{"id":108490,"date":"2023-03-24T12:08:54","date_gmt":"2023-03-24T10:08:54","guid":{"rendered":"https:\/\/novanews.co.za\/rooirose\/?p=108490"},"modified":"2023-03-24T12:11:40","modified_gmt":"2023-03-24T10:11:40","slug":"nie-goed-genoeg-nie-wat-jy-kan-doen-oor-gevoelens-van-minderwaardigheid","status":"publish","type":"post","link":"https:\/\/novanews.co.za\/rooirose\/nie-goed-genoeg-nie-wat-jy-kan-doen-oor-gevoelens-van-minderwaardigheid\/","title":{"rendered":"Nie goed genoeg nie? Wat jy kan doen oor gevoelens van minderwaardigheid"},"content":{"rendered":"

Nie goed genoeg nie? Wat jy kan doen oor gevoelens van minderwaardigheid deur Anet Schoeman. Hooffoto: iStock\/St\u00edgur M\u00e1r Karlsson \/Heimsmyndir<\/a><\/em><\/p>\n

 <\/p>\n

Onlangs het \u2019n vriendin vir haar ma in die aftree-oord gaan kuier. Haar ma was haar lewe lank baie gesteld op haar voorkoms en op byna negentig word haar hare steeds noukeurig gekleur en haar grimering, juwele, naels en kleurko\u00f6rdinering bly \u2019n prioriteit.<\/p>\n

Die vriendin is \u2019n hoogs intelligente vrou – \u2019n professor in chemie met \u2019n rits akademiese toekennings agter haar naam. Maar voorkoms en mode is van minder belang. Gemaklike skoene, hare in \u2019n poniestert en vormlose klere was haar keuse vir die kuiertjie. Sy was tog sprakeloos toe haar ma haar aan mense by die aftree-oord voorstel met: \u201cDis my dogter Trudie*. Sy is nie my mooi dogter nie.\u201d<\/p>\n

(*Skuilnaam.)<\/p>\n

 <\/p>\n

 <\/p>\n

Wat kan ma\u2019s doen om hul dogters \u2019n gesonde selfbeeld te gee?<\/h4>\n

Cheryl Gr\u00e4ser-Pruss, \u2019n kliniese sielkundige by Akeso in Randburg, glo dat ma\u2019s eers aan hulself moet werk en hul eie emosies en gevoelens moet verstaan voor hulle \u2019n gesonde selfbeeld aan hul dogters kan oordra.<\/p>\n

\u201cMa\u2019s dra meestal kinders se belange op die hart, maar ma\u2019s wat minderwaardig voel, kan onbewustelik hul dogters met dieselfde gevoel van \u2018nie goed genoeg nie\u2019 opsaal. Soms is ma\u2019s ook geneig om dogters as \u2019n verlengstuk van hulself te sien.\u201d<\/p>\n

Hierdie patrone word al vroeg in \u2019n kind se lewe neergel\u00ea sonder dat ouers of kinders daarvan bewus is. Die selfvertroue-kwessie kom dikwels eers in die tienerjare na vore en dan is dit moeilik om te verstaan wat dit veroorsaak het.<\/p>\n

Soms kan die tydsberekening en aard van \u2019n voorval die ware gebeure oorskadu. Cheryl vertel van \u2019n kli\u00ebnt wat as kind in \u2019n openbare plek \u2019n pak slae gekry het. \u201cDit was iets wat nooit tevore gebeur het nie en sy het so verneder en geskok gevoel dat dit haar tot in haar volwassenheid bygebly het. Sy het hierna gesukkel om mense te vertrou. Toe sy as volwassene di\u00e9 voorval as die bron van haar probleme ge\u00efdentifiseer het, het sy besef dat sy die omstandighede uit verband geruk het. Sy kon met haar nuwe insig die situasie in \u2019n ander lig sien en haar probleme afskud.<\/p>\n

\"Nie

iStock\/monkeybusinessimages<\/p><\/div>\n

 <\/p>\n

 <\/p>\n

Praat met jou kinders<\/h4>\n

\u201cDis so belangrik dat ouers die soort kwessies agterna bespreek sodat kinders dit in die regte lig kan sien. Die meeste ouers is baie besig, maar die tyd wat jy in tieners bel\u00ea, gaan soveel waarde inhou. Kinders voel soms vasgevang in re\u00ebls en dat hulle niemand het wat kan luister nie.”<\/p>\n

