{"id":153081,"date":"2025-05-16T12:04:52","date_gmt":"2025-05-16T10:04:52","guid":{"rendered":"https:\/\/novanews.co.za\/rooirose\/?p=153081"},"modified":"2025-05-16T12:04:52","modified_gmt":"2025-05-16T10:04:52","slug":"simone-pretorius-verjaar-ek-is-n-beter-mens-sedert-ek-n-ma-is","status":"publish","type":"post","link":"https:\/\/novanews.co.za\/rooirose\/simone-pretorius-verjaar-ek-is-n-beter-mens-sedert-ek-n-ma-is\/","title":{"rendered":"Simon\u00e9 Pretorius verjaar! | ‘Ek is \u2019n beter mens sedert ek \u2019n ma is.’"},"content":{"rendered":"

Deur Ri\u00ebtte van der Wat<\/span><\/em><\/p>\n

Foto’s, hare en grimering: Willem Botha & Willem Botha Beauty<\/span><\/em><\/p>\n

 <\/p>\n

 <\/p>\n

Simon\u00e9 Pretorius<\/strong> is selfs nog meer petite in lewende lywe as op die kassie.<\/span>
\n<\/span>Waar ons by \u2019n WCafe vir koffie ontmoet, hare \u2019n cortado met hawermoutmelk, sit sy met \u2019n stylvolle oorgroottrui en haar bene in swart jeans wat sy onder haar in vou.<\/span><\/p>\n

Behalwe vir haar liggaamsbou, is daar verder niks \u201ckleins\u201d aan Simon\u00e9 nie. Alles wat sy\u00a0 s\u00ea en die manier waarop sy leef, spreek van haar sonderlinge doelgerigtheid en die erns waarmee sy haar drome aanpak.<\/span><\/p>\n


\n<\/span>\u201cMy hartsbegeerte om eendag vir God te kan s\u00ea ek was getrou in dit wat Hy van my gevra het. Ek was \u2019n getroue dienskneg en \u2019n goeie ma; ek het vrug gedra as iemand wat lief was vir Hom. Iemand wat eerlik en geduldig is met my kinders en met almal op stel, en dat ek \u2019n gesonde, gelukkige huwelik gehad het,\u201d s\u00ea sy.<\/span><\/p>\n


\n<\/span>Haar geloof is haar \u2019n rigtingwyser: \u201cGod is die liefde van my lewe. My alles.\u201d<\/span>
\n<\/span>Toe sy dus vroe\u00ebr vanjaar die geleentheid gekry het om haar jarelange regiedroom uit te leef, het sy daaraan vasgehou dat die Here haar vir di\u00e9 projek geroep het, al was haar seuntjie, James, in daardie stadium maar vyf weke oud. Haar dogtertjie, Harper, is drie.<\/span><\/p>\n


\n<\/span>Simon\u00e9 het haar debuut in regie met die fliek <\/span>Som van twee<\/span><\/i>, wat in Augustus by die Silwerskermfees vertoon is, gemaak. Di\u00e9 fliek gaan oor Henk (Louw Venter), \u2019n sielkundige wat sy vrou in \u2019n motorongeluk verloor en nie weet hoe om die verlies te hanteer nie. Boonop het hy en sy seun, Renier (Adriaan Havenga), \u2019n stram verhouding. Dan beland Henk in die sop oor \u2019n onbesonne ding wat hy in sy matriekjaar aangevang het en sy seun moet as sy wiskunde-tutor instaan.<\/span><\/p>\n


\n<\/span>Toe kykNET sowat twee jaar gelede gevra het vir voorleggings vir nuwe vollengte flieks, het Simon\u00e9, haar vervaardigingsvennoot Dries Scholtz en haar universiteitsvriendin, die skrywer Liani Janse van Rensburg, met di\u00e9 projek vorendag gekom.<\/span>
\n<\/span>\u201cEk het in daai stadium reeds drie draaiboeke vir flieks ontwikkel wat nooit gemaak is nie en ek was baie teleurgesteld daaroor. Ek wou so graag regie doen en toe vra ek Liani om iets te skryf. Sy het die idee in \u2019n nuusberig gekry oor \u2019n Nederlandse vrou wat by haar skoolre\u00fcnie gebieg het sy het \u2019n iologievraestel op ho\u00ebrskool gesteel.<\/span>
\n<\/span>\u201cOns was uit die veld geslaan toe kykNET die fliek aanvaar en d\u00edt boonop nog by die Silwerskermfees wou wys,\u201d s\u00ea Simon\u00e9. \u201cEk het \u2019n stille dood gesterf toe ek besef ons gaan so vroeg n\u00e1 James se geboorte met verfilming moet begin.\u201d<\/span>
\n<\/span>Toe Liani weens ander verpligtinge die skryfproses aan Simon\u00e9 moes oorhandig, het sy die draaiboek verder ontwikkel.<\/span><\/p>\n


