{"id":58964,"date":"2022-05-12T06:06:43","date_gmt":"2022-05-12T04:06:43","guid":{"rendered":"https:\/\/novanews.co.za\/noordkaapbulletin\/joernalis-se-boek-laat-lig-van-waarheid-skyn-20220510-2\/"},"modified":"2025-03-21T13:24:37","modified_gmt":"2025-03-21T11:24:37","slug":"joernalis-se-boek-laat-lig-van-waarheid-skyn-20220510-2","status":"publish","type":"post","link":"https:\/\/novanews.co.za\/noordkaapbulletin\/joernalis-se-boek-laat-lig-van-waarheid-skyn-20220510-2\/","title":{"rendered":"Joernalis se boek laat lig van waarheid skyn"},"content":{"rendered":"\n

Die treurspel en invloed van \u2019n huurmoord in \u2019n plattelandse dorp is met die skryf van di\u00e9 boek vertel \u2013 al sal sommige vrae in die moordsaak van Leon Brits van Pofadder waarskynlik onbeantwoord bly. <\/p>\n\n\n\n

Elkeen wat dit lees, kan daaruit leer. <\/p>\n\n\n\n

\u201cMoenie dink jy gaan sommer met moord wegkom nie,\u201d s\u00ea Charn\u00e9 Kemp, skrywer van die nuwe boek Moord op Pofadder<\/span>. <\/p>\n\n\n\n

Volgens Kemp, \u2019n ervare ondersoekende joernalis met jare se hofervaring, sal drie onweerlegbare getuienisse \u2013 DNS, selfoonrekords en kringtelevisiekameras \u2013 meebring dat \u2019n skuldige die een of ander tyd vasgetrek word. <\/p>\n\n\n\n

\n Moord op Pofadder<\/span> vertel die voorafgaande gebeure tot die huurmoord op die 41-jarige Leon, \u2019n bekende hotelier, sakeman en boer van di\u00e9 Noord-Kaapse dorp; en die ondersoek daarna wat tot die inhegtenisneming, skuldigbevinding en tronkstraf van Suretha Brits, Leon se vrou, en drie ander gelei het. <\/p>\n\n\n\n

\u201cDie slagoffer is dood. Hy kan nie sy storie vertel nie,\u201d s\u00ea Kemp. Tog gee di\u00e9 boek hom as\u2019t ware \u2019n stem.<\/p>\n\n\n\n

Maar met die lees daarvan word dit duidelik dat die vermoorde nie die enigste slagoffer was nie. <\/p>\n\n\n\n

Dit is ook nie net sy familielede en vriende wat daardeur geraak is nie; sy moord het wyd in die gemeenskap uitgekring en indirek talle ander ook slagoffers gemaak. Soos die 11 kinders van di\u00e9 wat skuldig bevind is, wat nou sonder een of albei ouers moet grootword. <\/p>\n\n\n\n

\u2018Onskuld\u2019 verrassend<\/h6>\n\n\n\n

Vir Kemp, wat met hierdie boek haar derde in die nie-fiksie misdaadgenre gepubliseer het, was dit verrassend dat Suretha so ver sou gaan om haar onskuld voor te hou. <\/p>\n\n\n\n

Op \u2019n manier was Suretha ook na\u00efef; sy het lank vasgehou aan die oortuiging dat haar minderjarige kinders rede genoeg sou wees dat sy nie in hegtenis geneem sal word nie. <\/p>\n\n\n\n

\u201cSy was bereid om tot die uiterste vir haar onskuld te veg,\u201d s\u00ea Kemp, wat vir maande deur dokumente, onderhoude, stemboodskappe, verklarings en opnames van hofverrigtinge gewerk het. <\/p>\n\n\n\n

Omdat dit presies getranskribeer is, het dit haar gehelp om die Afrikaans van die streek vas te vang en karakterisering te doen. Alles wat sy geskryf het, kom daaruit. Sy s\u00ea die rede dat kruisondervraging tydens \u2019n verhoor so belangrik is, is omdat baie besonderhede daaruit kom.<\/p>\n\n\n\n

Kort n\u00e1 die moord het Kemp agtergrondinligting begin insamel, en teen Augustus 2021 het sy reeds 30 000 woorde geskryf. <\/p>\n\n\n\n

Teen daardie tyd was die 30-jarige Suretha reeds in aanhouding nadat sy op 29 Maart 2021 in hegtenis geneem is. Die middelman, Jacques van Vuuren (toe 37), het toe reeds gebieg, \u2019n pleitooreenkoms met die staat aangegaan en 20 jaar gevangenisstraf ontvang. Ook die name van die ander twee beskuldigdes was bekend nadat hulle in Kathu in hegtenis geneem is. Enrich Williams (toe 34) is op dieselfde dag as Van Vuuren in hegtenis geneem, en Amantle Bareki (toe 24) op 23 Oktober. <\/p>\n\n\n\n

