{"id":59921,"date":"2022-09-02T09:02:31","date_gmt":"2022-09-02T07:02:31","guid":{"rendered":"https:\/\/novanews.co.za\/paarlpost\/oom-giel-word-so-onthou-20220902\/"},"modified":"2025-03-19T23:53:31","modified_gmt":"2025-03-19T21:53:31","slug":"oom-giel-word-so-onthou-20220902","status":"publish","type":"post","link":"https:\/\/novanews.co.za\/paarlpost\/oom-giel-word-so-onthou-20220902\/","title":{"rendered":"Oom Giel word s\u00f3 onthou…"},"content":{"rendered":"\n

Stilweg het \u2019n sagte spaan spore op die water gelaat het \u2019n moedige spaan die weg gebaan  \u2019n dapper spaan \u2019n bres geslaan  \u2019n trotse spaan alleen bly staan stilweg het \u2019n sagte spaan heengegaan  tog bly vir altyd die spore op die water \u2013  sy spore.<\/p>\n\n\n\n

S\u00f3 lui die woorde van die mederoeier en vriend van Giel van Deventer, Danie Brink, as een van die talle eerbetuigings wat vandeesweek steeds ingestroom het n\u00e1 die verdrinking van di\u00e9 geliefde en legendariese Paarlse kano\u00advaarder wat naby Swellendam dood is.<\/p>\n\n\n\n

Van Deventer het aan voorafwedvaarte deelgeneem as voorbereiding vir die Bre\u00ebrivier-kanomarathon, wat in September plaasvind, toe die noodlot tref.<\/p>\n\n\n\n

Dit is ook toevallig 50 jaar gelede dat Van Deventer en sy goeie vriend asook gesoute kanojaer, JT Basson, saam in hul K2-kano die Bre\u00ebrivier-kanomarathon gewen het. Van Deventer en sy spanmaat, Lood Rabie, se K2-kano het op 20 Augustus \u2019n boomstomp in die rivier tussen Drew Bridge en Swellendam getref.<\/p>\n\n\n\n

Rabie kon veiligheid bereik, maar Van Deventer het onder die water verdwyn. Sy liggaam is n\u00e1 \u2019n twee dae lange soektog naby die plek waar hulle die boomstomp getref het, gevind. <\/p>\n\n\n\n

Van Deventer sal veral onthou word as legendariese roeier en deeglike statistikus van die sport. Hy hou die rekord vir die meeste Bergrivier-kanomarathontitels \u2013 51 \u2013 maar was in die algemeen \u2019n gesoute sportman en het ook aan 19 Argus-fiets\u00adtoere, 24 Orange Descent-kanomarathons, 25 Visrivier-kanomarathons en 38 Bre\u00ebrivier-kanomarathons deelgeneem. In \u2019n vroe\u00ebre onderhoud met Paarl Post<\/em> het Van Deventer, wat in Swellen\u00addam grootgeword het, vertel toe die eerste Bergrivier-kanomarathon in 1952 plaasgevind het, het hy as 12-jarige op die Bre\u00ebrivier in Swellendam begin roei met die droom om eendag aan die Bergrivier-kanomarathon deel te neem.<\/p>\n\n\n\n

Hy het in 1969 aan sy eerste Bergrivier-kanomarathon deelgeneem. Van Deventer sal egter vir baie meer as net roei onthou word.<\/p>\n\n\n\n

Hy was ook \u2019n bekende Protea-boer, sekretaris van die Bergrivier-besproeiingsraad en \u2019n passievolle omgewingskundige. Op sy plaas Floralea, teen die hange van Paarlberg, het hy indringerbome die stryd aanges\u00ea en hom goed van die taak gekwyt en sy 160-hektaar-plaas basies skoongemaak van indringerplante en die fynbos hier hervestig. Hy was passievol oor die bewaring van die Bolandse berge en het saam met Cape Nature gewerk om oplossings vir probleme in die berg te vind. <\/p>\n\n\n\n

Hy was ook deur die jare by die Bergrivier-besproeiingsraad betrokke en hier het hy \u2019n belangrike rol op verskeie platforms gespeel. Billy Bourbon-Leftley, voorsitter van die raad, het ges\u00ea Van Deventer het die rivier vanwe\u00eb sy liefde vir roei baie goed geken. Hy het in sy rol by die raad geweet waar elk boer se besproeiings\u00adpompe langs die rivier is en het hiermee raad gegee. Veral in die tye van droogte \u2019n paar jaar gelede, toe boere se waterverbruik uit die Bergrivier erg beperk was, het Van Deventer pal die situasie gemonitor en as raadgewer hieroor opgetree.<\/p>\n\n\n\n

Hy was ook druk betrokke by die skoonmaak van die rivieroewers van indringerplante en blokkasies wat die natuurlike vloei van die rivier belemmer het.<\/p>\n\n\n\n

Van Deventer het as jongman na die Paarl verhuis. Hoewel hy \u2019n landbouagtergrond gehad het, het hy eers hier \u2019n fietswinkel oopgemaak, en later \u2019n graniet-gedenkplaat-onderneming onder in Lady Greystraat.<\/p>\n\n\n\n

Hy en sy vriend JT, wat in Klein Drakenstein boer, het begin om proteas op Wildepaardejacht-plaas te plant. Nadat \u2019n bergbrand hul plantasies verwoes het, het Van Deventer die plaas Floralea aan die hange van Dutoitskloof gekoop, waar hy \u2019n baie suksesvolle protea- en fynbos-plaas op die been gebring het.<\/p>\n\n\n\n

Maar Van Deventer was eerstens \u2019n gesinsman en word deur sy dogter, Karike Conradie, onthou: \u201cOns as familie gaan hom baie mis as \u2019n pa en oupa wat bel en vra wanneer kom ons kuier; hy mis ons (al weer!) en \u2018bring die kaarte saam\u2019. Ek en Abe gaan hom baie mis as \u2019n entrepeneurs- en sakementor en het veral in die afgelope maand baie spesiale tye saam beleef.<\/p>\n\n\n\n

\u201dVan Deventer sou m\u00f4re (2 September) sy 73ste verjaardag vier.<\/p>\n\n\n\n

\u2019n Kranslegging vind vandag (1\u2009September) om 17:30 by die Paarl-kanoklub plaas tesame met \u2019n wedvaart ter nagedagtenis aan Van Deventer. Die begrafnisdiens word vir 18\u2009September beplan en Karike kan hieroor gekontak word deur diegene wat dit wil bywoon, na die regstreekse uitsending wil kyk of mooi herinneringe oor Van Deventer wil skryf vir \u2019n bundel wat die familie saamstel. Sy kan by karike@kikka.co.za gekontak word. <\/p>\n\n\n\n