{"id":148441,"date":"2024-10-08T16:05:29","date_gmt":"2024-10-08T14:05:29","guid":{"rendered":"https:\/\/novanews.co.za\/rooirose\/?p=148441"},"modified":"2024-10-08T16:24:07","modified_gmt":"2024-10-08T14:24:07","slug":"cintaine-schutte-oor-haar-rol-in-wyfie-mense-moet-gesprekke-he-oor-hierdie-goed","status":"publish","type":"post","link":"https:\/\/novanews.co.za\/rooirose\/cintaine-schutte-oor-haar-rol-in-wyfie-mense-moet-gesprekke-he-oor-hierdie-goed\/","title":{"rendered":"Cintaine Schutte oor haar rol in ‘Wyfie’: “Mense moet gesprekke h\u00ea oor hierdie goed”"},"content":{"rendered":"

Wyfie<\/em>\u00a0het \u2019n toekenningsmasjien vir Showmax geword, met pryse by MIP Africa en die Silwerskermfees, en benoemings oraloor, vanaf Cannes tot Seoul. Volgende aan die beurt is die Nasionale Rolprent-en-televisie-pryse waar\u00a0Wyfie<\/em>\u00a0vir vyf toekennings benoem is: beste televisiereeks (met draaiboek), beste Afrikaanse televisiereeks, beste nuweling (Mienke Ehlers, sy het di\u00e9 prys by die Silwerskermtoekennings ingepalm), beste aktrise in \u2019n televisiereeks (Be\u00e1ta Bena Green, ook by die Silwerskermtoekennings benoem), en beste byspeler (Marguerite van Eeden, wenner van di\u00e9 kategorie by die Silwerskermtoekennings).<\/p>\n

 <\/p>\n

\"\"<\/div>\n

 <\/p>\n

Cintaine Schutte<\/strong> (Fynskrif<\/em>,\u00a0Dinge van \u2019n Kind<\/em>), wat vroe\u00ebr vanjaar \u2019n Naledi-teaterprys ingepalm het, het vir seisoen twee van Wyfie by die rolverdeling aangesluit as Maggie, Shay se ouer liefdesbelangstelling. Sy staan veral uit in vandeesweek se episodes, met Maggie en Shay (Green) wat hul eerste ete as \u2019n paartjie aanbied, en Maggie wat dan in Die Grot wakker word en en haar studentedae herleef as sy saam met Amanda (Celeste Loots van\u00a0Trompoppie<\/em>\u00a0en\u00a0One Piece<\/em>) dagdronk raak.<\/p>\n

 <\/p>\n

\"\"<\/div>\n

 <\/p>\n

Roz Els het met Cintaine oor haar rol in di\u00e9 treffende universiteitstelenovela gesels:<\/em><\/strong><\/p>\n

 <\/p>\n

Hoe het jy deel van\u00a0Wyfie\u00a0<\/em>se rolverdeling geword?<\/strong><\/h4>\n

 <\/p>\n

Ek het die Vrydag \u2019n oudisie gedoen, die Maandag het ek gegaan vir \u2019n\u00a0chemistry test<\/em>\u00a0met Be\u00e1ta, en twee dae later het ek begin skiet!\u00a0Ek was heel verras toe alles so vinnig gebeur het.<\/p>\n

Ek is baie bly die rol het oor my pad gekom. Ek het in daardie stadium al \u2019n bietjie\u00a0Wyfie<\/em>\u00a0gekyk, en dit het na \u2019n lekker projek gelyk, maar ek wou myself ook uitdaag.<\/p>\n

Marcel Spaumer (hoofskrywer) en sy span het toe al \u2019n idee gehad van Maggie se storielyn, maar nie te ver in die toekoms in nie, en d\u00edt was ook \u2019n nuwe ervaring. Gewoonlik, as jy in \u2019n reeks speel, kry jy al die episodes se tekste voordat jy begin skiet, maar hier moes ek myself heeltemal oorgee aan \u2019n nuwe proses, want hulle het geskryf soos wat hulle geskiet het, blok vir blok.<\/p>\n

Aanvanklik het ek gedink het my karakter net \u2019n klein storieboog sou h\u00ea, net in en uit die reeks sou wees, maar toe was dit vir my so cool dat hulle Maggie se rol groter geskryf het.<\/p>\n

 <\/p>\n

Vertel vir ons meer oor Maggie.<\/strong><\/h4>\n

 <\/p>\n

Maggie is \u2019n professor, sy’s departementshoof van politieke wetenskap by Eike. Sy is bevriend met Ragel (Therese Bam) wat in dieselfde departement werk. Sy ontmoet heel toevallig vir Shay en soos wat die storie verloop, loop hulle al meer in mekaar vas en hulle begin met mekaar kontak maak, minwetend dat Ragel eintlik Shay se ma is. D\u00edt is waar die intrige begin, want jy vang ook vir Shay in die middel van haar storielyn waar haar verhouding met haar ma nie baie goed is nie en dan bo-op dit knoop sy hierdie verhouding met een van Ragel se kollegas, en iemand ouer as sy, aan.<\/p>\n

