{"id":160366,"date":"2025-12-11T09:49:59","date_gmt":"2025-12-11T07:49:59","guid":{"rendered":"https:\/\/novanews.co.za\/rooirose\/?p=160366"},"modified":"2025-12-11T10:03:26","modified_gmt":"2025-12-11T08:03:26","slug":"die-wag-is-verby-een-keer-om-die-son-terug-vir-n-tweede-omwenteling","status":"publish","type":"post","link":"https:\/\/novanews.co.za\/rooirose\/die-wag-is-verby-een-keer-om-die-son-terug-vir-n-tweede-omwenteling\/","title":{"rendered":"DIE WAG IS VERBY! | ‘Een keer om die son’ terug vir \u2019n tweede omwenteling"},"content":{"rendered":"

Die dramareeks Een keer om die son<\/em><\/strong> was in 2024 \u2019n reusetreffer. Die goeie nuus is dat die Van Wyks ons vir nog \u2019n omwenteling gaan neem wanneer die nuwe seisoen op 20 Januarie op kykNET begin.<\/p>\n

Een keer om die son <\/em>se tweede seisoen skop op Nuwejaar af, maar hierdie keer is die Van Wyks nie almal saam om dit te vier nie. Die lewe het sy pad geloop, en elkeen het hul eie uitdagings \u2013 nie net op die eerste dag van die jaar nie, maar ook in die twaalf maande daarna. Onder die uitdagings tel aanvaarding vind, tweede kanse aangryp, verslawing, lewensveranderende mediese probleme en elkeen se soeke na hulle plek in die familiekring.<\/p>\n

Jacques Bessenger is weer te sien as dr. Ruan van Wyk, \u2019n neuroloog wat sy werk soms voor ander prioriteite plaas. Jana Kruger is Lani van Wyk, wat in die eerste seisoen oorlede is en wie se dood meer vrae as antwoorde gelos het. Lani is in terugblikke weer deel van seisoen 2.<\/p>\n

Ruan en Lani se kinders is Markus (Liam Bosman), Leandri (Alma van Heerden) en Sophia (Klara van Zyl), en in seisoen 2 het elkeen \u2019n uitdaging wat in hulle pad staan.<\/p>\n

Albert Maritz is te sien as Sebastian, die afgetrede professor in insektekunde, en Joanie Combrink is Elma, die matriarg van die Van Wyks wat in seisoen 1 met Alzheimer se siekte gediagnoseer is.<\/p>\n

Am\u00e9 (Donnalee Roberts), Ruan se jonger suster, se huwelik het in die eerste seisoen op die rotse beland. In seisoen 2 vind sy haar voete as onafhanklike en ambisieuse vrou, maar sal sy weer liefde vind?<\/p>\n

\u2019n Nuwe karakter in seisoen 2 is Erika du Randt, \u2019n maatskaplike werker wie se loopbaan haar eerste en enigste liefde is. Die rol word deur Cindy Swanepoel vertolk.<\/p>\n

Ander karakters wat terugkeer, is Sebastian en Elma se goeie vriende Salie en Jan Wessels (Susanne Beyers en Pierre van Pletzen), Markus se dansmaat, Charlie (Simone Neethling), Leandri se k\u00earel, Xavier (Alex van Dyk), Lani se pa, Trevor de Kock (Deon Lotz), die verpleegsuster Karen (Isadora Verwey) en Charl Boshoff (Ivan Botha), Am\u00e9 se kollega. Die jong akteur Heinrich Wentzel, bekend vir sy rolle in Niggies<\/em> en Die nuusmakers<\/em>, is te sien as Elijah Smith, met wie Leandri se pad op \u2019n ongewone manier kruis.<\/p>\n

 <\/p>\n

\"\"<\/p>\n

 <\/p>\n

Die reeks is deur Ivan Botha, Donnalee Roberts, Liani Jansen van Rensburg, Marista van Eeden en Almero Welgemoed geskryf. Ivan, Donnalee en Danie Bester is die vervaardigers, en Ivan is die regisseur. Hyuandai is \u2019n trotse borg van Een keer om die son<\/em>.<\/p>\n

