{"id":160835,"date":"2026-01-13T15:08:33","date_gmt":"2026-01-13T13:08:33","guid":{"rendered":"https:\/\/novanews.co.za\/rooirose\/?p=160835"},"modified":"2026-01-13T15:27:20","modified_gmt":"2026-01-13T13:27:20","slug":"ons-kyk-terug-verlede-jaar-se-ma-en-dogter-kompetisie-wenners-2","status":"publish","type":"post","link":"https:\/\/novanews.co.za\/rooirose\/ons-kyk-terug-verlede-jaar-se-ma-en-dogter-kompetisie-wenners-2\/","title":{"rendered":"ONS KYK TERUG | Verlede jaar se ma-en-dogter-kompetisie-wenners!"},"content":{"rendered":"

Deur Maretha Botes.<\/em><\/p>\n

Foto\u2019s, hare en grimering: Willem Botha, <\/span>Willem Botha Beauty<\/span><\/em><\/p>\n

Klere: Diaan Daniels Couture<\/span><\/em><\/p>\n

 <\/p>\n

Tenile M\u00fcller<\/strong> en Lucet de Beer M\u00fcller<\/strong> se ma-en-dogter-reis was nie altyd maanskyn en rose nie. Maar di\u00e9 wenners van ons ma-en-dogter-kompetisie, kan getuig dis juis die swaarkrytye wat hul band vandag sterker as ooit gemaak het.<\/span><\/p>\n

\n

\"\"<\/div>\n
\n

 <\/p>\n

Geen droom is te groot om gedroom te word nie, glo di\u00e9 ma-en-dogter-span wat vandag hard werk om soveel as moontlik van hul drome \u2013 saam \u00e9n op hul eie \u2013 waar te maak. \u201cWant wat sal die lewe dan nou wees as ons nie met verwagting na m\u00f4re kan uitsien nie?\u201d s\u00ea hulle.\u00a0<\/span><\/p>\n

Lucet (50) en Tenile (21) gesels \u2019n hond uit \u2019n bos vanuit hul huis in Pretoria-Oos oor hoe hulle tot hi\u00e9r gekom het. Hier waar hulle kan terugkyk en hul reis met al sy hoogte- en laagtepunte kan waardeer. Maar bowenal kyk hulle vorentoe om die toekoms met oop arms tegemoet te gaan.<\/span><\/p>\n

\u201cDit gaan regtig goed met ons!\u201d s\u00ea Lucet opgewonde. Di\u00e9 oud-lugwaardin se blou o\u00eb straal van geluk. Sy en Tenile is besig om hul droom te verwesenlik om \u2019n geleentheidsbeplannings onderneming, Schepper, op die been te bring. \u201cDis nou nie meer net \u2019n droom nie, dis nou \u2019 n werklikheid,\u201d s\u00ea sy.\u00a0\u00a0<\/span><\/p>\n

Vir Tenile val dinge ook netjies in plek. Sy het di\u00e9\u00a0 jaar vir die Mej Suid-Afrika-kompetisie ingeskryf \u2013 iets waarvan sy al as kleuter gedroom het. Sy sou di\u00e9 platform graag wil gebruik om die stigma wat n\u00e1 al die jare steeds aan depressie kleef, te verbreek. Vir h\u00e1\u00e1r is daar ook \u2019n verlowing in die dagboek. Sy en haar k\u00earel van twee jaar, Jacques de Jager, is dolverlief en ernstig om saam \u2019n toekoms te bou.\u00a0\u00a0<\/span><\/p>\n

Maar voor Tenile en Lucet op di\u00e9 punt kon kom waar m\u00f4re hulle opgewonde maak, moes hulle hul weg deur die donker vind om weer saam gesond te wees.\u00a0<\/span><\/p>\n

Hul verhaal is een van deernis, respek en vernuwing. Van seerkry en opstaan. Van saamstaan en groei. Depressie is \u2019n gemene deler in hul verhouding en ook een wat maak dat hulle mekaar se uitdagings verstaan en respekteer. As gesin is hulle deur diep waters en sou hulle verskeie kere deur lewe en dood navigeer. Hulle praat ook openhartig oor hul selfdoodpogings \u2013 Lucet as jong ma, en Tenile as tiener. \u201cDeur die genade was ons nie suksesvol (in ons pogings) nie, en kan ons vandag gesels oor depressie en die stigma wat daaraan kleef,\u201d s\u00ea Lucet. \u201cSoveel mense verstaan steeds nie wat depressie is en wat die impak daarvan op \u2019n mens en jou verhoudings is nie.\u201d<\/span><\/p>\n

