{"id":155875,"date":"2025-07-11T11:22:04","date_gmt":"2025-07-11T09:22:04","guid":{"rendered":"https:\/\/novanews.co.za\/rooirose\/?p=155875"},"modified":"2025-07-11T11:43:52","modified_gmt":"2025-07-11T09:43:52","slug":"silwerskermfees-kortfilm-verken-ruimte-liefde-en-afrikaanse-identiteit","status":"publish","type":"post","link":"https:\/\/novanews.co.za\/rooirose\/silwerskermfees-kortfilm-verken-ruimte-liefde-en-afrikaanse-identiteit\/","title":{"rendered":"Silwerskermfees-kortfilm verken ruimte, liefde en Afrikaanse identiteit"},"content":{"rendered":"

In vervaardiger Emma Kotze en skrywer-regisseur Johann Vermaak se wetenskapsfiksie-drama, ARK<\/strong>, word die grense van Afrikaanse rolprente verbreed en bekende temas innoverend vanuit \u2019n buiteruimtelike konteks belig. Hulle gebruik regte akteurs, marionette, spesiale effekte en spesiaal geboude stelle.<\/span><\/p>\n

 <\/p>\n

\"\"<\/p>\n

 <\/p>\n

Die gevestigde filmmakers <\/span>Johann en Emma het oor die fliek gesels:<\/strong><\/p>\n

 <\/p>\n

Soos met jou vorige Silwerskermfees-kortfilm, Die groot twis, verskuif jy met ARK die grense van inhoud wat in Afrikaans gemaak word?<\/strong><\/h4>\n

 <\/p>\n

Johann:<\/strong>\u00a0Ek is baie lief vir 70\u2019s-wetenskapsfiksie. Ek is mal oor die visuele styl en amper na\u00efewe optimisme oor \u2019n utopiese toekoms. Die Afrikaanse televisiereeks Interster was een van my inspirasies. Die idee was om daardie selfde gevoel en satiriese uitkyk te transponeer na Suid-Afrika en na Afrikaans. Daar is nuanses in die datums wat ons gebruik het wat kykers hopelik sal oplet.<\/p>\n

 <\/p>\n

\"\"<\/p>\n

 <\/p>\n

Julle speel in ARK met verskillende temas, waaronder die liefde, die mite van Afrikaners as \u2019n uitverkore volk \u2026 Hoe sou jy die fliek se onderliggende temas in \u2019n neutedop beskryf?<\/strong><\/h4>\n

 <\/p>\n

Johann:<\/strong>\u00a0Ek het doelbewus baie vlakke ingesluit, maar die hart van die storie is \u2019n liefdesverhouding. Ons het al baie hierdie verhaal sien uitspeel: twee mense wat hul verhouding begin met hoop vir die toekoms, en dan ontrafel dinge. Ons neem dit egter na ekstreme atmosfere \u2026 letterlik. In wese gaan ARK oor die mites wat ons vir onsself vertel.<\/p>\n

Emma:<\/strong>\u00a0Getrou aan die wetenskapsfiksie-genre, stel ARK die kyker bekend aan \u2019n verbeelde w\u00eareld, terwyl dit eintlik met alledaagse of oertemas omgaan. Dit stel ondersoek in na die identiteit van die mens, hoe ons dit in intieme verhoudings vestig, asook in die groter kollektief van kulturele identiteit. Deur d\u00edt alles het ons deurlopend daarna gestreef om die karakters steeds herkenbaar te maak. Dit was vir ons belangrik dat die kyker vir hulle empatie kan h\u00ea, ten spyte van die skynbaar onbekende w\u00eareld en omstandighede waarin dit afspeel.<\/p>\n

 <\/p>\n

\"\"<\/p>\n

 <\/p>\n

ARK is visueel treffend. Hoe het julle op die voorkoms van die fliek besluit?<\/strong><\/h4>\n

 <\/p>\n

Johann:<\/strong>\u00a0Waar Die groot twis in my kop soos \u2019n Pierneef-skildery was, was hierdie fliek meer soos \u2019n Mondrian. Dit klink dalk pretensieus, maar die idee was om met sterk blokke kleur \u2019n amper kliniese gevoel te skep om deur die fisieke w\u00eareld \u2019n spie\u00eblbeeld te skep van wat in die karakters se binnew\u00eareld aangaan. In die ruimteskip dra die line\u00eare strakheid byvoorbeeld by tot die spanning in die verhouding.<\/p>\n

