{"id":130087,"date":"2020-05-04T10:58:38","date_gmt":"2020-05-04T08:58:38","guid":{"rendered":"https:\/\/novanews.co.za\/rooirose\/?p=130087"},"modified":"2020-05-04T10:58:38","modified_gmt":"2020-05-04T08:58:38","slug":"sjef-snoekie-hoofstuk-10-angs","status":"publish","type":"post","link":"https:\/\/novanews.co.za\/rooirose\/sjef-snoekie-hoofstuk-10-angs\/","title":{"rendered":"Sjef Snoekie Hoofstuk 10: Angs"},"content":{"rendered":"

Sjef Snoekie Hoofstuk 10: Angs deur Martie Swanepoel. Hooffoto: pexels<\/a><\/em><\/p>\n

 <\/p>\n

Haal gou in met die vorige hoofstukke van Sjef Snoekie! Klik hier<\/a><\/p>\n

 <\/p>\n

Sjef Snoekie Hoofstuk 10: Angs<\/h4>\n

Snoekie draf gou met die trappe op na haar woonstel. \u2018n Aanval van paniek en pity party<\/em> meng in haar krulkop.<\/p>\n

Wat sal gebeur as sy \u2018n flop maak? Flops gebeur mos wanneer jy dit die minste nodig het? Wat sal gebeur as daai Carlotte haar kos haat? Wat sal gebeur as iets aanbrand of sy te veel sout of iets ingooi? (Sy het nogal \u2018n oordadige hand.)<\/p>\n

Wat as?<\/p>\n

Wat as?<\/p>\n

Wat as?<\/p>\n

Die paniek kry oorhand. Sy voel sy gaan hiperventileer!<\/p>\n

Tjoklits! Sy het tjoklits nodig! Nou dadelik!<\/p>\n

Sy grawe in die trommel. Soos \u2018n kosbare kleinood vat sy die pers staaf raak.<\/p>\n

Die Cadbury\u2019s voel soos \u2018n offergawe van die gode in haar hande. Geoefende vingers skeur die papier oop. Sy knak en knibbel. Knak en knibbel. Sy laat \u2018n blokkie op haar tong smelt. Hemels. Orgasmies.<\/p>\n

Sy proe die glas-en-\u2018n-half se romerige lekkerte. Dit neem haar oor die Europese kontinent, oor die Sahara, oor die ewenaar, oor die donker hartklop van Afrika, oor die Zambezi \u2026 ver oor die Springbokvlakte tot oor die Vaalrivier. In die hart van die Vredefort-koepel kom haar siel tot rus. In haar ouerhuis op die plaas. Sy verlang \u2026 sy wil ontsnap \u2026 dan tref die werklikheid.<\/p>\n

O tjit! Sy moet nog vir Carlotte gaan kook! Wat gaan sy doen? Wat as Alphonse haar na vanaand haat?<\/p>\n

Sy bel haar ouma. \u201cRuk jouself reg,\u201d raas Lucille.<\/p>\n

Sy bel haar pa. \u201cWees net jouself,\u201d troos hy.<\/p>\n

Sy kou vervaard aan die laaste stuk Cadbury\u2019s en gaan sit in die Lotus-posisie.<\/p>\n

Fokus.<\/p>\n

Diep inasem en uitasem wat jy in die diepte van jou maag gaan haal. Sy doen dit so tien keer. Dit voel steeds of haar bors toetrek. Sy probeer weer. Dan gryp sy \u2018n papiersak en hiperventileer in die sakkie.<\/p>\n

Haar foon lui.<\/p>\n

Dis Alphonse.<\/p>\n

\u201cWaar de hel bly jy? Kyk hoe laat is dit! Ek wil jou oor tien minute in my kantoor sien met jou spyskaart vir die aand!\u201d<\/p>\n

Snoekie se maag knoop op tien plekke. Sy kyk die halfjack Klipdrift-brandewyn raak wat Lucille in die trommel gepak het. Vir noodgevalle soos maaggriep \u2026 of vir tipsytert.<\/p>\n

Mens weet mos nooit wanneer \u2018n maag in die vreemde draaie begin maak nie?<\/p>\n

Haar maag knoop, hy draai nie. Maar dis steeds \u2018n noodgeval!<\/p>\n

Sy draai die doppie se nek om en neem \u2018n paar slukke. Dit brand verby al haar chakras tot in haar maag. Warmte vul haar.<\/p>\n

Sy sit skielik kiertsregop en neem \u2018n diep asemteug. Dan druk sy haar kop in die trommel en pak \u2018n paar bestanddele uit. Sy sal dit uit die restaurant se store moet aanvul. Die planne begin vorm aanneem.<\/p>\n

Sy sal \u2018n geurige beenmurg-sop maak. \u2018n Baie klein porsie, bedien met \u2018n stukkie kaiing-biscotti, wat sy post Werner in \u2018n calorie-waansin uitgedink het. Dit sal Carlotte laat besef sy gaan nou op \u2018n smaak-avontuur.<\/p>\n

Dan sal sy \u2018n delikate plaatkoekie bak en \u2018n paar dun snytjies klam Springbok-biltong saam met \u2018n dun snytjie Roquefort-kaas en \u2018n halwe van haar ouma se ingelegde plaasvye bo-op bedien. \u2018n Skeutjie vyestroop en \u2018n suggestie van rissie sal die smulpaap se speekselkliere laat kwyl.<\/p>\n