In haar brief oor haar en haar ma se verhouding, skryf Tenile: \u201cEk en my ma is soos twee sterre in dieselfde naghemel: uniek, maar onafskeidbaar verbind deur \u2019n diep, onbreekbare band. Ons verhouding is nie altyd eenvoudig of perfek nie, maar dit is eg en deurleef. Ons het albei deur groot depressietye gegaan \u2013 donker dae wat ons w\u00eareld kleiner en swakker gemaak het \u2013 en ironies genoeg was dit hierdie swaarkry wat ons nader aan mekaar gebring het.\u201d<\/span><\/p>\n

Tenile is die middelkind van drie. Sy het \u2019n ouer broer, Gerardt (23) en jonger sussie, Danique. Lucet se depressie het kort n\u00e1 Tenile se geboorte in 2004 kop uitgesteek. Dit was ook in di\u00e9 tyd dat haar ma, Suzette, met baarmoeder-, maagwand- en dikdermkanker gediagnoseer is. Di\u00e9 nuus het die mat onder Lucet uitgeruk.\u00a0<\/span><\/p>\n

\u201cEk is die oudste van twee kinders en moes altyd die sterk een wees. Ek het aan n\u00e1 Tenile se geboorte aan nageboortelike depressie gely en het gesukkel om die nuus van my ma se kanker te verwerk,\u201d s\u00ea Lucet.\u00a0<\/span><\/p>\n

Suzette (59) is in 2007, drie jaar n\u00e1 haar diagnose, oorlede. Intussen is Lucet se tweede dogter, Danique (18), gebore. Sy s\u00ea: \u201cEk het gevoel my w\u00eareld tuimel in mekaar. Ek kon nie meer <\/span>cope <\/span><\/i>nie. Ek moes n\u00e1 my ma se dood sterk wees vir my pa, my broer en my kinders. Ekself het geen uitlaatklep gehad nie. Op \u2019n dag het ek my eie lewe probeer neem deur \u2019n oordosis pille en alkohol te sluk.\u201d\u00a0<\/span><\/p>\n

Lucet het op \u2019n manier daarin geslaag om by \u2019n vriendin uit te kom en di\u00e9 het met haar hospitaal toe gejaag. \u201cEk het vir haar ges\u00ea ek is besig om dood te gaan, sy moet my help,\u201d s\u00ea Lucet. \u201cVandag wil ek regtig vir mense s\u00ea depressie is werklik. Dis \u2019n siekte, maar daar is hulp. Moet dit nie alleen probeer dra nie.\u201d<\/span><\/p>\n<\/div>\n

\"\"<\/p>\n

 <\/p>\n

\n

Tenile se depressie het gedurende Covid \u2019n punt bereik waar sy gevoel het haar w\u00eareld tuimel inmekaar. Die wortels daarvan l\u00ea egter in haar kinderjare. Sy verduidelik: \u201cMet alles wat met my ouma gebeur het toe ek baie klein was, en Mamma wat depressief was, het ons boonop byna my sussie verloor toe sy van \u2019n stoel afgeval en \u2019n noodbreinoperasie moes ondergaan. Ek het \u2019n groot deel van my lewe gevoel ek was verantwoordelik, ek kon gekeer het dat sy val. Vandag nog is ek byna oorbeskermend teenoor haar. Ek het, net soos my ma, baie keer gevoel ek moet ander se sterkte en krag wees, maar self het ek nooit met mense oor my eie gevoelens en angs gepraat nie.\u201d<\/span><\/p>\n

Daar was ook \u00e1nder dinge wat met Tenile as kind gebeur het, wat haar onskuld gesteel het. Sy is op agt, en weer op 16, gemolesteer. Sy vertel dat die impak daarvan op haar lewe byna vernietigend was. Sy is ook in die tydperk tussen di\u00e9 twee voorvalle verkrag. Sy glo dat enigeen wat deur sulke trauma gaan, hulp moet kry.\u00a0\u00a0<\/span><\/p>\n

