{"id":137341,"date":"2023-05-12T09:03:54","date_gmt":"2023-05-12T07:03:54","guid":{"rendered":"https:\/\/novanews.co.za\/rooirose\/?p=137341"},"modified":"2023-05-12T09:03:54","modified_gmt":"2023-05-12T07:03:54","slug":"antoinette-kellerman-te-sien-as-ouma-olive-in-hartroerende-moedersdagfliek","status":"publish","type":"post","link":"https:\/\/novanews.co.za\/rooirose\/antoinette-kellerman-te-sien-as-ouma-olive-in-hartroerende-moedersdagfliek\/","title":{"rendered":"Antoinette Kellerman te sien as Ouma Olive in hartroerende Moedersdagfliek"},"content":{"rendered":"

Deel van die sterbelaaide rolverdeling is Antoinette Kellerman as Ouma Olive en Ludwig Binge as haar seun, Markus. Chris van Niekerk, June van Merch, Abduragman Adams, Pierre van Pletzen, Tinarie van Wyk Loots, Veronique Jephtas, Susanne Beyers en Roeline Daneel is ook in die rolverdeling te sien, met Bravo!-aanbieder Ewan Strydom wat \u2019n kamee-rol as homself het. Die regisseur is Nina Swart. Ouma Olive die ongelooflike<\/em> is in en om Kaapstad verfilm.<\/p>\n

 <\/p>\n

Olive Brits is moeg. Ongedurig. \u2019n Weduwee van amper tagtig wat haar bes doen om nie met die res van die mense in die deftige aftree-oord te meng nie. Sy het twee kinders, \u2019n dogter en \u2019n seun, maar die dogter kies Moedersdag om vir haar te kom s\u00ea sy en haar gesin, en Olive se enigste kleinkind, trek Kanada toe. En die seun? Wel, die twee van hulle vermy mekaar sover hulle kan.<\/p>\n

 <\/p>\n

Maar die lewe het \u2019n vreemde manier om wonde te heel \u2013 selfs al is dit om mense met komedie agter \u2019n mikrofoon te vermaak. Wanneer Markus gemeenskapsdiens by sy ma se aftree-oord doen, vind hy uit sy het \u2019n verskuilde talent: gee haar \u2019n whiskey of twee en \u2019n mikrofoon en sy laat mense skater.<\/p>\n

 <\/p>\n

Markus, \u2019n akteur met \u2019n ego-probleem, oortuig sy agent, Lindsay (Veronique Jephtas) om sy ma se loopbaan te bevorder en voor Olive nog kan kibbel, is sy op die verhoog met \u2019n mikrofoon in die hand. Maar haar grootste optrede l\u00ea nog voor wanneer sy na \u2019n glansgeleentheid genooi word. Gaan die mense dink sy is snaaks? Belangriker nog: Gaan haar brose hart dit hou en gaan die een ding wat sy op hoop \u2013 vergifnis van haar seun vir \u2019n fout wat sy jare gelede gemaak het \u2013 \u2019n werklikheid word?<\/p>\n

 <\/p>\n

\u201cDit was \u2019n kombinasie van dinge wat die draaiboek ge\u00efnsprireer het, maar die dokument\u00ear Come Inside My Mind<\/em> het die bal aan die rol gekry,\u201d s\u00ea Ludwig wat nie net die rol van Markus speel nie, maar ook die draaiboek geskryf het. \u201cEk is mal oor die ontslape akteur Robin Williams en het met sy werk groot geword. Die dokument\u00ear is egter oor sy lewe wat bewys die stereotipe rondom komediante en depressie bestaan vir \u2019n rede. Robin was baie intens en sensitief, maar toneelspel en stand-up was vir hom maklik. Hy was iemand wat komedie gebruik het om te cope<\/em> met die lewe.\u201d<\/p>\n

 <\/p>\n

Ludwig en die uitvoerende vervaardiger van Ouma Olive die ongelooflike<\/em>, Jaco Notnagel, moes met \u2019n voorlegging kom vir \u2019n Moedersdag-rolprent en Ludwig het besef sy idee kan werk.<\/p>\n

 <\/p>\n

\u201c\u2019n Ma wat rou oor \u2019n verlies en komedie ontdek as uitlaatklep vir haar verdriet en frustrasie,\u201d s\u00ea hy. \u201cEk kon onder haar vel inklim omdat ek self my pa \u2019n paar jaar gelede verloor het en self besig was om te rou. Om die Moedersdag-tema deur te trek, het ons besluit om haar bestuurder haar vervreemde seun te maak. Hy word noodgedwonge haar toergids en leermeester, maar is ook die persoon met wie sy dinge moet regmaak. Uiteindelik is dit \u2019n liefdesverhaal tussen ma en seun wat deur middel van humor mekaar herontdek.\u201d<\/p>\n

 <\/p>\n