Sy sal haar kosbare stukkie gerookte snoek omskep in \u2018n geurige viskoekie en \u2018n hupse skeppie soetpatat as metgesel maak.<\/p>\n

Nagereg sal lekker toffiepoeding uit Lucille se ou basaarkookboek wees. Nie \u2018n ongeskikte porsie nie. Die vrou moet luskry vir meer. Dan sal sy \u2018n glasie muskadel as afskeidsgeskenk tafel toe stuur. Saam met \u2018n egte Vrystaatse dro\u00eb geelperske wat effe in brandewyn en ster-anys opgekook is en \u2018n roomkaas-blertsie op het.<\/p>\n

Snoekie besluit sy sal haar geregte met \u2018n fyn hand garneer en opdien.<\/p>\n

Sy hoop dit sal Alphonse se goedkeuring wegdra. En, natuurlik, Carlotte s\u2019n.<\/p>\n

Maar sy is meer bekommerd oor Alphonse se goedkeuring.<\/p>\n

Hy sit vooroor gebuig agter sy lessenaar. Hy lyk moeg en moedeloos. Dis die bebrildes en manne met die oorpakke wat die arme man so uitput. Tante Inge se gereelde besoeke alleen behoort enige mens uit te mergel. Die spanning in die restaurant laai by die uur en is al ondraaglik.<\/p>\n

Sy wens sy kon om die lessenaar stap en die man \u2018n drukkie gee. Eintlik het sy al vlugtig gedagdroom van meer as \u2018n drukkie, maar die gevleulde wesentjie op haar skouer het haar dadelik kortgeknip en vermaan. \u201cDie man is buite jou liga,\u201d het die bevlerkte een gewaarsku. \u201cMaar \u2018n meisie kan mos maar droom? Mens mag mos \u2018n secret crush<\/em> h\u00ea? Hel, ek is mos nog nie dood nie?\u201d\u00a0 Die een met die vlerke het ook geen genade nie en het haar aan haar dwalinge met Werner herinner.<\/p>\n

Maar terug in die werklikheid het Alphonse uiteindelik uit sy neerdrukkende posisie opgekyk.<\/p>\n

\"Sjef

Sjef Snoekie Hoofstuk 10: Angs<\/p><\/div>\n

\u201cJy weet wat ek vandag doen, is totaal ongehoord? Ek meen, dis so ver van die normaal dat dit eintlik bisar is? Ek laat \u2018n intern, wat nog rou is, kook vir die mislikste koskritikus in Europa!\u201d<\/p>\n

Dit laat Snoekie niks beter voel nie. Sy wens sy het die half-jackie brannewyn en haar bruin papiersak byderhand gehad, want sy voel nog \u2018n paniekaanval aankom.<\/p>\n

\u201cEk weet nie hoekom nie, maar ek vertrou jou. Ek is desperaat en moedeloos en ek maak staat op \u2018n vroumens wat my eintlik teen die mure uitdryf. Maar dalk is dit hoekom jy \u2018n goeie keuse is. Ek het vanaand iets uitsonderlik nodig om Carlotte te verras.\u201d<\/p>\n

Sy kyk na sy lang hande wat saampraat. Sy o\u00eb gloei van moegheid en emosie. Dan weet sy, sy sal hom nie kan teleurstel nie. Sy sal haar beste probeer.<\/p>\n

Sy praat saam met hom deur die spyskaart. Van die smake is vir hom onbekend, maar hy hou van die eenvoud en die kontraste.<\/p>\n

Net voor sy uitstap, buig hy vooroor en vee met \u2018n servet oor haar mondhoeke.<\/p>\n

\u201cEk sien jy het sjokolade ge\u00ebet.\u201d<\/p>\n

Hoeveel keer gaan sy haar naam nog krater maak voor die man? Haar wange gloei bloedrooi en sy voel met haar tong in haar mondhoeke. Romerige Cadbury\u2019s kuier nog daar.<\/p>\n

Juan kyk bekommerd op as sy met haar mandjie bestanddele by haar werkstasie gaan staan.<\/p>\n

\u201cEk is bly ek is nie jy nie. Vandag sloof ek my eerder vir die giftige dwerg af.\u201d<\/p>\n

Skielik wens sy sy kon ook eerder vanmiddag op die bevele van die venynige klein Andrea rondgespring het.<\/p>\n

Sy pak haar bestanddele uit. Nuuskierige o\u00eb hou haar onderlangs dop. Maar dan sluit sy haar kop af. Sy neem haar gedagtes na hulle plaaskombuis en oortuig haarself sy kook vir haar pa en ouma.<\/p>\n

Sy kap, meng proe, roer, klop. Geure en kleure meng in haar potte en panne. Aromas kuier in die lug. Haar hart sing saam die gekletter van potte. Dis immers hoekom sy hier is. Om te doen wat sy die beste kan doen. Om te kook.<\/p>\n

Daai Carlotte-vrou kan maar kom, sy is reg vir haar!<\/p>\n

Daar is \u2018n stempos op haar foon. Sy kliek vinnig daarop.<\/p>\n

\u201cHaak Vrystaat!\u201d brul haar pa oor twee kontinente.<\/p>\n

\u201cJip, Pappa, ek is reg vir vanaand,\u201d laat sy weet.<\/p>\n

 <\/p>\n

 <\/p>\n

Kook saam!<\/h4>\n

 <\/p>\n

Murgbeensop<\/h5>\n