{"id":121030,"date":"2025-06-18T15:12:02","date_gmt":"2025-06-18T13:12:02","guid":{"rendered":"https:\/\/novanews.co.za\/rooirose\/?p=121030"},"modified":"2026-08-25T10:52:10","modified_gmt":"2026-08-25T08:52:10","slug":"raad-vir-ongesonde-vriendskappe","status":"publish","type":"post","link":"https:\/\/novanews.co.za\/rooirose\/raad-vir-ongesonde-vriendskappe\/","title":{"rendered":"Hoe goed is jou vriendskap vir jou? Raad vir ongesonde vriendskappe"},"content":{"rendered":"

Deur Anys Rossouw<\/em><\/p>\n

 <\/p>\n

Vriende vir ewig?<\/strong><\/h4>\n

 <\/p>\n

Vriendskap is die tuin vir die siel waar ervarings van geluk, betekenis, intimiteit, kreatiwiteit en persoonlike groei en ontwikkeling kan blom. Vrolike saamwees-tye met \u2019n dierbare vriendin laat die lag gemaklik uit jou borrel en sit die huppel terug in jou stap.<\/p>\n

Dit voel sommer of alles wat negatief is, vervaag: jou finansi\u00eble of familieprobleme, die geweld in die land, die swak rand, jou moeilike baas, jou moederlike pligte en jou onmoontlike kinders. Jou w\u00eareld lyk vol hoop. Ligter, mooier.<\/p>\n

Maar kuier saam met \u2019n ander vriendin en sy mergel jou uit. Wanneer sy ry, voel jy dankbaar, verlig \u00e9n uitgeput.<\/p>\n

Daar l\u00ea dikwels net te veel frustrasies, spanning en emosionele swaarkry onder die fasade van vriendskap. Wat hou jou in so \u2019n vriendskap?<\/p>\n

 <\/p>\n

\"\"<\/p>\n

 <\/p>\n

Om \u2019n vriendskap te laat gaan, is vir baie mense makliker ges\u00ea as gedaan, want ons voel dikwels so verantwoordelik vir ander en dink die fout l\u00ea by ons wanneer \u2019n verhouding nie werk nie. Dit laat mense agteroor buig en hulle bel\u00ea n\u00f3g meer tyd, energie, aandag en selfs geld in \u2019n verhouding, net om maar weer met onvergenoegdheid, skuldgevoelens en selftwyfel te sit.<\/p>\n

Anja* s\u00ea haar vriendskap met Sanet voel soos pligpleging. \u201cEk het nie meer lus vir ons weeklikse koffie-afspraak nie. Ek is voortdurend in my pasoppens. Praat ek oor my kinders, dink ek hulle is beter as hare. Vertel ek van \u2019n lekker kuier saam met iemand anders, gee ek meer vir hulle om en sluit ek haar uit. Sy lees in onskuldige opmerkings \u2019n angel, of ervaar dit as verwerping. Ek is deesdae so oorversigtig dat ek nie spontaan enigiets met haar kan deel nie. Dis vir my niks anders as \u2019n spanning nie, want dis net te ingewikkeld.<\/p>\n

\u201cSy besef nie dat sy met di\u00e9 optrede juis van die vrees dat ek haar sal uitsluit, \u2019n werklikheid maak nie. Dit voel of ek net altyd daar vir haar en haar krisisse moet wees – vir myne is daar nie \u2019n sagte oor nie. Ek is die een wat die moeite moet doen, tyd maak en omgee. Ek begin wonder hoekom ek hiermee moet voortgaan? Dit laat my skuldig voel, want ek weet dit sal haar breek as ek nie meer haar vriendin wil wees nie.\u201d<\/p>\n

Lees ook:\u00a0Die kwaai kalante: Raad vir ouers met aggressiewe kinders<\/a><\/p>\n

 <\/p>\n

\"\"<\/p>\n

 <\/p>\n

Pieter* s\u00ea sy jare lange vriend Werner maak hom lam met sy aansprake, persoonlike kwessies, jaloesie en negatiwiteit.<\/p>\n

\u201cHy en sy vrou probeer ons opeis en van ander mense afsonder. Ons m\u00f3\u00e9t elke week n\u00e9t saam met hulle braai. Waag ons dit om ander mense ook na ons naweekplek by die dam te nooi, is die gort gaar. Die atmosfeer is voelbaar en dis die een verwyt na die ander.<\/p>\n