\n<\/span>\u201cDit was nie \u2019n storie wat ek uit my eie sou vertel nie, maar toe die tema van vaderloosheid en verlossing duidelik word, het ek gevoel ek h\u00e9t baie om te gee,\u201d onthou sy. \u201cDie Woord wat ons oor James se lewe gekry het, is dat hy die harte van die vaders met die harte van hul seuns sal versoen. Pa-wees het die tema van die fliek geword en dit het my laat besef ek is met die regte ding besig.\u00a0 <\/span>
\n<\/span>\u201cMy hartsbegeerte met di\u00e9 fliek is om vir mense te wys hoe \u2019n pa lyk, ten spyte van sy tekortkominge.\u201d <\/span>
\n<\/span>Die regie het maklik gekom, amper asof sy \u201cdie regte skoene aangetrek\u201d het.<\/span><\/p>\n


\n<\/span>\u201cDie drie weke van verfilming het net reg gevoel. Ek moes baie draaie loop om hier te kom, maar my toneelspel, skryfwerk, ma-wees en huwelik is alles gereedskap wat ek as regisseur kon benut. Dis vervullend om \u2019n aandeel in di\u00e9 aspek van die storie-w\u00eareld te h\u00ea. <\/span>
\n<\/span>\u201cDis lekker om met volle oortuiging te weet waaroor jy passievol is \u2013ek wil di\u00e9 nuwe rigting bemeester.\u201d<\/span><\/p>\n

 <\/p>\n

\"\"<\/p>\n


\n<\/span>
\n<\/span>Duidelike visie<\/b><\/h4>\n


\n<\/span>Veel moeiliker as die regie self was dit om werk toe te moet gaan met so \u2019n klein baba tuis.<\/span>
\n<\/span>\u201cDie eerste dag toe ek Johannesburg toe moes ry en vir Jamie op skaars vyf weke by die huis moes los, het ek geruk soos ek huil in die kar. Ek was histeries en ek weet eintlik nie hoe ek veilig daar gekom het nie.<\/span>
\n<\/span>\u201cDit was vir my belangrik om in daai oomblik eerlik met die Here te wees en te s\u00ea \u2018di\u00e9 ding kos my baie, maar ek kan dit vir U gee, want U het alles vir my gegee\u2019. Dit het baie vrede gebring,\u201d s\u00ea sy, en sluk die trane weg.\u00a0<\/span><\/p>\n


\n<\/span>James het refluks ontwikkel en Simon\u00e9 onthou hoe sy, wanneer sy sesuur saans van stel af tuis kom, vir drie uur lank op die bonsbal met haar baba moes sit en wieg. <\/span>
\n<\/span>\u201cDaar was nie eintlik balans nie, maar alles en almal om my het by my visie ingekoop. En ek het geweet die Here het my daarvoor geroep.\u201d <\/span>
\n<\/span>Sy sou dit nie sonder haar man, Andries, kon doen nie.<\/span><\/p>\n


\n<\/span>\u201cMy man is \u2019n ongelooflike spanmaat. Hy het my aangemoedig om die projek aan te pak en elke keer wat ek oor die kinders skuldig gevoel het, het hy my herinner God is my vangnet en dat my werk aan die fliek \u2019n daad van gehoorsaamheid was. Vir drie weke was ek regisseur. Nie eerstens ma en d\u00e1n regisseur nie. <\/span>
\n<\/span>\u00a0\u201cAndries het my bly herinner d\u00edt is ook ma-wees en dat die fliek soos \u2019n geskenk is wat ons eendag vir die kinders kan wys. Ek het die fliek ook aan James opgedra.\u201d<\/span>
\n<\/span>N\u00e1 die verfilming voltooi is, het sy ernstige uitbranding ervaar.<\/span><\/p>\n