Toe ek jonger was, het ek Krzysztof Kie\u015blowski se Three Colours-trilogie gekyk en dit het \u2019n groot impak op my gehad. Ek wou \u2019n fliek maak waarin kleur \u2019n belangrike rol speel en die drie verskillende w\u00earelde was my wegspringpunt. Broodkrummels deur die loop van die film lei die kyker om die misterie te ontsyfer.<\/p>\n

Die kinematograaf, Jorrie van der Walt, is geniaal. Hy is sekerlik een van die beste kinematograwe \u2013 nie net in Suid-Afrika nie, maar w\u00eareldwyd het hy ongelooflike werk gedoen. Arlene Wentzel se produksie-ontwerp is fantasties.<\/p>\n

 <\/p>\n

Daar is heelwat spesiale effekte gebruik. Hoe is dit ontwikkel?<\/strong><\/h4>\n

 <\/p>\n

Johann:<\/strong>\u00a0Ons het vooraf baie navorsing gedoen oor die visuele en konseptuele omgewing waarbinne die fliek sou afspeel. Die briljante Loubser Claassen van Filmscape, Mashalane Mothiba van Lyrical VFX, en Charmaine Greyling van Strangelove Studios het vir ons hierdie w\u00eareld geskep. Jy koop letterlik \u2019n 3D-omgewing, amper soos \u2019n parallelogram, en dan voeg jy teksture en elemente by om jou w\u00eareld te skep.<\/p>\n

 <\/p>\n

\"\"<\/p>\n

 <\/p>\n

Emma, dit was jou eerste ervaring as vervaardiger. Wat was die uitdagings, leerkurwes en hoogtepunte?<\/strong><\/h4>\n

 <\/p>\n

Dit was een groot leerskool! Ek is gelukkig mal oor \u2019n spreadsheet, so daardie gedeelte van die rol het my nie afgeskrik nie. Dit is egter skrikwekkend om te besef hoe min jy werklik weet van \u2019n medium waaraan jy al redelik baie tyd spandeer het. Gelukkig was ons hele kreatiewe en produksiespan ongelooflik ondersteunend en hulle het my met soveel geduld om elke hoek en draai bygestaan. Ek kan sonder twyfel s\u00ea dat dit vir my die hoogtepunt was om opnuut deur mense se goedgunstigheid verras te word wanneer almal op \u2019n kreatiewe droom inkoop.<\/p>\n

 <\/p>\n

Die musiek vir ARK is deur Charl-Johann Lingenfelder gekomponeer. Dit moet baie bevredigend wees wanneer \u2019n storie uit jou pen s\u00f3 \u2019n besonderse klankbaan kry?<\/strong><\/h4>\n

 <\/p>\n

Johann:<\/strong>\u00a0Die musiek in ARK is soos \u2019n vierde, alomteenwoordige karakter wat die emosie dryf. Ek en Charl-Johann het dadelik gekliek toe ons oor die fliek begin praat het. Ons verstaan die taal van musiek op \u2019n soortgelyke manier. Soos in die Three Colours-trilogie, wat soos die kreet van \u2019n land is, is daar in die klankbaan sprake van melodrama, maar ook van satire. Onthou, dis ernstig, maar ook bietjie ni\u00e9-ernstig.<\/p>\n

 <\/p>\n

Hoe het julle op Ben Albertyn en Kristen Raath vir die hoofrolle besluit?<\/strong><\/h4>\n

 <\/p>\n

Johann:<\/strong>\u00a0Dit was nogal \u2019n storie om die regte akteurs te vind. Ek ken Ben goed, maar ek het aanvanklik \u2019n akteur met \u2019n ander tipe voorkoms gesoek. Die akteur wat ons gekies het, se skedule het nie uitgewerk nie, so Ben het drie dae voor ons begin skiet het soos \u2019n wonderwerk ingevlieg. Hy is \u2019n baie intelligente akteur en het \u2019n dieper nuanse aan die karakter verleen as wat ek as skrywer my kon verbeel.<\/p>\n

Ek het Kristen nie voorheen geken nie, maar ek was bekend met haar werk, soos in Wyfie<\/em>. Ons het \u2019n baie spesifieke vrou vir die rol gesoek. Eintlik \u2019n \u201cmeisie\u201d. En nee, dis nie \u2019n Freudiaanse glips nie. Ons het vir hierdie rol iemand nodig gehad wat jonk is, met onskuldige o\u00eb, maar ook met krag. Sy het ons weggeblaas.<\/p>\n

 <\/p>\n

KYK | Ark se amptelike lokprent\u00a0<\/strong><\/h4>\n