{"id":108844,"date":"2025-03-26T15:30:43","date_gmt":"2025-03-26T13:30:43","guid":{"rendered":"https:\/\/novanews.co.za\/rooirose\/?p=108844"},"modified":"2025-03-26T15:33:48","modified_gmt":"2025-03-26T13:33:48","slug":"stiefkinders-maak-my-lewe-hel-wenke-vir-stiefouers","status":"publish","type":"post","link":"https:\/\/novanews.co.za\/rooirose\/stiefkinders-maak-my-lewe-hel-wenke-vir-stiefouers\/","title":{"rendered":"Stiefkinders maak my lewe hel! Wenke vir stiefouers"},"content":{"rendered":"

\u00a0Stiefkinders maak my lewe hel! Wenke vir stiefouers deur Anys Rossouw. Hooffoto: pexels<\/em><\/p>\n

 <\/p>\n

Jy ontmoet die man of vrou van jou drome! Hy\/sy is gaaf, ondersteunend en konsidererend.<\/p>\n

Alles werk so goed, tot sy bedorwe kinders by julle kom kuier, of intrek en jul huishouding oorneem. Jou meubels word verniel, die re\u00ebls wat nog altyd vir jou kinders geld, geld nie sy kinders nie. Hul gedrag is onaanvaarbaar, maar jy is die een wat veroordeel word, \u201cwant foeitog, hulle het al so swaar in die lewe gehad\u201d.<\/p>\n

Die titel \u201cstiefma\u201d hang skielik om jou nek.<\/p>\n

 <\/p>\n

 <\/p>\n

Om stiefma te wees<\/h4>\n

\u201cStiefma\u201d is \u2019n gelade woord wat mense van kleins af vereenselwig met iemand wat aaklig en wreed is. In sprokies verwerp en verstoot sy haar stiefkinders: Hansie en Grietjie word in die bos agtergelaat en Sneeuwitjie word vergiftig. In hersaamgestelde gesinne bring kinders meestal \u2019n warboel emosies, seerkry en verlieservarings saam met hulle: \u201cEk het op \u2019n manier \u2019n mamma of \u2019n pappa verloor,\u201d of \u201cMy ouers neem besluite wat my lewe verander en ek het geen s\u00ea daarin nie.\u201d<\/p>\n

 <\/p>\n

\"Stiefma\"

iStock\/nicoletaionescu<\/p><\/div>\n

 <\/p>\n

Die kinders moes dikwels uit \u2019n bekende omgewing na \u2019n ander huis of buurt trek.<\/strong> Soms bly van hul meubels, klere, speelgoed, troeteldiere of ander hartsgoed waarmee hulle grootgeword het agter. As hulle nog boonop van skool verander, verloor hulle hul maats en hul plek in groepe en sportspanne. Hulle verlang boonop na hul ander ouer en hul ou lewe en voel dikwels hartseer, kwaad, verwerp, skuldig, magteloos of uitgelewer aan situasies waarin hulle nie \u2019n keuse of beheer het nie.<\/p>\n

Kinders wil meestal baie graag die verhouding met hul eie ouers bewaar.<\/strong> Hulle wil nie die ouer ook nog verloor nie en hulle sal liewer die ma of pa se nuwe lewensmaat vir die veranderinge en verliese verkwalik. Soveel dinge wat tuis gebeur en wat hul eie ma of pa moontlik mag doen, word onverdiend op die stiefouer geprojekteer. Die eie ouer, veral die een by wie hulle nie woon nie, word verheerlik en die stiefouer word verdoem tot alles wat sleg is. Dit maak dit vir die nuwe lewensmaat baie moeilik. Sy of hy kan meestal min doen wat reg of goed in die o\u00eb van die stiefkinders is.<\/p>\n

