{"id":59842,"date":"2022-02-17T06:07:43","date_gmt":"2022-02-17T04:07:43","guid":{"rendered":"https:\/\/novanews.co.za\/noordkaapbulletin\/boogskiet-raak-n-treffer-in-nk-20220215-2\/"},"modified":"2025-03-21T12:46:34","modified_gmt":"2025-03-21T10:46:34","slug":"boogskiet-raak-n-treffer-in-nk-20220215-2","status":"publish","type":"post","link":"https:\/\/novanews.co.za\/noordkaapbulletin\/boogskiet-raak-n-treffer-in-nk-20220215-2\/","title":{"rendered":"Boogskiet raak \u2019n treffer in NK"},"content":{"rendered":"\n

In die eerste nasionale boogskiet\u00adtoernooi vir die jaar het 17 skuts van die Noord-Kaap uitstekend presteer en hiermee bevestig dat di\u00e9 sportsoort, nog redelik onbekend in die provinsie, \u2019n merk laat \u2013 en nie net op die teiken nie. <\/p>\n\n\n\n

Di\u00e9 nasionale kompetisie van die nie-winsgewende organisasie Africa Genesis Archery South Africa (AGA-SA) NPC vir skole en klubs het op 29 Januarie plaasgevind. Die Noord-Kapenaars het met behulp van Skype uit die sportgimnasium van die Elizabeth Conradie-skool in Kimberley deelgeneem. <\/p>\n\n\n\n

Punte is direk n\u00e1 die byeenkoms na \u2019n sentrale sentrum gestuur, vir verwerking en bekendmaking van die nasionale uitslae. <\/p>\n\n\n\n

In die laerskool-afdeling (gr. 4 tot gr. 7) was Marvin Ponton, in gr. 7 aan die Laerskool Eureka in Kimberley, tweede in Suid-Afrika, en eerste in die Noord-Kaap met \u2019n punt van 272 uit 300. Marvin het 11 tiene geskiet en sy telling was die hoogste van al die Noord-Kaapse skuts se tellings.<\/p>\n\n\n\n

Elrize de Greeff, \u2019n gr. 6-tuisskoolleerling, was tweede met 242\/300. Ciska du Preez (gr. 7), ook van Eureka, was derde met 196\/300.<\/p>\n\n\n\n

In die ho\u00ebrskool-afdeling was Tyra Adams, \u2019n gr. 11-tuisskoolleerling, eerste met \u2019n telling van 268\/300. Sy het 11 tiene geskiet. <\/p>\n\n\n\n

Terence van Eck, in gr. 10 aan die Ho\u00ebrskool Adamantia in die stad, was tweede met 224\/300.<\/p>\n\n\n\n

Wietsche Hoek, \u2019n gr. 8-leerling aan die Ho\u00ebrskool Diamantveld in Kimberley, was derde met 226\/300.<\/p>\n\n\n\n

In die volwasse afdeling was Schalk van der Merwe van Adventure Archery Klub Kimberley eerste in die Noord-Kaap met 266\/300 en 12 tiene; Dawid de Greeff van Adventure Archery Klub in die tweede plek (263\/300 en tien tiene); en Werner Hoek van Adventure Archery Klub derde met 226\/300.<\/p>\n\n\n\n

Al die skuts het aan die Bull\u2019s-eye-kompetisie deelgeneem. Hiervoor moet skuts 15 pyle op 10 m na \u2019n 80 cm-Fita-teiken skiet, en daarna 15 pyle op 15 m, waarna \u2019n punt uit 300 toegeken word. Die Fita-teiken is op peil met die vereistes van die W\u00eareldboogskietfederasie.<\/p>\n\n\n\n

Skuts moet aan minstens vyf provinsiale kompetisies per jaar deelneem om in aanmerking vir provinsiale en nasionale kleure te kom. Die vyf beste tellings van elke skut vir die jaar bepaal die rangorde van die topskuts in die land. <\/p>\n\n\n\n

\n
Die volgende Noord-Kaap-kompetisie van AGA-SA is Saterdag (19\/02) om 08:30 by die Laerskool Du Toitspan in Kimberley. Toeskouers is welkom.<\/div>\n<\/div>\n\n\n\n