{"id":117309,"date":"2019-08-23T10:50:07","date_gmt":"2019-08-23T08:50:07","guid":{"rendered":"https:\/\/novanews.co.za\/rooirose\/?p=117309"},"modified":"2019-08-08T12:51:06","modified_gmt":"2019-08-08T10:51:06","slug":"toeval-vlam-hoofstuk-29","status":"publish","type":"post","link":"https:\/\/novanews.co.za\/rooirose\/toeval-vlam-hoofstuk-29\/","title":{"rendered":"Toeval: Vlam, hoofstuk 29"},"content":{"rendered":"

Toeval, Vlam, Hoofstuk 29 deur Martie Swanepoel<\/em><\/p>\n

 <\/p>\n

Om op te vang met die vorige hoofstukke van Vlam, klik hier<\/a><\/p>\n

 <\/p>\n

 <\/p>\n

Toeval<\/h4>\n

\u201cWaar is die stilste deel van die stad waar ek in vrede kan gaan eet?\u201d<\/p>\n

Die hotel se toonbankklerk se o\u00eb vertel haar dat hy weet sy is die vrou is wat vandag op al wat \u2018n voorblad pryk.<\/p>\n

\u201cWil jy wegkom van al die rolprent- en persmense?\u201d<\/p>\n

Niekie hang aan sy lippe.<\/p>\n

\u201cJa, asseblief. Net vir \u2018n paar uur wil ek normale mense sien.\u201d<\/p>\n

Die klerk maak \u2018n oproep.<\/p>\n

\u201cEk het \u2018n taxi bestel en hy sal jou na \u2018n stil deel van die stad neem waar die locals<\/em> uithang. Daar is \u2018n klein village<\/em> met winkeltjies, koffieplekke en boekwinkels. Ek kan jou verseker geen Hollywood-ster sal daar uithang nie.\u201d<\/p>\n

Sy woorde val soos lawende salf op haar rou senuwees. Wie het kon dink so \u2018n blink storie vir \u2018n vrouetydskrif sal haar so ontsenu? Nee, hel, dan liewer plekke waar sy ten minste weet die mense is gewapen. Hier in die glansw\u00eareld sien mens nie die wapens nie. Jy voel net die dolke in jou rug!<\/p>\n

Die village<\/em> lyk of dit nie eens op dieselfde planeet as die Franse Riviera is nie. Dis die tonikum wat Niekie se gemoed nodig het. Sy snuffel en koop allerlei gemorsies vir Pieta, Henk en haar pa. \u2018n Nogal heel skaflike serp vir Claudia. Laasgenoemde is darem \u2018n soort anker in haar huidige woesterny.<\/p>\n

Die hamburger-restaurant verskyn soos \u2018n baken van hoop in haar visie. Sy is moeg vir ontwerpershappies. Sy smag na \u2018n groot, vet burger.<\/p>\n

Die restaurantjie is knus en gesellig. Die locals<\/em> lyk stylvol, maar darem meer gewoon.<\/p>\n

Die burger, wat die kelner voor haar neersit, is dik en sappig. Die sous loop behoorlik uit. Die patty<\/em> lyk na regte vleis en die aroma laat haar na braaivleis verlang. Sy hap. Die hemelse geure speel op haar tong. Die bekende. Die veilige.<\/p>\n

\u201cEk dog ek sien gesigte. Niekie? Of is dit Vlam?\u201d<\/p>\n

Die sous loop in \u2018n dik straal oor haar ken. Die tamatiesous en mosterd vorm \u2018n gesellige snor onder haar neus.<\/p>\n

Van alle mense, hoekom moet die toeval Duard Wayne na haar stuur as sy in vrede aan \u2018n hamburger wil smul?<\/p>\n

\u201cWag, ek kry vir jou ekstra servette. Louis, bring nog serviette na hierdie tafel! Hier is \u2018n noodgeval!\u201d<\/p>\n

Louis? Nee! Ken hy dan almal in die stad?<\/p>\n

\u201cEk neem aan jy wou kom wegkruip na jou spectacular<\/em> voorblad-debuut? Jy is mos net gewoond om ander mense op die voorblad te sit? Hoe voel dit om self daar te pryk?\u201d<\/p>\n

Voor sy die homp hamburger in haar mond kan kou en wegsluk, gaan hy voort.<\/p>\n

\u201cMy persoonlike gunstelingfoto tussen die spul is die een waar ek jou soos \u2018n knight in shining armour<\/em> ophelp. Jou cleavage<\/em> wys so mooi op daardie een!\u201d<\/p>\n

Niekie stik byna. Haar o\u00eb boor kwaai deur die man se vermakerige glimlag.<\/p>\n

Uiteindelik sluk sy die homp kos weg.<\/p>\n

\u201cOf, Mej. Branders, het jy \u2018n groter hap gebyt as wat jy kan kou toe jy hierdie storie kom doen het? Dis nou, if you will excuse the pun<\/em>?\u201d<\/p>\n

As Niekie uiteindelik \u2018n spreekbeurt kry, spoeg die vulkaan weer vuur.<\/p>\n