 <\/p>\n

\"\"<\/p>\n

 <\/p>\n

Twee stiefma’s vertel<\/h4>\n

Christelle vertel hoe moeilik haar man se tiener, Johan, haar lewe maak: \u201cVoor sy pa is hy die ene onskuld en hy sal, hoewel steeds stug, al die dinge doen wat hy gewoonlik weier om te doen en waaroor ek ontsteld raak. Vir sy pa vertel hy dat ek lelik met hom is, maar as sy pa nie by is nie, sal hy selfs weier om my te groet as ek hom by die skool oplaai. Hy antwoord nie as ek praat nie, s\u00ea nie asseblief of dankie nie. Hy sal my selfs doelbewus stamp, of in my vasloop – sonder om verskoning te vra. As ek hom vra om iets te doen, ignoreer hy my. Dis asof daar geen klank by my mond uitgekom het nie.”<\/p>\n

\u201cHy doen net wat hy wil en aanvaar geen verantwoordelikheid nie. Hy vat my goed, vat kos uit die yskas sonder om te vra. Maak nie skoon nie. Los vuil skottelgoed oral, of hy verdwyn sommer net sonder om te s\u00ea waarheen hy gaan. Hy ignoreer elke re\u00ebl of versoek van my kant af. Hy knou my seuntjie af en breek sy speelgoed. Ek is moedeloos. Vir sy pa s\u00ea hy ek lieg en is ongeskik met hom. ”<\/p>\n

\u201cMy man is ook nie konsekwent nie, want hy wil so graag \u2019n goeie verhouding met sy seun h\u00ea – hy is bang Johan wil liewer by sy ma gaan bly. Volgens sy pa en ma is alles reg en is daar niks fout nie. Maar die skool bel my om te s\u00ea hy doen nie sy werk nie en het \u2019n houding. Sy pa en ma glo die fout l\u00ea by die onderwysers, die skool, iets of iemand anders … Hulle probeer so hard om sy guns te wen. Ek leef vir elke tweede naweek wanneer hy by sy ma is. Dan het ons \u2019n normale huis met \u2019n lekker atmosfeer.\u201d<\/p>\n

Ansie vertel hoe hard sy probeer het om goed vir haar man se kinders te wees. Hul ma was in \u2019n inrigting vir alkoholiste.<\/p>\n

\u201cEk lees vir klein Andr\u00e9 sy gunsteling-slaaptydstories. Maak seker sy kamer is mooi, sy bed warm en dat hy lekker skoolkos het, help hom met sy huiswerk, neem hom daagliks na sy rugby, krieket, of om by sy maatjies te gaan speel. Ek was ontsteld, hartseer en teleurgesteld om te hoor hoe hy in sy kamer vir sy eie ma vertel dat ek kwaai en aaklig is. En dit n\u00e1 alles wat ek vir hom doen – goed wat sy eie ma nie eens sou doen nie. \u2019n Terapeut moes my help om te besef dat dit nie oor m\u00fd gaan nie: dis maar net \u2019n hartseer seuntjie wat sy mamma mis. En dat sy hom boonop teen my opmaak en hy juis di\u00e9 dinge s\u00ea om haar goedkeuring te kry.\u201d<\/p>\n

 <\/p>\n

\"\"<\/p>\n

 <\/p>\n

 <\/p>\n

Moeilike situasies waarin stiefouers hulself bevind<\/h4>\n

Stiefouers voel dikwels erg gefrustreerd en soos vreemdelinge in hul eie huis,<\/strong> en asof niks wat hulle doen goed genoeg is, of gewaardeer word nie. Wanneer hul frustrasie op \u2019n dag oorneem, doen of s\u00ea hulle dikwels dinge wat kon bly en waaroor hulle later spyt is en hulle sleg oor hulself laat voel. Op die ou end gee hulle uit selfregverdiging vir die kind die skuld – wat natuurlik geensins tot enige oplossing bydra nie.<\/p>\n

Daar is groot fout as \u2019n kind in di\u00e9 omstandighede tussen sy ouers moet kies.<\/strong> Of as \u2019n ouer tussen sy kind of sy lewensmaat moet kies. \u2019n Mens moet altyd albei kan kies. Ouers moet leer om situasies so te bestuur dat verhoudings nooit tot op daardie punt kom nie.<\/p>\n

As jy in \u2019n verhouding is met iemand wat kinders het, moet jy kans sien vir die hele verwikkelde en ingewikkelde pakkie.<\/strong> Wanneer jy en jou maat ernstig oor mekaar is en julle aan mekaar wil verbind, moet julle besef dat jul onderskeie kinders altyd deel van die verbintenis gaan wees en dat jy hulle \u00f3\u00f3k kies.<\/p>\n