\u201c \u2019n Belangrike beginpunt vir ons was beslis wat die hart van die tweede seisoen moet wees; wat daardie boodskap en gevoel is waarmee ons kykers n\u00e1 elke episode en n\u00e1 afloop van die reeks wil laat,\u201d s\u00ea Donnalee oor hoe hulle die legkaart vir die tweede seisoen gebou het. \u201cDit het elke keer teruggekom na een woord: hoop. Mense moet besef dat in hierdie lewe \u2013 maak nie saak hoeveel keer jy struikel nie \u2013 daar altyd hoop is: hoop vir opstaan, hoop vir vernuwing, hoop op \u2019n tweede kans. Maak nie saak hoe donker tye voel nie, die son gaan altyd weer skyn.\u201d<\/p>\n

\u201cDit is altyd \u2019n uitdaging om \u2019n tweede seisoen aan te pak, veral as die eerste seisoen \u2019n sukses was,\u201d s\u00ea Ivan. \u201cOns is uiteraard dankbaar vir die sukses en dat dit so geliefd was, maar ons het ook geweet dat die storie nog nie klaar vertel is nie. Dit was \u2019n fees om die karakters weer af te stof en as \u2019t ware weer ou wonde oop te krap. As jy gehou het van seisoen 1, gaan jy mal wees oor seisoen 2.\u201d<\/p>\n

Hy s\u00ea daar is iets vir almal en storielyne vir alle generasies.<\/p>\n

\u201cDaar is ook \u2019n lekker spanningslyn wat deur hierdie seisoen loop,\u201d s\u00ea Ivan.<\/p>\n

\u201cJa, kykers kan alles verwag \u2013 spanning, liefde, hartseer, humor. Die balans van seisoen 2 is voller as die eerste seisoen,\u201d s\u00ea Donnalee. \u201cDaar word verskeie temas aangeraak: angs en depressie, om jou eie sterflikheid in die o\u00eb te kyk, wat n\u00e1 die dood gebeur, verslawing en hoe maklik dit kan gebeur, generasies wat weer saam onder een dak moet woon en ja, tweede kanse. In die hart en kern kom ons egter terug na die feit dat familie die middelpunt van jou sonnestelsel moet wees.\u201d<\/p>\n

Sy s\u00ea families is geneig om dinge onder die mat te vee. \u201cSoos die Van Wyks ook geneig is om te doen, maar hierdie keer werk hulle baie hard om die mat op te rol.\u201d<\/p>\n

Vir Ivan was dit belangrik om vernuwing na die tweede seisoen te bring. \u201cOns het \u2019n groot storiew\u00eareld met verskeie plekke waar ons verfilm het. Dan is daar natuurlik ons ongelooflike akteurs en tegniese span wat net so hard gewerk het om self meer na die tweede seisoen toe te bring. N\u00e1 die partytjie op die laaste dag van ons verfilming, het ek \u2019n boodskap van een van die produksielede gekry wat ges\u00ea het dit het vir haar gevoel of sy weer lig sien. Ek hoop kykers sien daardie lig ook.<\/p>\n

\u201cOns hoop hierdie seisoen gee vir mense die moed om gesprekke met hulle eie families oop te breek \u2013 om nie bang te wees hulle familie verstaan hulle nie of bang te wees vir oordeel nie. Ons moet begrip vir mekaar h\u00ea en besef ons is eintlik net hier om mekaar huis toe te loop.\u201d<\/p>\n

Vir Donnalee was dit \u2019n voorreg om weer saam met Ivan as regisseur te werk. \u201cHy is op dag een dieselfde as wat hy op dag 65 van verfilming is. As regisseur en produksieleier het hy \u2019n ongelooflike vermo\u00eb om vir almal hulle spasie te gun. En omdat hy so hard werk, inspireer hy ander om ewe hard te werk en net so diep te delf.\u201d<\/p>\n

 <\/p>\n

KYK | Een keer om die son | <\/em>Seisoen 2 se voorskou<\/strong><\/h4>\n