 <\/p>\n

\"\"<\/div>\n

 <\/p>\n

Is daar raakpunte tussen jou en Maggie?\u00a0<\/strong><\/h4>\n

 <\/p>\n

Ek is glad nie soos Maggie nie, maar ek dink Shay ontlok \u2019n sagtheid in Maggie en dit is iets wat ek as Cintaine ook het, \u2019n sagtheid. Dis ook my goue re\u00ebl in die lewe om alles uit \u2019n ontspanne plek te doen, want dan kan jy enigiets regkry. En d\u00edt is wat Shay in Maggie ontlok het. Om al daai mure af te breek, sodat Maggie net kan wees.<\/p>\n

 <\/p>\n

Hoe het jy besluit om die rol aan te pak?<\/strong><\/h4>\n

 <\/p>\n

Maggie is amper 20 jaar ouer as Shay, maar ek het besluit dat ek nie wil h\u00ea dat dit moet gaan oor \u2019n intergenerasie-verhouding, of \u2019n gay verhouding nie. Ek wou h\u00ea dit moes draai om hoe sy verlief raak op Shay \u00e9n hoe onverwags dit is.<\/p>\n

Maggie het pas uit Duitsland teruggekeer waar sy vir 12 jaar in \u2019n verhouding met \u2019n man, Ruan, was. Dit het nie uitgewerk nie, en sy na Suid-Afrika teruggekeer. Maggie het haarself belowe dat sy \u2019n nuwe hoofstuk gaan begin, nuwe wortels gaan skiet, gefokus gaan wees, \u2019n lewe bou en miskien enkellopend vir \u2019n ruk wees. Maar soos die lewe maar is, het Shay haar voete onder haar uitgeslaan, en nou moet hulle saam die uitdagings en kritiek van die samelewing navigeer. Sy’s \u2019n intelligente vrou, sy weet wat mense gaan dink. Maar hierdie keer is sy \u2019n bietjie selfsugtig in die sin dat sy nie meer omgee oor wat ander mense van haar dink of verwag nie.<\/p>\n

 <\/p>\n

<\/div>\n
\"\"<\/div>\n

 <\/p>\n

Wat dink jy gaan kykers se reaksie wees?<\/strong><\/h4>\n

 <\/p>\n

Dit gaan interessant wees om te sien wat die gehoor daarvan maak. Ek het al klaar my eerste Facebook-tannie gekry wat my oor die vingers getik het. D\u00edt gaan gebeur, en dis wat ek wil h\u00ea. Mense moet gesprekke h\u00ea oor hierdie goed, al baklei hulle binne hulself daaroor.<\/p>\n

As storievertellers is die grootste plig wat ons het om nie ons karakters te veroordeel nie; wanneer iemand iets van hulle te s\u00ea het, moet jy ook opstaan vir hulle. Of jy nou \u2019n booswig of \u2019n engel speel, jy moet kan regverdig hoekom hulle doen wat hulle doen. En hier gaan dit oor twee mense wat verlief raak op, en lief raak vir, mekaar.<\/p>\n

 <\/p>\n

Hoe was jou ervaring om teenoor Be\u00e1ta te speel?<\/strong><\/h4>\n

 <\/p>\n

Be\u00e1te het nogal dieselfde werksmetodiek as ek in terme van hoe ons tonele en karakters uiteensit. So dit was vir my baie lekker om met haar te werk. As sy af-dae gehad het, het ons gou \u2019n koffie gaan kry en gesels oor wat volgende in ons storielyn was en hoe ons dit wou benader.<\/p>\n

 <\/p>\n

En die res van die span?<\/strong><\/h4>\n

 <\/p>\n

Jissie, die\u00a0Wyfie<\/em>-stel is \u2019n goed-geoliede masjien en die skietproses is baie samewerkend. Jy kon op stel voel hoe baie almal oor die storie omgee. En natuurlik die aktrises wat die vier wyfies speel \u2013\u00a0hulle is fantasties.<\/p>\n

 <\/p>\n

\"\"<\/div>\n

 <\/p>\n

Wat dink jy is die impak wat Wyfie<\/em>\u00a0het in terme van hoe ons stories in Afrikaans vertel?<\/strong><\/h4>\n

 <\/p>\n

Dit is vir my verskriklik lekker dat daar nie gesensor word nie. Hulle skram nie weg van enigiets wat taboe is of moeilik is om oor te praat of te kyk nie. D\u00eds vir my opwindend.<\/p>\n

In die tyd wat ek\u00a0Wyfie<\/em>\u00a0geskiet het, het ek ook vir die derdejaars by die Universiteit Stellenbosch se dramadepartement klas gegee en dit was baie interessant om te hoor dat my studente\u00a0Wyfie<\/em>\u00a0fuifkyk. En hoekom? Want hulle vind aanklank daarby!<\/p>\n

En dan is daar van my vriende wat 37 is en sommige van hulle trek by drie kinders en Sondag is hul heilige\u00a0Wyfie<\/em>-tyd. Mans moenie pla nie, kinders moet op die tablet speel, en dan\u00a0binge<\/em> hulle \u2019n paar episodes. Ek het ook vriende wat in hul vyftigs is wat nie verstaan hoekom hulle dit kyk nie, maar hulle kan nie ophou nie!\u00a0(lag)<\/em><\/p>\n

Ek dink wat Marcel en sy span reggekry het \u2013 om die storie relevant en lewendig te hou \u2013 verdien nogal \u2019n pluimpie. Ek is baie bly ek was deel daarvan.<\/p>\n

 <\/p>\n

\n

KYK | Wyfie<\/em> se lokprent vir Seisoen twee:<\/strong><\/p>\n<\/div>\n