreffer wees,\u2019n gesinsgunsteling wat mense oor en oor kyk, en dat <\/span>Semi-Soeter<\/span><\/i>, wat die opvolgfliek is, die eerste Afrikaanse oorspronklike fliek op Netflix sou word, en dat dit \u2019n suksesvolle musiekblyspel sou wees, en boonop een wat by Montecasino Teatro, gaan speel, het ek <\/span>genuine<\/span><\/i> in jou gesig gelag. Maar hier is ons nou, en hoe lekker om te dink, dat die Teatro met sy 1\u202f800 sitplekke nou soveel plek het om hierdie <\/span>joy<\/span><\/i> met meer mense te deel. Ek wil dus s\u00ea: Kom kyk, en moenie wag nie, want ons het laas keer uitverkoop. Moenie dat dit weer gebeur nie!<\/span><\/p>\n

 <\/p>\n