\u201cHy probeer boonop om my by sy rusies met ander mense te betrek en ek moet kies: dis \u00f3f hy \u00f3f hulle, en hy ignoreer my summier wanneer ek nie kant wil kies nie. Dis amper soos seuntjies wat bende-bende speel. Wanneer ek die kwessie wil opklaar, haal hy ou voorvalle op. Na my mening het ek iets onbenulligs ges\u00ea of gedoen maar hy beskou dit as dislojaal. Alles is vir hom \u2019n kompetisie en \u2019n ewige vergelyking – as ek \u2019n nuwe TV of motor koop, moet hy \u2019n beter een kry. Maar wat my nou regtig onder kry, is sy negatiwiteit en gekerm oor alles wat verkeerd is: die land, die rand, korrupsie, die paaie, sy mediese fonds … alles goed waarna ek keer op keer moet luister. Dit versmoor my en tap my energie en behoefte aan die vriendskap.\u201d<\/p>\n

Dis nodig om soms krities na jou vriendskappe te kyk. Wat kry jy daaruit en wat steel dit? Dis amper soos \u2019n balansstaat van krediete en debiete. Op lang termyn moet daar \u2019n soort balans wees.<\/p>\n

Herbesin ernstig oor jou vriendskap wanneer dit gekenmerk word deur wantroue, voortdurende gevegte, misverstande, leuens of kwetsende opmerkings wat jou menings en menswees verkleineer.<\/p>\n

Net so wanneer dit jou beperk, misbruik, met jou waardes bots en jou nie toelaat om te doen of te wees wie jy is nie, jou minderwaardig of skuldig laat voel, jou dreineer en eenvoudig net meer eis as wat dit gee.<\/p>\n

Herbesin as dit wat eens sinvol, goed en reg was, skeef en pynlik geraak het, want dan is dit toksies en ongesond.<\/p>\n

Hou dit wel in gedagte dat vriendskappe, net soos alle verhoudings, blomtye het maar ook sy dro\u00eb en swaar tye. Dit skep vreugde maar maak ook seer wanneer konflik en misverstande opduik. In alle vriendskappe is daar tye wanneer die een vanwe\u00eb omstandighede meer kan gee en op \u2019n ander keer weer die ander, maar wanneer dit \u2019n eenrigtingpatroon raak en een van die twee nie soos \u2019n vriend optree nie, \u00eds sy nie \u2019n ware vriend nie.<\/p>\n

Die aard van jou vriendskappe en jou vertroue of wantroue in mense, word dikwels deur jou kleintyd se verhoudingsverlede gevorm.<\/p>\n

Ekstroverte en introverte verskil ook in terme van hoeveel tyd en intensiteit hulle in vriendskappe nodig het en bel\u00ea. Ekstroverte het meer behoefte aan interaksie en sal makliker en vroe\u00ebr persoonlike dinge met \u2019n vriend deel.<\/p>\n

Lees ook:\u00a0Ja, jy kan ‘n gelukkiger lewe lei. Hier’s hoe<\/a><\/p>\n

 <\/p>\n

Vriendskap bly \u2019n keuse en nie \u2019n lewenslange plig nie. Volwassenes het dikwels skuldgevoelens oor vriendskappe wat tot niet gaan. \u2019n Vriendskap vervul \u2019n bepaalde behoefte en rol in \u2019n bepaalde fase van jou lewe. Wanneer mense, hul behoeftes en hul omstandighede verander, soos wat meestal met werksverandering die geval is, of die koms van \u2019n baba, egskeiding, die dood van \u2019n lewensmaat of aftrede, het dit \u2019n uitwerking op talle van hul vriendskappe. Nie alle vriendskappe het die diepte en aanpasbaarheid om deur sulke veranderinge staande te bly nie.<\/p>\n

Elke nuwe lewensfase en plek bring jou gelukkig in kontak met nuwe mense wat potensieel nuwe vriende is \u2013 mense ontmoet dikwels eers n\u00e1 aftrede van die wonderlikste mense in hul lewe. Om ou, \u201cuitgediende\u201d vriendskappe te laat gaan, skep ruimte en tyd vir nuwe vriende in jou lewe \u2013 nie dat jy nie kosbare vriende vir \u2019n leeftyd het nie, maar nie alle vriendskappe duur \u2019n leeftyd nie.<\/p>\n

\u2019n Vriendskap wat by jou negatiewe gedagtes en negatiewe gevoelens skep, steel jou positiewe energie, inhibeer jou en is ongesond. Baie vriendskappe droog natuurlik op wanneer mense se behoeftes en lewe verander. Dis pynliker vir die een wat nog graag met die vriendskap wil voortgaan as vir die een wat nie meer belang stel, of daarvoor kans sien nie.<\/p>\n

 <\/p>\n

\"\"<\/p>\n

 <\/p>\n

Hoe hanteer jy \u2019n ongesonde, onvergenoegde vriendskap?<\/h4>\n

 <\/p>\n