\u201cEk het so \u2019n stel met my tienerdogter afgetrap. Sy was die modeltiener en ek het so gese\u00ebn gevoel. Tot sy \u2019n nuwe vriendin gekry het en skielik nie betyds huis toe gekom het nie en na sigarette en alkohol geruik het. Ek het agtergekom dat sy vir my jok en toe ek meer re\u00ebls en regulasies neerl\u00ea, het dinge net vererger. Ek was radeloos en het by haar gaan sit en ges\u00ea: \u2018Jy word so vinnig groot dat ek nie kan byhou nie. Dis my rol om jou veilig te hou, maar ek weet nie hoe nie. Kan jy my help?\u2019 Dit was die eerste van baie logiese en oop gesprekke tussen ons wat ons verhouding verstewig het en die situasie omgekeer het.\u201d<\/p>\n

Ouers voel desperaat wanneer tieners onbeheerbaar word, maar jy veg \u2019n verlore stryd wanneer jy met wette probeer regeer sonder om hul menings en regte ook in ag te neem. Jy moet tieners die geleentheid gee om \u2019n mening te h\u00ea.<\/p>\n

\"Nie

iStock\/gorodenkoff<\/p><\/div>\n

 <\/p>\n

Almal maak foute<\/h4>\n

Cheryl s\u00ea ouers moet besef dis menslik om foute te maak.<\/p>\n

\u201cDis belangrik om na te dink oor wat jy ges\u00ea en gedoen het, en bespreek dit met jou kinders. As jy verkeerd was, s\u00ea so. Dis \u2019n uitdaging om vandag \u2019n ouer te wees. Boonop kom ons ouerskapkennis van ons ouers af wat kinders in \u2019n heel ander w\u00eareld grootgemaak het. Hedendaagse kinders word deur veel meer as net hul ouers se voorbeeld be\u00efnvloed. As ouers voel hulle kom nie die mas op nie, is dit \u2019n goeie plan om \u2019n terapeut te gaan spreek.<\/p>\n

\u201cDie uitwerking van woorde kring veel wyer as die bedoelde betekenis uit, en jong kinders smag na die goedkeuring van hul ouers en leerkragte,\u201d s\u00ea Sarah Lamont, arbeidsterapeut en
\nbestuurder van groepterapie by Akeso-kliniek in Randburg. Namate kinders ouer word, behoort die soeke na goedkeuring na vriende te verskuif, maar sommiges haak by goedkeuring van hul ma vas.<\/p>\n

Weet dat kleine muisies grote ore het en kinders soms gesprekke tussen volwassenes hoor en verkeerde afleidings maak. \u201cLiana was \u2019n foutjie,\u201d kan jou manier wees om vir \u2019n kennis te vertel dat jou jongste nie beplan was nie. Maar dit beteken nie dat sy onwelkom was nie. Tog kan \u2019n kind dit interpreteer dat sy ongewens is en dit kan tot gevoelens van nie-goed-genoeg-nie lei.<\/p>\n

Maar ouers kan nie in vrees leef dat elke woord \u2019n kind se lewe kan ru\u00efneer nie. \u201cOns moet bloot bewus wees van uit watter perspektief kinders ons woorde beoordeel. Die werklikheid is dat ouers soms verkeerde goed gaan s\u00ea. Solank jy weet dat dit met die beste bedoelings was.\u201d<\/p>\n

\"Nie

iStock\/Marisa9<\/p><\/div>\n

 <\/p>\n

 <\/p>\n

Stadig met die komplimente<\/h4>\n

Sarah waarsku ook teen die teendeel: wanneer ouers kinders heeltyd komplimenteer oor selfs die kleinste dingetjie wat hulle doen. Dit kan die druk verhoog, veral as die fokus op een spesifieke gebied van prestasie is.<\/p>\n

\u201cAs jy heeltyd vertel watter goeie tennisspeler, danser of sanger jou kind is, word \u2019n etiket om haar nek gehang en is sy onder druk om jou nie in die steek te laat nie. S\u00ea eerder: \u201cDoen jou bes.\u201d<\/p>\n

Te veel lof is net so \u2019n valstrik soos te veel kritiek. Albei kan aanleiding gee tot kinders wat desperaat na goedkeuring soek. Die probleem is dat kritiek en lof dikwels meer fokus op hoe ons as ouers voel as oor wat die kind gedoen het, en hoe sy daaroor voel. Dit leer kinders nie selfmotivering nie.<\/p>\n

Moenie dat hul identiteit deur hul talente bepaal word nie. Komplimenteer hulle as hulle vriendelik, hulpvaardig en geesdriftig is.<\/p>\n

Moet dit ook nie altyd oor jouself maak nie. Pleks van te s\u00ea: \u201cEk is so trots op jou,\u201d s\u00ea eerder \u201cJy moet so trots op jouself voel.\u201d<\/p>\n