Dis baie belangrik dat ouers vooraf die potensi\u00eble haakplekke en huisre\u00ebls sal bespreek.<\/strong> Albei moet besef dat aanpassings nodig sal wees en ooreenkom hoe om dit te hanteer sodat almal se behoeftes en persoonlikhede in ag geneem word. Dis ook beter as dit kan gebeur voordat die ouers saam intrek. Die kinders kan ook betrek word, afhangende van hul ouderdomme. Hulle moet die geleentheid kry om hul bekommernisse en behoeftes te bespreek en hul eie emosies te verwerk.<\/p>\n

Dis vir ouers maklik om hul eie kinders se behoeftes bo hul eie te stel maar dis baie meer gekompliseerd om dit vir iemand anders se kinders te doen,<\/strong> veral as die kinders juis dinge vir jou moeiliker maak. Dis nie maklik om deurentyd te probeer onthou dat die situasie nie die kind se keuse is nie, dat sy nie gevra of beplan het om \u2019n uitwerking op jou lewe en roetine te h\u00ea nie.<\/p>\n

Daarom is dit van die uiterste belang om nie jou frustrasies uit te haal op \u2019n kind wat boonop emosioneel swaarkry nie.<\/strong> Die enigste werkbare oplossing is om die volwassene in die situasie te wees en om alles in jou vermo\u00eb te doen om \u2019n goeie verhouding met jou maat se kinders op te bou.<\/p>\n

Die kind sal onwillekeurig die nuwe \u201couer\u201d se optrede met di\u00e9 van sy eie ouer vergelyk:<\/strong> \u201cMy ma het my dit toegelaat,\u201d of \u201cBy my ma kan ek later gaan slaap.\u201d<\/p>\n

Kinders maak ook verkeerde aannames:<\/strong> \u201cJy raas met my, of dissiplineer my, of weier my versoek omdat ek nie jou eie kind is nie.\u201d Intussen is die teendeel die ware motief, want jy sou waarskynlik presies dieselfde met jou eie kinders gedoen het. Dit sal tyd, geduld, baie liefde en positiewe ervarings verg om di\u00e9 soort aannames en persepsies te verander sodat hulle die teendeel sal glo.<\/p>\n

Jaloesie is een van die grootste redes waarom \u2019n negatiewe konnotasie van die stiefmoeder-stiefkind-verhouding voortleef.<\/strong> Wanneer ouers skei, het kinders aanvanklik elke ouer net vir hulself. Wanneer die ouer \u2019n nuwe lewensmaat kry, moet hulle daardie ouer en die tyd saam met hom of haar met die nuwe maat deel. Dis dikwels nog \u2019n verlieservaring vir sowel die kind as die stiefouer, wat ook aanvanklik meer alleentyd met die nuwe maat gehad het.<\/p>\n

Die beste kans om \u2019n goeie verhouding met stiefkinders te h\u00ea is wanneer alle partye die breuk met die vorige verhouding van die ouers verwerk het.<\/strong> Dit stel albei stelle ouers in staat om aan te beweeg maar ook te besef dat dit noodsaaklik is dat die kinders goeie verhoudings met albei hul biologiese ouers het.<\/p>\n

Aan die ander kant is dit ewe belangrik dat hulle \u2019n goeie, liefdevolle verhouding met hul stiefouers ontwikkel.<\/strong> Dit gee kinders die ruimte om gelukkig te wees. Dis baie moeilik wanneer kinders voortdurend aan negatiewe opmerkings oor enige ouer blootge-stel word en voel hulle moet tussen ouers kies, of nie die vryheid ervaar om van hul stiefouers te mag hou nie.<\/p>\n

As \u2019n mens verander, gebeur die interessantste dinge omdat ander mense en hul interaksie met jou ook verander! Verander jou aanslag met jou stiefkind en jy sal nie glo wat moontlik kan wees nie.<\/strong><\/p>\n

 <\/p>\n

\"\"<\/p>\n

 <\/p>\n

 <\/p>\n

Bou \u2019n goeie verhouding met jou maat se kinders<\/h4>\n