\u201cDie boek het struktuur begin kry toe Van Vuuren in November 2021 in die verhoor van die ander twee getuig het,\u201d vertel Kemp. <\/p>\n\n\n\n

\u201cToe het ek die begin van die boek gesien.\u201d <\/p>\n\n\n\n

Die boek begin in \u2019n donker voertuig waar Van Vuuren, Williams en Bareki deur die nag van Kathu na Pofadder ry met \u2019n duidelike opdrag: Maak vir Leon dood.<\/p>\n\n\n\n

\u2018Waarom het ek begin?\u2019<\/h6>\n\n\n\n

Kemp, wat saam met haar tandartsman Attie en hul drie honde in Kimberley bly, moes deeglik beplan aan die tyd wat sy in Pofadder en Upington deurgebring het. Tussen die Noord-Kaapse hoofstad en Pofadder strek meer as 600 km se pad, terwyl dit net meer as 400 km tot in Upington is.<\/p>\n\n\n\n

\u201cEk het elke keer met mense gepraat, kontakte opgebou en die omgewing leer ken.\u201d<\/p>\n\n\n\n

Aanvanklik het die inwoners van Pofadder, Marchand en Kakamas nie maklik met Kemp gepraat nie. <\/p>\n\n\n\n

\u201cMaar baie van hulle was staatsgetuies en mag nie met die media gepraat het nie. Eers toe Suretha skuld erken het, het hulle begin praat. Dit was asof hulle verlig was om te praat. Ek sou nog met Suretha wou praat, maar my versoek is glad nie beantwoord nie.\u201d<\/p>\n\n\n\n

Kemp het vir maande van 05:00 tot 22:00 voor die rekenaar deurgebring. <\/p>\n\n\n\n

\u201cBaie kere het ek gewonder waarom ek dit begin het.\u201d<\/p>\n\n\n\n

\n Moord in Pofadder<\/span> neem die trant van skeppende nie-fiksie in, en word uit verskillende karakters se oogpunt vertel. Elk van die 46 hoofstukke, wat kort is en maklik lees, begin met \u2019n prikkelende opskrif.<\/p>\n\n\n\n

In die tydperk van die moord op Leon was Kemp met haar meestersgraad in kreatiewe skryfkuns aan die Universiteit van die Vrystaat (UV) besig. <\/p>\n\n\n\n

\u201cTerugskouend besef ek dat my meestersgraad-manuskrip, wat fiksie is, dieselfde agtergrond as die moordsaak het \u2013 \u2019n vrou, \u2019n kwesbare man en \u2019n huurmoord. Dit wat ek tydens my meestersgraad geleer het, het my geweldig gehelp.\u201d<\/p>\n\n\n\n

Kemp, reeds 12 jaar in Kimberley, is oorspronklik van Florida en het aan die UV studeer. Sy en haar man het ook \u2019n paar jaar in Londen gewoon en gewerk; en daarna in Kuruman, vanwaar hulle na Kimberley verhuis het. <\/p>\n\n\n\n

Al drie haar boeke, ook die meestersgraad-manuskrip, is in en deur die Noord-Kaap ge\u00efnspireer. <\/p>\n\n\n\n

Sy beskou die Noord-Kaapse ooptes, berge en dale as bekoorlik, en sy en haar man is gaande oor die geskiedenis van die Anglo-Boere-oorlog wat hulle hier leer ken het.<\/p>\n\n\n\n

Wonder oor lig en donker<\/h6>\n\n\n\n

\u201cEk was nog altyd in die makabere ge\u00efnteresseerd,\u201d vertel Kemp. <\/p>\n\n\n\n

Sy was daardie skoolkind met \u2019n uitve\u00ebr en skerpmaker wat soos \u2019n kopbeen lyk. Sy hou daarvan om begraafplase te besoek, en wonder oor die lig en donker in elke mens. <\/p>\n\n\n\n

Jare later in Kimberley, toe Deon, Christel en Marthella Steenkamp op Goeie Vrydag van 2012 op die gesinsplaas buite Griekwastad vermoor is, het Kemp geweet: Dit is \u2019n storie wat vertel moet word. Haar eerste boek, Moord op Griekwastad<\/span>, is geskryf. Haar tweede boek, Bloed, dunner as water<\/span>, handel oor gesinsmoorde. <\/p>\n\n\n\n

In Kemp se loopbaan het sy in hofsake gesien spyt kom te laat.<\/p>\n\n\n\n

\u201cOm soos Suretha tronk toe te gaan en jou familie agter te los is erger hel as om deur \u2019n egskeiding te gaan,\u201d merk sy op. <\/p>\n\n\n\n

Benewens harde banke en strak prosedures is krakende deure vir haar so kenmerkend van hofsale. Maar \u2019n hofsaal se atmosfeer hang van jou gemoedstoestand af, s\u00ea sy.<\/p>\n\n\n\n

\u201cEn wanneer die waarheid se\u00ebvier, is dit asof die lig helderder skyn.\u201d <\/p>\n\n\n\n