{"id":145139,"date":"2024-05-24T11:59:32","date_gmt":"2024-05-24T09:59:32","guid":{"rendered":"https:\/\/novanews.co.za\/rooirose\/?p=145139"},"modified":"2024-05-24T11:59:43","modified_gmt":"2024-05-24T09:59:43","slug":"vyf-vinnige-vrae-vrydag-met-liedjieboer-anton-goosen-oor-sy-nuwe-musiek","status":"publish","type":"post","link":"https:\/\/novanews.co.za\/rooirose\/vyf-vinnige-vrae-vrydag-met-liedjieboer-anton-goosen-oor-sy-nuwe-musiek\/","title":{"rendered":"Vyf-vinnige-vrae-Vrydag met liedjieboer, Anton Goosen \u2013 oor sy nuwe musiek"},"content":{"rendered":"\n

Die legendariese en geliefde sanger, musiekregisseur en \u201cliedjieboer\u201d, Anton Goosen<\/strong>, is terug in die kollig met \u2019n splinternuwe enkelsnit.<\/p>\n\n\n\n

Bly by my, (my lief)<\/em> \u2013 \u2019n gedig van Antjie Krog wat hy op sy besonderse manier vir die Woordfees getoonset het \u2013 is \u2019n liefdesliedjie in \u2019n, soos hy s\u00ea, \u201cAfrikaanse sagte blues genre\u201d.<\/p>\n\n\n\n

\u201cOns moes vir die Woordfees se huldigingsprogram, Al om Antjie, twee van Antjie Krog se gedigte kies. Bly by my<\/em> is een van haar bekendstes. Daar is ander deuntjies met dieselfde titel en dus het ek dit verander na Bly by my, (my lief)<\/em>, maar omdat dit egter nie \u2019n liriek is nie, het ek die koorgedeelte bygeskryf,\u201d verduidelik Anton.<\/p>\n\n\n\n

Die enkelsnit vorm deel van Anton se nuwe album, Sirkels<\/em>, wat eersdaags uitgereik word. Die album, wat nege nuwe liedjies bevat \u2013 insluitend drie toonsettings en twee duette \u2013 is \u2019n luister-album wat ballades, stories, dans-, protes-, en rock-musiek insluit.<\/p>\n\n\n\n

<\/p>\n\n\n

\n
\"\"<\/figure>\n<\/div>\n\n\n

<\/p>\n\n\n\n

Anton, wat algemeen as die vader van Afrikaanse rock beskou word, is in 1946 in die Karoo gebore en het in Kroonstad grootgeword.<\/p>\n\n\n\n

Oor die jare, het hy meer treffers op sy kerfstok as enige ander Suid-Afrikaner versamel en het al meer as 20 albums uitgereik; die musiek vir verskeie rolprente soos Die Laaste Tango, \u2019n Pawpaw vir my Darling<\/em> en Siembamba<\/em> geskryf; asook liedjies vir onder andere Laurika Rauch, Carike Keuzenkamp en Koos Kombuis neergepen.<\/p>\n\n\n\n

Hy is tydens sy dekades-lange loopbaan as liedjieskrywer en sanger met verskeie toekennings vereer, o.a. Sari\u2019s, Ghoemas, Geraas, Vonk, en dan SAMA-, Innibos-, die FAK-en Die Suid-Afrikaanse Akademie vir Kuns en Kultuur-toekennings vir sy lewenslange bydrae tot musiek. In 2023 is hy een van vyf kunstenaars wat in die South African Gallery of Legends ingehuldig is.<\/p>\n\n\n\n

Anton Goosen: Liedjieboer, <\/em>sy lewensverhaal wat deur die bekende joernalis Hanlie Retief neergepen is, is in 2020 deur NB-uitgewers uitgereik. Die filmvervaardiger Niel van Deventer werk tans aan \u2019n vier-episode dokument\u00ear oor Anton se loopbaan.<\/p>\n\n\n\n

Wanneer hy nie besig is met sy musiek nie, geniet hy dit om tyd \u2013 en \u2019n glasie Kaapse rooiwyn \u2013 saam met sy vrou, Estie, en hul vier honde deur te bring; stappies op die strand, gesprekke met vriende; lees en om reekse op Netflix of Britbox te kyk.<\/p>\n\n\n\n

<\/p>\n\n\n

\n
\"\"<\/figure>\n<\/div>\n\n\n

<\/p>\n\n\n\n

Karlien Meiring<\/strong> het meer oor sy nuutste musikale meesterstuk gaan uitvind<\/p>\n\n\n\n

