Deur Maryke Roberts en Abbie Cornish
’n Splinternuwe nuwe reeks Invisble – gebaseer op Deon Meyer se boek Onsigbaar – skop eersdaags op DStv af en sluit verskeie plaaslike en internasionale sterre in. Die sterbelaaide rolverdeling bring ekstra diepte na die skerm, waaronder die Australiese aktrise Abbie Cornish (Emma le Roux), die Skotse akteur Dougray Scott (Quintis Wernich) en Tumisho Masha (kolonel Jack Patudi).
By ’n eksklusiewe paneelbespreking, nadat die eerste episode van die reeks tydens die onlangse 14de Silwerskermfees in Kampsbaai vertoon is, het die kreatiewe span vertel wat dit geverg het om hierdie reuseproduksie te skep.
Invisible is vervaardig deur die span wat ook vir Trackers en Heart of the Hunter verantwoordelik was, en dit volg die verhaal van die lyfwag Martin Dekker en Emma Le Roux, ’n Suid-Afrikaner wat in Londen woon. Terwyl hulle ’n sameswering in die Suid-Afrikaanse Laeveld ontbloot wat reeds dekades lank verswyg is, kom die polisie-ondersoeker kolonel Jack Phatudi al hoe nader aan ’n korrupsienetwerk wat tot in die hoogste magskringe reik.
Die storie agter die storie
Die reeks put inspirasie uit werklike gebeure, insluitend die geheimsinnige vliegtuig-ongeluk van 1986 waarin die voormalige Mosambiekse president, Samora Machel, gesterf het.
Die reeks is deur Jozua Malherbe geregisseer en deur William Schneider en Deon Meyer, geskryf, met bykomende skryfwerk deur Amy Jephta.
Die hoofakteur en -vervaardiger, Tim Theron (wat die rol van Martin Dekker vertolk), het vertel dat hy van die begin af ’n sterk band met die projek gehad het: “Ek het van meet af aanklank by die karakter gevind en vir Deon aanhoudend gepor met die woorde: ‘Ons móét dit doen…’ Dit is werklik ’n lewenslange voorreg om aan dit lewe te kan gee.” Tim het daarop gewys hoe verskillend die stil hoofkarakter van sy eie spraaksame persoonlikheid is, en dit as ’n buitengewone geleentheid vir ’n akteur beskryf.
Vir die topverkoper-outeur Deon Meyer het die opdatering van ’n roman wat reeds 20 jaar oud is, beteken dat die verhaal by die moderne Suid-Afrika aangepas moes word, sonder om die kern daarvan prys te gee.
“My filosofie was nog altyd: As ons dit aanpas, kom ons maak ’n uitstekende televisiereeks daarvan,” het Meyer gesê en verduidelik dat ’n goeie verwerking vir die skerm selfs meer lesers na die boeke lok.
Plaaslike anker met internasionale flair
Vervaardiger Cobus van der Bergh het beklemtoon hoe belangrik dit is – en dat daar nie daaroor onderhandel kan word nie – om die verhaal plaaslik geanker te hou, ten spyte van internasionale belangstelling: “Die verhaal is Suid-Afrikaans en bly getrou daaraan. Moenie probeer om dit te internasionaliseer of ’n Hollywood-stempel daarop af te dwing nie… Dit is uniek, en ons het wonderlike stories.”
Cobus het openhartig vertel hoe internasionale betrokkenheid die standaard verhoog het – van die akkommodering van uitnemende talent tot die werk met ’n begroting op hotelvlak – wat plaaslike talent in staat gestel het om met trots op ’n wêreldverhoog te staan.
Om die visuele omvang van die program te bereik, het geweldige detail en samewerking geverg. Regisseur Jozua van der Walt het die belangrike kreatiewe vennoot Jorrie erken vir die vorming van die kenmerkende visuele taal. Om Hoedspruit se sondeurdrenkte, warm Bosveld-skakerings te laat kontrasteer met Kaapstad se kouer kleurpalet, het die span ’n geaarde, doelgerigte benadering tot kamerawerk gekies – om te verseker dat elke skoot organies, pragtig en outentiek voel binne die spanningsvolle verhaal, sonder om die aksie onnodig ingewikkeld te maak.
Tim Theron op ‘Invisible’ se stel. Foto: Verskaf
Balans tussen aksie en karakter
Draaiboekskrywer en mederegisseur Amy Jephta het gewys op die uitdaging om ’n balans te vind tussen meesleurende aksie en diep karakterontwikkeling; om hulde te bring aan geliefde karakters terwyl die draaiboek aangepas word om by ’n massiewe produksiebegroting te pas.
Kim Engelbrecht, wat die rol van Jeanette vertolk, het die krag van samewerking en komplekse vroulike rolle beklemtoon: “Kwetsbaarheid is soos een van Jeanette se superkragte… Dit was ’n pragtig geskrewe karakter, so ek was werklik dankbaar om die rol te kon vertolk. Wat Tim, Siv en Tshamano betref: Jy is net so sterk soos die persoon saam met wie jy speel. Hulle verleen dus gewig aan my karakter. Vir my was dit ook bloot ’n wonderlike geleentheid vir ’n kragtige vertolking. Maar ek is mal daaroor om sterk vroue te speel!”
