{"id":59129,"date":"2022-10-07T09:57:28","date_gmt":"2022-10-07T07:57:28","guid":{"rendered":"https:\/\/novanews.co.za\/paarlpost\/kerk-se-kafee-n-lekker-kuierplek-20221005-2\/"},"modified":"2025-03-20T00:30:52","modified_gmt":"2025-03-19T22:30:52","slug":"kerk-se-kafee-n-lekker-kuierplek-20221005-2","status":"publish","type":"post","link":"https:\/\/novanews.co.za\/paarlpost\/kerk-se-kafee-n-lekker-kuierplek-20221005-2\/","title":{"rendered":"Kerk se \u2018kafee\u2019 \u2019n lekker kuierplek"},"content":{"rendered":"\n

Die plaaslike kafee The Gathering Caf\u00e9 in New Orleans in Paarl-Oos is \u2019n lekker plek van samekoms waar geselligheid, kos en geloof soms mense bymekaar bring.<\/p>\n\n\n\n

Die liefde vir kos het pastoor Bjorgan Morrie ge\u00efnspireer en aangepor om The Gathering Caf\u00e9 te begin toe die geleentheid hom voorgedoen het. Nou is die einste kafee bekend vir sy liplek-lekker roosterkoeke, koffie, trots Suid-Afrikaanse bredies en n\u00f3g meer. The Gathering Caf\u00e9 behoort aan die kerk met dieselfde naam, The Gathering Wholeness Centre, en is in Orleanslaan gele\u00eb.<\/p>\n\n\n\n

Die kafee se deure is in die middel van die koronaviruspandemie geopen, maar moes weer vinnig gesluit word toe een van die vele koronavirusvlae uitgebreek het. <\/p>\n\n\n\n

Bjorgan se dogter Bronwynne Morrie, wat ook die kafeebe\u00adstuurder is, vertel hulle het toe weer die geleentheid aangegryp en besluit om hul deure vroeg in Februarie weer oop te maak. <\/p>\n\n\n\n

\u201cDeur die pandemie was kerke gesluit en ons moes iets doen sodat meer inkomste vir die kerk kon inkom. My pa was nog altyd so ge\u00efnteresseerd in die restaurantbesigheid en is baie lief vir kos. Deur die pandemie het hy die program In die Sop<\/span> gekyk en toe besluit hy hoekom begin ons nie \u2019n kafee nie. Ons het die oop ruimte gehad en ons wou ook vir mense werk skep.<\/p>\n\n\n\n

\u201cDie kafee is toe begin met wat ons by die kerk gehad het, soos die tafels. Ons het maar hier en daar goedjies gekoop wat ons gesien het ons nodig het. Aan die begin van hierdie jaar het ons weer oopgemaak en toe kontak In die Sop<\/span> ons en s\u00ea hulle wil ons graag help. Ons het die papiere ingevul, en toe ons ons weer kom kry, kom hulle met al hul equipment<\/span> hier aan en kom doen \u2019n revamp<\/span>.\u201d<\/p>\n\n\n\n

Bjorgan vertel dat die gebou wat die kafee tans huisves, oorspronklik as die kerk se pastorie gebou is. Hy is een van die stigterspredikante en dien ook tans as die hoofpredikant.<\/p>\n\n\n\n

\u201cDie kafee is in ons pastorie. Die pastorie is nooit voorheen bewoon nie. Ons het dit voorheen as \u2019n kleuterskool gebruik. Toe ons groot kerk klaar gebou is, het die kleuterskool na die saalgedeelte getrek en die pastorie het toe heeltemal leeg gestaan. <\/p>\n\n\n\n

\u201cOns het toe die idee gekry om \u2019n kafee te open.\u201d<\/p>\n\n\n\n

Bronwynne s\u00ea sy en haar pa was geskok, maar tog opgewonde, toe hulle die oproep van die kykNet-program ontvang. In die Sop<\/span> is \u2019n televisieprogram wat daarop fokus om restaurante te help transformeer en in die proses meer voete na die onderneming te lok.<\/p>\n\n\n\n

\u201cEk was baie geskok, want hoekom kies hulle ons? Ons was toe omtrent net drie of vier maande weer op die been. <\/p>\n\n\n\n

\u201cOns het nie eintlik experience<\/span> in die bedryf nie en ons is deel van \u2019n kerk. Boonop is ons in \u2019n woongebied.<\/p>\n\n\n\n

\u201cIt was almost like random<\/span> dat hulle ons gekies het, maar ek dink met die hele agtergrondstorie van waar ons werk wil skep vir mense wat nie vaardighede het nie, is iets wat die program ge\u00efnisieer het.<\/p>\n\n\n\n

\u201cNadat ons die oproep van die program se mense ontvang het, het ons net ges\u00ea \u201cit\u2019s like just living by faith<\/span>\u201d en die Here se genade is so groot vir ons dat die geleentheid na ons toe gekom het sonder dat ons dit enigsins verwag het.\u201d<\/p>\n\n\n\n

Tydens die verfilming van die program en die opknapping van die kafee was Bronwynne die enigste een wat die transformasie kon aanskou. Vir Bjorgan was dit alles \u2019n verrassing. Hy s\u00ea die kafee is binne die bestek van drie dae in \u2019n \u201cvolwaardige kafee\u201d omgeskep en sluit pragtige decor in met \u2019n bobaas-kombuis wat aan die vereistes van die gesondheidsinspekteurs voldoen.<\/p>\n\n\n\n

Buiten dat die kerk werk vir ander deur die kafee wou skep, het hulle dit ook in gedagte gehad om \u2019n ruimte te skep waar mense saam kan kuier.<\/p>\n\n\n\n

Bjorgan voeg by: \u201cOns ontvang ook baie sakemense wat gebruik maak van die kafee om met hul kli\u00ebnte te vergader, want in die Paarl-Oos is daar nie eintlik sulke geriewe nie. Hulle moet maar \u2019n bietjie ver ry as hulle na so kafee toe wil gaan. Ons is hier vir die gemeenskap. Ons het \u2019n kuieratmosfeer geskep en baie van die mense kom net om te kuier en te ontspan.\u201d<\/p>\n\n\n\n

Volgens Bronwynne is hul roosterkoeke \u2019n wenner en sit hulle dit elke dag voor. Sy vertel ook mense is gaande oor hul ontbyt en hulle kom selfs laatmiddae om ontbyt te eet. Hulle het ook onlangs \u2019n somerspyskaart bekend gestel en die goeie nuus is dat alles onder R100 kos.<\/p>\n\n\n\n

Die ruimte is baie rustig, kalm en verwelkomend. Dit is sowaar \u2019n versteekte juweel, soos wat baie mense dit sal bestempel. The Gathering Caf\u00e9 het ook \u2019n raadsaal vir sowat 10 mense wat mense gratis kan gebruik. In ruil verwag die kafee net dat mense ten minste \u2019n koffie koop. Die raadsaal moet natuurlik vooraf bespreek word. Die kafee kan ook vir partytjies bespreek word.<\/p>\n\n\n\n

The Gathering Caf\u00e9 is nou van Maandae tot Saterdae oop.<\/p>\n\n\n\n