Dinge het in Covid vir di\u00e9 blondekop net te veel geword. Daar was in di\u00e9 tyd geen sport, \u2019n reuse-uitlaatklep vir Tenile wat \u2019n kranige atleet en netbalspeler was, toegelaat nie. Haar k\u00earel van toe het hul verhouding be\u00ebindig en haar vriendinne het hul rug op haar gedraai. Een aand, terwyl haar ouers nie tuis was nie, het sy \u2019n hand vol pille gesluk in die hoop om nie weer wakker te word nie.\u00a0 Danique het op haar afgekom \u00a0 \u00a0 , haar wakker geruk en hul ouers gebel. Hulle is dadelik met haar na die hospitaal waar sy in die ho\u00ebsorgeenheid opgeneem is. Hierna het intensiewe terapie en berading gevolg, en Tenile sien steeds elke paar maande \u2019n terapeut.\u00a0\u00a0<\/span><\/p>\n

\u201cEk is dankbaar ek leef. Vandag kan ek my storie deel en ek hoop werklik dit kan \u2019 n verskil in iemand anders se lewe maak. Ek en my ma is ook soveel nader aan mekaar. Ons het mettertyd geleer hoe om mekaar te ondersteun sonder om mekaar te probeer <\/span>fix<\/span><\/i>. Ons verstaan dat dit soms net tyd en geduld neem om deur \u2019n moeilike tyd te kom. Dit het ons verhouding sterker gemaak \u2013 omdat ons mekaar in ons mees weerlose oomblikke gesien het,\u201d s\u00ea sy.\u00a0<\/span><\/p>\n<\/div>\n

\"\"<\/p>\n

 <\/p>\n

\n

Geniet die soet en die sout<\/strong><\/h4>\n

As deel van hul prys in die ma-en-dogter-kompetisie is Lucet en Tenile met \u2019n mooimaakdag deur Willem Botha bederf. Hieroor kan die twee nie uitgepraat raak nie. Lucet s\u00ea: \u201cDit was lieflik verby! Ons het soos koninklikes gevoel. Ek dink ons vergeet soms van onsself. Ons kyk nie meer in die spie\u00ebl nie, en fokus op ander. Maar hy het my weer gewys ek \u00eds mooi.\u201d\u00a0<\/span><\/p>\n

Vir Tenile was dit net so spesiaal. \u201cDie rok, die parfuum, die grimering en <\/span>glamour<\/span><\/i>. Alles in \u2019 n pakkie. Ons vergeet hoe belangrik dit is om te hoor jy is spesiaal. Jy is mooi. Sulke woorde dra gewig en is belangrik om te weet. So, sit aan daai lipstiffie, trek aan jou mooi rok en spuit die parfuum. Doen moeite, daag op en bo alles, geniet dit \u2013 die soet, die sout, die alles.\u201d<\/span><\/p>\n<\/div>\n

 <\/p>\n

\"\"<\/p>\n

 <\/p>\n

Hul raad aan ander ma\u2019s en dogters wat hul verhouding wil versterk, is eenvoudig: wees daar vir mekaar. \u201cNie om mekaar te verander of reg te maak nie, maar net om daar te wees \u2013 sonder oordeel, sonder verwagtinge. Skep ruimte vir eerlike gesprekke en wees geduldig met mekaar se seer. Onthou dat niemand perfek is nie, maar dat liefde in klein, eenvoudige gebare l\u00ea.<\/span>\u201cMy ma is nie net my ma nie; sy is my veilige hawe, my vennoot in lag en huil, my bewys dat swaarkry \u2019n mens net dieper aan mekaar kan bind. As jy jouself in \u2019n donker plek bevind, weet net dat jy nooit alleen hoef te wees nie \u2013 daar is altyd iemand wat verstaan. Vir my, is daardie iemand my ma,\u201d s\u00ea Tenile.<\/span><\/p>\n

\n

\"\"<\/p>\n

\n

 <\/p>\n

Is julle ‘n ma & dogter duisend? Wen pryse van meer R85 000!<\/strong><\/h4>\n

 <\/p>\n

rooi rose is weer op soek na \u2019n ma en dogter wat \u2019n baie hegte band het.<\/p>\n

Vertel ons wat dit is wat jul verhouding so spesiaal maak en julle het \u2019n kans om \u2019n oormaak- en fotosessie deur Willem Botha en Willem Botha Beauty, \u2019n uitrusting vir elkeen deur Anel Botha Couture, \u2019n goue ring vir elk van Scherman’s en \u2019n geskenkpak vol skoonheidsprodukte van NUXE te wen. Jul fotosessie sal ook in \u2019n uitgawe van rooi rose verskyn.<\/p>\n

 <\/p>\n<\/div>\n

<\/div>\n
\n\n\t\t