{"id":121904,"date":"2024-12-17T15:45:03","date_gmt":"2024-12-17T13:45:03","guid":{"rendered":"https:\/\/novanews.co.za\/rooirose\/?p=121904"},"modified":"2024-12-17T15:57:30","modified_gmt":"2024-12-17T13:57:30","slug":"hoe-om-nie-hierdie-vakansie-te-baklei-nie","status":"publish","type":"post","link":"https:\/\/novanews.co.za\/rooirose\/hoe-om-nie-hierdie-vakansie-te-baklei-nie\/","title":{"rendered":"Rus of rusie? Hoe om nie hierdie vakansie te baklei nie"},"content":{"rendered":"

Hoe om nie hierdie vakansie te baklei nie het oorspronklik in rooi rose verskyn as Rus of rusie? deur Anys Rossouw. Desember 2010.<\/em><\/p>\n

 <\/p>\n

 <\/p>\n

Rus of rusie?<\/h4>\n

 <\/p>\n

In gewone gesinne brand die vreugdevure nie noodwendig hoog wanneer die vakansie waarna almal blinkoog uitgesien het uiteindelik aanbreek nie. Om die waarheid te s\u00ea, dan kan die vonke woes spat.<\/p>\n

\u2019n Scenario soos di\u00e9 het hom seker al in duisende huisgesinne afgespeel: Jy is blinkgesweet gespook om alles reg te kry vir die vakansie: Die koekies is gebak, die huishulp en tuindienste is gere\u00ebl, die hondekos gekoop, die sleutels is by die bure, die rekeninge betaal, die tasse gepak. Julle is uiteindelik gereed! Die motor is stampvol: kinders, klere, speelgoed, koekies, Kersgeskenke \u00e9n die gholfstokke. Alles is in. Behalwe jou man se goeie gemoedstoestand \u00f3f sin vir humor!<\/p>\n

Eers mor hy nukkerig oor al die bagasie. \u201cIs al die goed nodig? Sulke groot tasse, al die speelgoed?\u201d Maar hy rep nie \u2019n woord oor die gholfstokke nie. En \u00e1l wat hy hoef te doen, is om dit in die kattebak te laai, want jy het \u00e1l die re\u00eblings getref, alles reggekry en ingepak. \u00c9n met moeite en geduldige onderhandeling daarin geslaag om die kinders te oortuig dat daar nie plek vir Ouboet se kitaar of Kleinsus se popwaentjie is nie. En dan word die man haastig. Julle moes eintlik al lankal gery het. Die paaie gaan besig wees.<\/p>\n

Almal voel die verstikkende atmosfeer, maar niemand waag dit om te s\u00ea dat julle amper \u2019n uur vir hom gewag het om van die werk af te kom nie, maar almal dink dit. En dan wonder jy waaroor dit nou eintlik gaan? Is dit omdat julle na sy skoonmense op pad is? Dalk omdat hy nie meer agter sy werk kan skuil nie?<\/p>\n

Natuurlik gaan dit darem nie altyd so nie en alle pa\u2019s is nie ou suurknolle as die vakansie-uittog begin nie. Alte dikwels is dit mammie wat oorstuur en omgeklits is.<\/p>\n

Lees ook: Waar is die vrede in jou huis?<\/a><\/p>\n

 <\/p>\n

 <\/p>\n

 <\/p>\n

Vakansies veroorsaak nie probleme in verhoudings nie, maar dit bring reeds bestaande probleme na die oppervlak.<\/em><\/h4>\n

 <\/p>\n

 <\/p>\n

Vakansies veroorsaak nie probleme in verhoudings nie, maar dit bring reeds bestaande probleme na die oppervlak. Vakansies het die manier om verhoudings te versterk of reeds bestaande verhoudingsprobleme te vergroot. Daarom is dit belangrik dat julle vooraf moet besin oor die moontlike slaggate wat die vakansie vir jul verhouding kan inhou en rustig saam besluit hoe om dit te hanteer.<\/p>\n

Mense verskil en hul persoonlikhede, agtergrond en behoeftes verskil. En watter soort vakansies vir hulle lekker is, verskil ook. Daar is so baie dinge wat kan verskil. Winter- of somervakansies? Bly ons tuis en doen sommer \u2019n slag lekker dinge by die huis? Gaan ons weg? Oorsee, see toe, wildtuin toe? In luukse-akkommodasie, \u2019n selfsorgeenheid, woonwa of tent? By familie, saam met vriende, alleen? Reis ons van plek tot plek, of bly ons die hele vakansie op een plek? Gaan ons na \u2019n nuwe plek toe, of dieselfde plek waar ons al soveel keer was? \u2019n Plek wat dreun met mense en aktiwiteite, of \u2019n stil en afgele\u00eb plekkie? Reis ons per motor, trein of vlieg ons? Soveel mense soveel behoeftes en moontlikhede.<\/p>\n

Onthou, goeie en gelukkige vakansies gaan meer oor die mense en verhoudings as oor die plek en die aktiwiteite.<\/p>\n

Jy droom oor \u2019n vakansie in \u2019n luukse-oord en sien visioene van jouself uitgestrek op \u2019n sonstoel met \u2019n eksotiese mengeldrankie in die hand. Helder blou water, palmbome, die spa, interessante winkeltjies … En hy? Hy droom oor hoe hy iewers in godsverlatenheid langs \u2019n vuur sit en onder \u2019n blink sterrehemel na die naggeluide luister. Hy wil wegkom van die stadsverkeer, die kantoor, die lawaai. Jy wil nie sukkel met skottelgoed en wasgoed nie en nie jou skoon, warm bad inboet nie. Jy wil \u2019n slag langsaam deur die winkels draal sonder om te jaag om kos op die tafel te kry. Hoe gemaak?<\/p>\n

Lees ook: Skep s\u00f3 vrede in jou huis<\/a><\/p>\n

 <\/p>\n

 <\/p>\n

7 dinge wat julle kan doen om lekkerder (en meer vreedsaam) vakansie te hou<\/h4>\n

 <\/p>\n