Naas Tumisho Masha se indrukwekkende vertolking as kolonel Jack Patudi – ’n rol wat hy wou anker as ’n alledaagse Suid-Afrikaanse held – verweef die reeks plofbare spanning met ryk karaktervertelling.
Met internasionale steun van ITV Studios, tesame met noodsaaklike plaaslike ondersteuning van M-Net en plaaslike finansiers, is Invisible ’n viering van plaaslike talent van wêreldgehalte, wat in staat is om gehore wêreldwyd te boei.
Vrae vir Abbie (Emma):
Invisible is diep gewortel in die Suid-Afrikaanse kultuur en landskap. Hoe was dit om jou in hierdie omgewing te verdiep, en hoe het verfilming op plaaslike plekke tot jou vertolking van Emma le Roux bygedra?
Om vir die eerste keer in Suid-Afrika te wees en op die werklike plekke te verfilm waar Emma se verhaal afspeel, het my ’n baie dieper begrip gegee van die wêreld waaruit sy kom en die uitdagings wat sy moes oorkom. Die landskap, die mense en die geskiedenis het deel geword van my begrip van haar veerkragtigheid, instinkte en die keuses wat sy deur die loop van die reeks maak.
Deon Meyer se karakters het ’n reuse- plaaslike aanhang. Hoe het jy te werk gegaan om Emma vir Suid-Afrikaanse gehore lewend te maak, terwyl sy steeds aanklank by internasionale kykers kon vind?
Dit was ’n groot verantwoordelikheid om Deon se wêreld te betree, veral met die wete hoeveel hierdie karakters vir Suid-Afrikaanse gehore beteken. Ek het daarop gefokus om Emma se waarheid – haar krag, kwetsbaarheid en vasberadenheid – te vind; eienskappe wat hopelik by mense oral aanklank vind.
Kim het genoem dat ’n akteur net so sterk is soos die persoon teenoor wie hulle speel. Hoe was jou ervaring met plaaslike sterre soos Tim Theron en Tumisho Masha op stel?
Om saam met Tim en Tumisho te werk was ’n ware hoogtepunt; hulle is albei ongelooflik talentvolle, vrygewige en volledig teenwoordige akteurs. Daar was ’n groot gevoel van vertroue tussen ons, en hul begrip van die karakters en die Suid-Afrikaanse wêreld wat ons geskep het, het ’n diepte na ons tonele gebring wat ek regtig waardeer het.
Amy het gepraat oor die balansering van voortstuwende aksie met diep karakterwerk. Hoe fisiek en emosioneel veeleisend was dit om Emma te speel tydens hierdie intense, hoë-risiko-tonele?
Dit was beslis ’n veeleisende verfilming, met baie fisieke aksie en baie emosionele gebied om te navigeer. Ek was mal oor daardie kombinasie; dit het my op my tone gehou en elke dag soos ’n avontuur laat voel.
Abbie Cornish skiet ‘n toneel in ‘Invisible’. Foto: Verskaf
Cobus het gedeel dat internasionale betrokkenheid die standaard verhoog het, met ’n hotelskaalbegroting, terwyl die storie plaaslik gehou is. Hoe het die energie op hierdie stel vergelyk met ander internasionale projekte waaraan jy gewerk het?
Daar was ’n fantastiese gevoel van skaal en ambisie, maar dit het nooit sy Suid-Afrikaanse gevoel verloor nie. Daardie kombinasie van internasionale produksiewaarde en so ’n sterk plaaslike identiteit het die hele projek ’n werklik kenmerkende energie gegee.
Die program se kreatiewe span het beklemtoon dat dit ononderhandelbaar was om die storie eg Suid-Afrikaans te hou. Wat maak hierdie spesifieke Afrika-verhaal, volgens jou, so boeiend vir kykers wêreldwyd?
Ek dink wat Invisible so boeiend maak, is dat die menslike verhaal universeel is, al is dit diep in ’n baie spesifieke Afrika-landskap en -kultuur gewortel. Dit bevat spanning, komplekse karakters, temas soos familie en oorlewing, asook morele keuses waarmee gehore oral heen kan identifiseer. Dit stel hulle terselfdertyd bloot aan ’n wêreld en perspektief wat hulle dalk nog nie voorheen gesien het nie.
Wat was – afgesien van die verfilming self – vir jou persoonlik die hoogtepunt daarvan om tydens die produksieproses in Suid-Afrika te woon en te werk?
Daar was soveel hoogtepunte – van die buitengewone landskappe tot die hartlikheid en vrygewigheid van die mense wat ek ontmoet het – maar bloot die tyd om Suid-Afrika vir die eerste keer te ervaar, was vir my ongelooflik betekenisvol. Ek het hier aangekom vir werk, maar toe ek vertrek, het ek gevoel ek het ’n band gesmee met ’n land wat vir altyd baie na aan my hart sal bly.
Abbie Cornish prys die Suid-Afrikaanse filmindustrie se uitmuntendheid en sterk identeit. Foto: Verskaf
Invisible begin op M-Net (DStv-kanaal 101) op 14 Oktober om 20:00.
Lees ook: Deon Meyer se M-Net reeks INVISIBLE se amptelike lokprent is nou beskikbaar | rooi rose