\u201cJy het my laas beskuldig van \u2018n speletjie wat ek speel om jou aandag te kry? Nou is dit my beurt om te vra, Watter spel speel jy? Hoekom het jy doelbewus dieselfde rok vir my gegee as die een wat jy sekerlik geweet het Melissa gaan dra?\u201d<\/p>\n

Duard glimlag soos \u2018n stout seun.<\/p>\n

\u201cEk neem aan julle onderhoud vanoggend was nogal opwindend? Was daar \u2018n cat fight<\/em>? Ek het die hele oggend aan julle twee gedink. Ek het so gewens ek kan by wees as julle mekaar pak. \u201c<\/p>\n

Niekie wonder hoe ver die limiete is waartoe hierdie man haar woede kan dryf.<\/p>\n

\u201cSo, jy erken jy het die rok met \u2018n doel vir my gegee? Hou jy daarvan om met mense se gevoelens te speel?\u201d<\/p>\n

Duard lyk nog meer onnutsig.<\/p>\n

\u201cO, het ek met jou gevoelens gespeel toe ek die rok vir jou gegee het? Moenie vir my s\u00ea \u2018n tawwe koekie soos jy het \u2018n romantiese rilling gekry toe jy die rok gekry het nie?\u201d<\/p>\n

Dit voel vir Niekie of sy in stadige aksie begin beweeg. Sy neem die plastiekhouer met tamatiesous voor haar. Sy lig dit op. Sy mik. Sy spuit. Met genoegdoening sien sy hoe sy haar teiken tref. Reg in die middel van Duard Wayne se selfvoldane gevreet!<\/p>\n

Louis en sy span hardloop opgewonde rond om lappe te gaan haal om hul beroemde klant te help skoonmaak. \u2018n Paartjie by die tafel langsaan lag kliphard.<\/p>\n

Duard vee sy gesig stadig skoon. Hy trek sy gevlekte hemp uit en gee vir Louis geld om vir hom \u2018n hemp by \u2018n naburige stalletjie te gaan koop.<\/p>\n

Daar heers \u2018n paar minute stilte. Niekie kyk doelbewus weg van die netjiese torso en sespak. Sy neem haar handsak en wink die kelner nader sodat sy kan betaal.<\/p>\n

Duard neem haar hand.<\/p>\n

\u201cWag, sit eers. Ek neem aan jy voel nou beter? Hel, jy is \u2018n dramatiese mens! Eers die episode in die re\u00ebn, toe gisteraand se spectacular<\/em> val op die rooi tapyt, en nou die woede-uitbarsting. Genade, mej. Branders, ek het altyd gedink die ding oor rooikoppe is \u2018n mite, maar nou sien ek. Jy is \u2018n kwaadkat. Vlam is die regte naam vir jou. Kan ek jou van nou af Vlam noem?\u201d<\/p>\n

Niekie gluur hom net aan. Sy kyk weg as hy die bont toeristehemp aantrek.<\/p>\n

\u201cToe? Wat dink jy van my nuwe voorkoms?\u201d<\/p>\n

Sy kyk na die bont blomme van die goedkoop hemp wat sekerlik uit \u2018n massa-fabriekslyn in China kom.<\/p>\n

Hy glimlag en poseer kamma vir haar.<\/p>\n

\u201cJy kan my nou maar afneem en die foto aan die modepolisie verkoop. Dan is ons quits?<\/em>\u201d<\/p>\n

Hy vra haar nie eens of sy nog wil bly nie.<\/p>\n

\u201cLouis, bring vir my en my vriendin \u2018n bottel van jou goedkoopste beste wyn.\u201d<\/p>\n

\u201cVriendin? Ek is beslis nie jou vriendin nie. Vriende doen nie wat jy gisteraand aan my en Melissa gedoen het nie!\u201d<\/p>\n

Duard lag heerlik.<\/p>\n

\u201cMaar dit was skreeusnaaks!\u201d<\/p>\n

\u201cHet jy daardie verslaggewer omgekoop om my te pootjie?\u201d<\/p>\n

Hy lyk kamma ernstig.<\/p>\n

\u201cWraggies! Het iemand jou gepootjie?\u201d<\/p>\n

Na die tweede glas wyn is Niekie minder kwaad. Teen die derde glas roep sy halt.<\/p>\n

\u201cEk moet vanaand weer gaan werk. Gaan jy ook na The Mission<\/em> se premi\u00e8re?\u201d<\/p>\n

Duard wink Louis weer nader.<\/p>\n

\u201cBring my motofietshelms, ou pel, ek moet hierdie meisie terugvat na haar hotel. Sy moet nog \u2018n uitrusting gaan uitsoek waarmee sy moles kan maak.\u201d<\/p>\n

 <\/p>\n

 <\/p>\n

Het jy geweet?<\/strong><\/p>\n

Ons het \u2019n GRATIS voorlesing waarna jy enige tyd kan luister van \u2019n ander vervolgverhaal uit die pen van Martie Swanepoel. \u2019n Nuwe episode van Botox, Barbies en Bietse word elke Donderdag om 09h00 vrygestel. Voorgelees deur Elize Cawood. Dis groot pret – begin sommer nou luister.<\/p>\n