<\/p>\n\n\n\n

Hoe hoop jy sal jou aanhangers op jou nuwe musiek reageer?<\/strong><\/p>\n\n\n\n

<\/p>\n\n\n\n

Ek hoop uiters positief! \u2019n Mens weet nie vooraf wat die reaksie op jou album gaan wees nie; dis maar in die hande van die \u201cmusiekgode\u201d. Afrikaanse musiek het oor die afgelope vier dekades baie verander. Nuwe genres, formate en platforms waar musiek gestroom en afgelaai kan word, het bygekom.<\/p>\n\n\n\n

<\/p>\n\n\n\n

Hoe benader jy die skep van nuwe musiek na so \u2019n lang en suksesvolle loopbaan? Vind jy dat jou proses oor die jare verander het?<\/strong><\/p>\n\n\n\n

<\/p>\n\n\n\n

In die begin was dit vir my baie makliker, want ek het my hele lewe voor my gehad waarin ek kon skep. Later het ek meestal my kreatiewe idees deur waarneming of navorsing gekry. Ek vind dat soos die jare aanrol, ek meer nasorg doen en stadiger (en hopenlik deegliker), werk.<\/p>\n\n\n\n

<\/p>\n\n\n\n

Daar word dikwels na jou as die vader van Afrikaanse rock verwys. Hoe sien jy die evolusie van Afrikaanse musiek en waarheen dink jy is dit op pad?<\/strong><\/p>\n\n\n\n

<\/p>\n\n\n\n

Ja, ek het dit al raakgelees, dis als bloot toevallig en grootliks omdat Blommetjie gedenk aan my<\/em> in rockformaat was. Ek onthou dat my eerste regisseur, Chris Kritzinger, aan die orkeslede in die ateljee die dag ges\u00ea het: \u201cThink: Baby come back.\u201d Dit is \u2019n liedjie van die Equals. En die res is nou geskiedenis. Ek was toe nog \u2019n musiekresensent by Beeld en het baie wyd na alle musiekgenres geluister. Dit het baie gehelp.<\/p>\n\n\n\n

Afrikaanse musiek het sedert die Musiek en Liriek-revolusie in 1979 geweldig gegroei en vlamgevat. En dis \u2019n tuiste met vele kamers. En dis goed. Daar is \u2019n hele klomp nuwe, jong kunstenaars (en gevestigdes) wat die vlam van goeie nuwe Afrikaanse musiek hoog hou. Dis lekker om te sien; veral nou dat ons aanstaande jaar 100 jaar vier sedert Afrikaans \u2019n amptelike taal geword het.<\/p>\n\n\n\n

<\/p>\n\n\n\n

Wat is die mees ongewone of onverwagte plek waar jy inspirasie vir \u2019n liedjie gekry het?<\/strong><\/p>\n\n\n\n

<\/p>\n\n\n\n

Dit gebeur gewoonlik op die ontydigste tye soos net voor ek \u00earens heen moet gaan of besig is om te bestuur, dit was veral moeilik in die dae voor klein bandopnemertjies en selfone. Die een wat ek die beste onthou en die moeilikste was, was toe ek een keer op die N1 van Johannesburg na Pretoria bestuur het en daar \u2019n wysie in my kop opgedaag het. Ek het niks by my gehad om dit mee vas te pen nie. Ek het dit die hele pad soontoe en terug in my kop herhaal tot ek by my studeerkamer was om daaraan te werk. Dit was eers twee dae later voltooi. Hierdie wysie is nou byeboerwa<\/em>.<\/p>\n\n\n\n

<\/p>\n\n\n\n

Wat motiveer jou om, selfs na al die jare, gehore met jou musiek en talent te betower?<\/strong><\/p>\n\n\n\n

<\/p>\n\n\n\n

Sjoe, dis \u2019n moeilike vraag. Ek lewe vir musiek \u2013 ek dink dis die motivering. Dis die vuur wat van binne brand: Soms is dit net \u2019n gloed, maar met inspirasie vlam dit op \u2013 soms selfs onbeheers, want soos Nietzsche ges\u00ea het \u201cwithout music, life would be a mistake.\u201d<\/p>\n\n\n\n

<\/p>\n\n\n\n

KYK: Anton Goosen: Bly by my (my lief) –\u00a0Amptelike musiekvideo<\/strong><\/p>\n\n\n\n

\n