{"id":162897,"date":"2026-03-13T11:28:56","date_gmt":"2026-03-13T09:28:56","guid":{"rendered":"https:\/\/novanews.co.za\/rooirose\/?p=162897"},"modified":"2026-03-13T11:30:30","modified_gmt":"2026-03-13T09:30:30","slug":"minette-kry-haar-droomafspraak-met-ruan-op-op-my-eish-maar-kan-hul-konneksie-hou","status":"publish","type":"post","link":"https:\/\/novanews.co.za\/rooirose\/minette-kry-haar-droomafspraak-met-ruan-op-op-my-eish-maar-kan-hul-konneksie-hou\/","title":{"rendered":"Minette wen droomafspraak met Ruan op ‘Op my eish!’, maar kan hul konneksie hou?"},"content":{"rendered":"

Episode nege van\u00a0Op my eish!<\/i><\/strong>\u00a0het met \u2019n ontspanne, gesellige atmosfeer afgeskop, maar gou gewys dat die kompetisie vir tyd saam met Ruan al hoe ernstiger raak.<\/span><\/p>\n

Die episode het begin met die dames wat oor ontbyt teruggekyk het op die vorige dag se aktiwiteite. JP het by hulle aangesluit om die plan vir die dag te deel: Ruan sou vir almal braai, en daar sou ook \u2019n paar speletjies wees om die energie hoog te hou. Saartjie het egter aangekondig dat sy vir \u2019n paar dae moet weggaan vir werk.<\/span><\/p>\n

Die groep het later onder \u2019n indrukwekkende kremetartboom ontmoet waar hulle meer oor die boom se geskiedenis geleer het. Die boom is hol aan die binnekant, en die dames het die kans gekry om in te gaan en die boom van binne te verken.<\/span><\/p>\n

Daarna het die pret begin met \u2019n reeks drinkspeletjies.\u00a0<\/a><\/a>In die eerste speletjie het die dames in groepe van drie gekyk wie vier klein balletjies met Donkey Long Tong se vuurblaaspyp eerste oor \u2019n lyn op die tafel kan blaas.\u00a0<\/span>Hermi, Bejanke en Minette se span het gewen, wat beteken het dat Cindy-Lee, Charlene en Jenine \u2019n drankie moes wegslaan.<\/span><\/p>\n

Die volgende speletjie het almal behoorlik laat skaterlag.\u00a0<\/a>Elke deelnemer moes water in hul mond probeer hou terwyl een van die ander dames haar liggies op die sitvlak tik.<\/span>\u00a0Byna niemand kon hul lag hou nie.<\/span><\/p>\n

Terwyl Ruan die braai voorberei het, het die vroue saam met JP \u2019n potjie bierpong gespeel. Kort daarna het almal by die tafel aangesluit, waar Ruan se braaivernuf behoorlik be\u00efndruk het.<\/span><\/p>\n

 <\/p>\n

\"\"<\/p>\n

 <\/p>\n

Die volgende dag het \u2019n nuwe uitdaging gewag. Charlene, Minette en Bejanke is genooi om aan \u2019n aktiwiteit deel te neem waar \u2019n aand alleen saam met Ruan op die spel was.<\/span><\/p>\n

Die uitdaging het hul vertroue en luistervermo\u00eb getoets. Agt persoonlike items van Ruan \u2013 onder meer \u2019n bottel wyn, \u2019n appel, seep, \u2019n botteltjie, skoene, \u2019n hemp, \u2019n gimnasiumbal en gewigte \u2013 is op die terrein versteek. Die dames is geblinddoek en moes al agt items opspoor deur net na Ruan se instruksies te luister. Die vinnigste soeker sou die prys wen.<\/span><\/p>\n

Voor die uitdaging het Minette ges\u00ea: \u201cDis r\u00earig \u2019n besonderse\u00a0date<\/i>, regte\u00a0one-on-one time<\/i>\u00a0saam met Ruan. So, ek gaan my heel beste lewer.\u201d<\/span><\/p>\n

Charlene was ewe vasberade: \u201cEk het r\u00earig hierdie\u00a0challenge<\/i>\u00a0nodig. Ek m\u00f3\u00e9t wen. So, maak nie saak wat ek doen nie, ek gaan moet baie mooi luister en fokus.\u201d<\/span><\/p>\n

Charlene was eerste aan die beurt, gevolg deur Bejanke en daarna Minette. Minette het uiteindelik die vinnigste tyd behaal en die gesogte afspraak met Ruan gewen.<\/span><\/p>\n

 <\/p>\n\n\t\t