Fokus op die poging eerder as op die resultate. \u201cJy het werklik hard vir jou toets geleer,\u201d dui daarop dat die poging belangrik was teenoor \u201cFantasties dat jy \u2019n A gekry het.\u201d (Lees hierdie vir meer hulp: How to talk to kids so kids will listen and listen so kids wil talk.)<\/p>\n

\"Nie

iStock\/shapecharge<\/p><\/div>\n

 <\/p>\n

 <\/p>\n

Kinders het ook \u2019n mening<\/h4>\n

Dis noodsaaklik dat kinders leer dat hulle op \u2019n mening geregtig is en dat daardie mening belangrik is. Dink mooi voor jy iets s\u00ea. Gaan dit nuttig wees? Hoe gaan dit ge\u00efnterpreteer word? As jy \u2019n oop verhouding met jou kind het en julle gereeld gesels, sal jy agterkom wanneer iets pla. Dan is dit maklik om \u2019n misverstand reg te stel. As jy gedurig beter weet en elke mening afskiet, deel kinders later nie meer hul gevoelens nie.<\/p>\n

Sarah vertel dat sy as die middelkind altyd gevoel het haar mening is nie belangrik nie. Sy was die ster totdat haar jonger boetie gebore is, en het daarna uitgesluit gevoel. \u201cEk het gevoel as ek belangrik was, sou mense aan die etenstafel my mening gevra het. Die werklikheid was dat almal besig was. Ek het stiller en stiller geword. Dit het \u2019n geweldige uitwerking op my persoonlike ontwikkeling gehad. Ek het soos die mislukking gevoel wat nooit goed genoeg was nie. Dit was eers toe ek as \u2019n volwassene vir terapie gegaan het dat ek besef het ek het hierdie kritiek en oordeel oor myself uitgespreek.\u201d<\/p>\n

Sarah s\u00ea sy sien dieselfde verwronge interpretasie van gebeure in die groepterapiesessies waarby sy betrokke is. \u201cDis min dat ma\u2019s hul kinders met voorbedagte rade afkraak en minderwaardig laat voel. Oor die algemeen bring ons hierdie afkeuring oor onsself deur ons interpretasie van gebeure.\u201d<\/p>\n

\"Nie

iStock\/asiseeit<\/p><\/div>\n

 <\/p>\n

 <\/p>\n

Leer kinders hulle is goed genoeg<\/h4>\n

As jy kinders kan leer dat hulle goed genoeg is, sal ander se mening van hulle nie soveel gewig dra nie.<\/p>\n

\u201cGewoonlik is die voorval waaruit ons die afleiding maak werklik. Maar dis ons interpretasie daarvan wat dit skeeftrek. Ons laat toe dat mense se menings ons definieer as ons gedurig na hul goedkeuring soek,\u201d s\u00ea Sarah.<\/p>\n

Sy s\u00ea net soos party mense die lewe deur \u2019n rooskleurige bril sien, is daar ander wat alles in \u2019n negatiewe lig sien. \u201cProbeer bepaal waar jou oortuiging dat jy nie goed genoeg is nie vandaan kom. Probeer die situasie in \u2019n ander lig sien en omraam dit met nuwe, positiewe emosies. So kan jou interpretasie daarvan ook verander. Probeer om die irrasionele te rasionaliseer. \u2019n Terapeut kan baie help, want ons irrasionele denke en idees is dikwels ons blinde kol.<\/p>\n

\u201cAs \u2019n ouer moet jy probeer om opbouende kritiek te lewer. As jy n\u00e1 \u2019n slegte dag op kantoor by sussie hoor dat sy nie goed in \u2019n toets gedoen het nie en s\u00ea: \u201cEk kan altyd op jou reken om my slegte dag nog \u2019n entjie slegter te maak,\u201d worstel die kind met die teleurstelling van swak toetspunte \u00e9n jou afkeuring.\u201d<\/p>\n

Maar ouers is menslik en maak foute en dis hoekom ouers tyd moet maak om na te dink oor wat die uitwerking kan wees van dinge wat hulle ges\u00ea en gedoen het. As jy besef dat jy \u2019n onbesonne ding kwytgeraak het, bespreek dit met jou kind. S\u00ea jy is jammer as jy oorhaastig met jou woorde was en verduidelik wat jy eintlik bedoel het. Dis nie dat jy as ouer gefaal het nie, maar dit leer kinders die waardevolle les leer dat jy dinge kan regstel deur daaroor te praat.<\/p>\n

 <\/p>\n

Ja, jy is goed genoeg<\/h4>\n