\n<\/span>\u201cOns moes \u2019n nagverpleegster kry omdat ek so moeg was. Ek het baie skuldig gevoel oor die tyd wat ek met my kinders verloor het, maar die Here vergoed nou veelvuldig daarvoor deur die baie ure, wat ek weens Jamie se voedingskomplikasies saam met hom moet deurbring.\u201d \u00a0 \u00a0 <\/span>
\n<\/span>Sy weet nou die drie weke op stel het nie weggevat van die leeftyd van kosbare oomblikke wat vir haar en haar gesin voorl\u00ea nie.<\/span>
\n<\/span>\u201cDie essensie is dat ek d\u00e1\u00e1r moet wees as ma en dat my kinders moet weet ek het hulle onvoorwaardelik lief.\u201d<\/span>
\n<\/span>Haar eie ma, Tinkie Nortmann, was vir haar \u2019n voorbeeld: \u201cSy moes weer \u2019n week n\u00e1 my geboorte voltyds begin werk; ek moes \u2019n bottel vat, maar ek het geen \u2018ma-wonde\u2019 nie. Ek het geen tekortkominge gely\u00a0 nie.\u201d<\/span><\/p>\n

 <\/p>\n

\"\"<\/p>\n

 <\/p>\n

Basta met perfeksie<\/b><\/h4>\n


\n<\/span>Toe Simon\u00e9 die eerste keer ma geword het, het sy baie ho\u00eb eise aan haarself gestel, maar vandag weet sy dis onnodig.<\/span>
\n<\/span>\u201cEk het gesukkel om vir Harper te borsvoed en ek het baie skuldgevoelens ervaar omdat ek haar met \u2019n bottel moes begin voed. Met Jamie het ek geweet dis beter dat hy kos kry en ek het dadelik met die bottel begin. En dis oukei, want weens \u2019n voedingskomplikasie, weet niemand hoe om hom te voed behalwe ek nie.\u201d<\/span>
\n<\/span>Dit verstom haar hoe ma\u2019s geoordeel word.<\/span><\/p>\n


\n<\/span>\u201cMense is bereid om die swart en wit in sekere situasies uit te gooi en tevrede te wees met die grys, maar om een of ander rede is dit anders as dit by ma-wees kom. <\/span>
\n<\/span>\u201cGod het daardie klein lewetjie aan jou toevertrou met die wete dat jy nie perfek is nie. As jy dink jy moet perfek wees om \u2019n ouer te wees, loop jy die leerproses mis. Jy maak nie net jou kinders groot nie, hulle maak jou ook groot.<\/span><\/p>\n


\n<\/span>\u201cMy kinders het my lewe verander en ek is \u2019n beter mens sedert ek \u2019n ma is. Ek is minder selfsugtig; ek het meer grasie vir ander en myself.\u201d<\/span>
\n<\/span>Haar kinders is uiteenlopende mensies \u2013 Harper is \u2019n rabbedoe met \u2019n sterk wil; Jamie is \u2019n vriendelike, sensitiewe baba, wat huil as sy sussie in trane is.<\/span>
\n<\/span>\u201cJy kan al die handleidings lees, maar elke kind is anders. Jy moet hul leiding volg \u00e9n jou instink vertrou.\u201d<\/span>
\n<\/span>Die emosies loop soms hoog in hul huishouding, vertel sy.<\/span><\/p>\n


\n<\/span>\u201cEk \u00e9n Andries is baie emosioneel en as ons boonop oorgestimuleer is n\u00e1 \u2019n lang dag en die kleuter \u00e9n baba huil albei, raak dit wild. Maar ek het geleer om vir my kinders jammer te s\u00ea as ek krapperig was sodat hulle leer dis oukei om foute te maak.\u201d<\/span><\/p>\n


\n<\/span>Sy en Andries vul mekaar aan en Simon\u00e9 skerts sy is dikwels die strenger een.<\/span>
\n<\/span>Harper is so versot op haar pappa dat Simon\u00e9 haar tweede verjaardagpartytjie verlede jaar met \u2019n tong-in-die-kies-pappa-tema gere\u00ebl het, en Andries se gesig op alles van baniere tot strooitjies en \u2019n hempie vir die verjaardagmeisie laat druk het.<\/span>
\n<\/span>\u201cEk hoop ek sal m\u00fd gesig eendag op Jamie se T-hempies kan druk …\u201d skerts sy.\u00a0<\/span><\/p>\n

 <\/p>\n\n\t\t