{"id":57752,"date":"2022-12-01T14:13:07","date_gmt":"2022-12-01T12:13:07","guid":{"rendered":"https:\/\/novanews.co.za\/paarlpost\/messteek-verdagte-gearresteer-na-pa-en-seun-hom-uitken-20221201\/"},"modified":"2025-03-20T01:00:50","modified_gmt":"2025-03-19T23:00:50","slug":"messteek-verdagte-gearresteer-na-pa-en-seun-hom-uitken-20221201","status":"publish","type":"post","link":"https:\/\/novanews.co.za\/paarlpost\/messteek-verdagte-gearresteer-na-pa-en-seun-hom-uitken-20221201\/","title":{"rendered":"Messteek-verdagte gearresteer n\u00e1 pa en seun hom uitken"},"content":{"rendered":"\n

\u2018n Verdagte wat vermoedelik by die messteekvoorval verlede Woensdag by die privaat koshuis in Paarl betrokke was, is gisteroggend met die hulp van \u2018n buurtwag in hegtenis geneem.<\/p>\n\n\n\n

Paarl polisiewoordvoerder, kapt. Louise du Plessis, het die Paarl Post<\/em> in kennis gestel dat \u2018n verdagte in verband met die saak Woensdagoggend in hegtenis geneem is. \u201cDie verdagte wat deur \u2018n buurtwag na die polisiestasie toe gebring is, is deur die klaers in die saak uitgeken.<\/p>\n\n\n\n

\u201cDie verdagte sal m\u00f4re (Vrydag) sy verskyning in die Paarl-landdroshof maak,\u201d bevestig Du Plessis.<\/p>\n\n\n\n

Dit, n\u00e1 die pa en seun ernstige messteekwonde opgedoen het toe hulle verlede Woensdag in die private Skatkis-koshuis in Paarl se Hoofstraat aangeval is. Hierna, s\u00ea hy, is hy as verdagte bestempel te midde van \u201ctragiese misverstande van samevloeiende omstandighede\u201d.<\/p>\n\n\n\n

Tielman Germishuys het aan Paarl Post<\/em> vertel dat hy en sy seun albei slagoffers is van \u2019n bloederige huisinbraak, wat deur sommige mense in die gemeenskap as gesinsgeweld afgemaak is.<\/p>\n\n\n\n

\u201cDie samevloeiing van omstandighede het hope trauma en skade aan my, my familie en my onderneming se reputasie berokken, bo en behalwe die bestaande traumatiese beserings wat ons in die voorval ervaar het.\u201d<\/p>\n\n\n\n

Volgens \u2019n verklaring wat namens Germishuys hieroor uitgereik is, het die voorval op 23 November omstreeks 23:30 plaasgevind.<\/p>\n\n\n\n

Germishuys se seun, \u2019n gr.\u200911-leerder, wat wakker was en laat studeer het, het die aanvaller in die kombuis aangetref. Germishuys het reeds geslaap, maar het wakker geword weens \u2019n bakleiery en \u2019n geskree.<\/p>\n\n\n\n

Hy het probeer om die aanvaller te oorrompel, maar die aanvaller het daarin geslaag om van die toneel af te vlug deur oor \u2019n ho\u00eb hek te spring.<\/p>\n\n\n\n

In die struweling is beide Germishuys en sy seun ernstig beseer deurdat hulle verskeie kere met \u2019n mes gesteek is.<\/p>\n\n\n\n

Die inbreker het na bewering deur \u2019n oop deur toegang tot die koshuis verkry, en het oomblikke later weer deur dieselfde ingang ontsnap.<\/p>\n\n\n\n

Hulle is na die Mediclinic Paarl gehaas vir noodbehandeling.<\/p>\n\n\n\n

Germishuys s\u00ea hy was byna oortuig dat hulle nie die hospitaal betyds sou bereik nie. \u201cDaar was so baie bloed; ek het gedink ons sou doodbloei voordat ons die hospitaal haal,\u201d vertel hy.<\/p>\n\n\n\n

\u201cAlbei my bene is geopereer. My regterknieskyf se ligamente is erg beskadig en my linkerbeen was tot op die been oopgesny. My seun se ken is oopgesny toe die aanvaller vermoedelik vir sy keel gemik het. Sy long is ook deur die mes deurboor.\u201d<\/p>\n\n\n\n

N\u00e1 die voorval en terwyl hulle in die hospitaal was, het lede van die Paar-polisie die familie ondervra.<\/p>\n\n\n\n

In die verklaring word skok uitgespreek oor toe berig is hulle het geweier om verklarings aan die polisie af te l\u00ea.<\/p>\n\n\n\n

\u201cDit word kategories ontken aangesien hy met die polisie saamgewerk het van die eerste verslag wat gegee is,\u201d lui die verklaring.<\/p>\n\n\n\n

Germishuys het selfs vrywillig op 26\u2009November \u2019n poligraaftoets ondergaan om die feite te verifieer en, volgens die verklaring, is onvoorwaardelik bevind dat Germishuys eerlik was toe hy sy weergawe van die gebeure verskaf het.<\/p>\n\n\n\n

Hierdie opeenhoping van omstandighede behels onder meer WhatsApp-boodskappe oor die geval, wat Donderdagoggend wyd op gemeenskapsgroepe versprei is.<\/p>\n\n\n\n

Dit het gelei tot \u2019n Facebook-inskrywing deur die administrateur van die Paarl Pals-groep, Ilde Naude-Meyer, wat melding van die voorval gemaak en \u2019n waarskuwing oor toenemende misdaad in die gebied gedeel het.<\/p>\n\n\n\n

Kapt. Louise du Plessis, \u2019n woordvoerder van die Paarl-polisie, bevestig: \u201cDie Paarl-polisie het die aand van 23\u2009November by \u2019n skoolkoshuis in Hoofstraat, Paarl, aandag gegee waar die inwoners van die huis in \u2019n beweerde onderonsie met \u2019n inbreker op die perseel betrokke was.<\/p>\n\n\n\n

\u201cDie Paarl-polisie het geen verklarings van die slagoffers gekry nie weens die aard van mediese behandeling wat by die hospitaal ontvang is, maar die voorval is vir verdere ondersoek deur die polisie geregistreer.\u201d<\/p>\n\n\n\n

Verklarings is verkry en bewyse wat op die toneel ingesamel is, is bewaar vir verdere ondersoek. Klagtes van aanranding en poging tot huisbraak word ondersoek.<\/p>\n\n\n\n

As voormalige predikant van 17 jaar en huidige koshuisvader van Skatkis, s\u00ea Germishuys hy is onverpoos besig om gepaste stappe te neem nadat soveel skade deur vals stories veroorsaak is.<\/p>\n\n\n\n

\u201cEk het gere\u00ebl dat my seun sielkundige behandeling ondergaan, sowel as berading vir enige kinders wat trauma op die toneel opgedoen het.\u201d<\/p>\n\n\n\n

Tog is talle ouers wie se kinders in die koshuis woon besorg oor veiligheid op die perseel.<\/p>\n\n\n\n

In reaksie s\u00ea Germishuys hy het reeds \u2019n veiligheidsoudit op die koshuis se perseel versoek.<\/p>\n\n\n\n

\u201cSodra die oudit gedoen is, sal ek enige aanbevelings om die perseel nog meer te beveilig, toepas om die inwoners van die koshuis en hul ouers gerus te stel.\u201d<\/p>\n\n\n\n

Dit is na bewering die tweede messteekvoorval wat in die afgelope twee weke in Noorder-Paarl aangemeld is.  <\/span><\/p>\n\n\n\n